23
(Yesus Mengecam Pemempen Agama)

1 Sodah iye, Yesus buik kenempat urang lobot ngan murid-murid-Nye, 2 “Padong ahli Torat ngan urang-urang Farisi duduk de pucuk keresi Musa. 3 Ule kerena iye, segelo hal, selobot nyo mike kehatoko kenempat kowe, lakukolah ngan perhatikolah. Cuma hambuk, jengon lakuko perbuaton-perbuatonnye ule mike melabekonye, hambuk hopi melakukonnye. 4 Mike mengobotko bobon-bobon nyo berat ngan memotekkonye de pucuk behu urang loin. Cuma hambuk, mike dewek hopi ndok memendahkonye dengan jeri mike. 5 Mike melakuko segelo perbuaton mike enggak konyo dekoleh urang. Mike mempelebor tali-tali sembahyangnye ngan mempergodong rumbai-rumbai hujung jubah mike. 6 Mike mengagomko tapon terhormat delom perjamuon, tapon duduk terdepan delom sinagoge-sinagoge, 7 Salam penghormaton de tempat-tempat umum, ngan desobut Rabi ule urang-urang. 8 Cuma hambuk, mike jengon de sobut rabi kerena anyo sikuk Gurume, ngan kowe segelo bedulur. 9 Jengon menyobut siape bae upa bepakme de denia nie kerena sikuk Bepakme, iyolah Enye nyo de serga. 10 Jengon pula kowe de sobut pemempen ulenyo sikuk bae Pemempenme, iyolah Kristus. 11 Hambuk, nyo paleng godong deantaro kowe, empuknye enye menjedi pelayonme. 12 Siape nyo meninggiko dirinye nak derendahko ngan siape nyo merendahko dirinye nak de tinggiko.

13 Celakolah kowe, ahli-ahli Torat ngan urang-urang Farisi, urang-urang munafik! kowe menutup pintu Kerajaon Serga de depan urang ulenyo kowe dewek hopi memasukinye ngan jugo hopi mengizinko mike nyo sedang masuk nak memasukinye. 14 Celakolah kowe, hai ahli-ahli Torat ngan urang-urang Farisi, urang-urang munafik! kowe melodok rumah padong jendo ngan untuk kepura-puraon kowe membuat doa-doa nyo panjong. Ulenyo iye, kowe bakal menerimo hukumon nyo lobih berat.

15 Celakolah kowe, hai ahli-ahli Torat ngan urang-urang Farisi, urang-urang munafik! Kowe mengendedoti louton ngan deroton nak ngunda seurang masuk kedelom agamame. Ngan, tekalo enye sodah menjedi saloh sikuknye, kowe menjedikonye anak nerako, dua kali lipot deripado kowe dewek.

16 Celakolah kowe, hao padong pemempen buta, nyo buik, ‘Siape nyo besumpah demi Bait Allah, hal iye hopi ado retinyo. Cuma hambuk, siape nyo besumpah demi emas Bait Allah, enye tekobot uleh sumpahnyo iye.’ 17 Kowe, nyo lali ngan nyo buta! mone nyo tegodong, emas atau Bait Allah nyo mengudusko emas iye? 18 Ngan, ‘Siape nyo besumpah demi altar, sumpah iye hopi ado retinyo. Cuma hambuk, siape nyo besumpah demi persembahon de pucuk altar iye, enye tekobot uleh sumpahnyo iye.’ 19 Hai kowe urang-urang buta! Mone nyo tegodong, persembahon atau altar nyo mengudusko persembahon iye? 20 Ulenyo iye, siape nyo besumpah demi altar, besumpah demi altar ngan segelo nyo ado de pucuknye. 21 Ngan, siape nyo besumpah demi Bait Allah, besumpah demi Bait Allah ngan demi Enye nyo diom de delomnye. 22 Ngan, siape nyo besumpah demi serga, besumpah demi tahta Allah, ngan demi Enye nyo duduk de pucuknye.

23 Celakolah kowe, hai ahli-ahli Torat ngan urang-urang Farisi, urang-urang munafik! Kowe membori persepuluhonme deri selasih, adas manis, ngan jintan, hambuk lah mengabaiko hal-hal nyo sajo berat deri Hukum Torat, ulenyo keadilon, belos tesihon, ngan iman. Hal-hal nielah nyo seharusnye sodah kowe lakuko hopi mengabaiko hal-hal nyo loin. 24 Kowe, pemempen-pemempen buta, nyo menyareng ronget ngan menolon seikuk unta!

25 Celakolah kowe, hai ahli-ahli Torat ngan urang-urang Farisi, urang-urang munafik! sabab, kowe meresehko bagion luor cangker ngan pingganme, hambuk bagion delomnye ponoh ramposon ngan keserakahon. 26 Kowe, urang-urang Farisi nyo buta! bersihko dehulu bagion delom cangker ngan pinggan, enggak konyo bagion luornye jugo pacok menjedi bersih.

27 Celakolah kowe, ahli-ahli Torat ngan urang-urang Farisi, urang-urang munafik! Sabab, kowe samo upa kuboron nyo de encet puteh, nyo bagion luornye kekolehon beik, hambuk bagion delomnye ponuh dengan tulang-tulang urang teelek ngan segelo kenajison. 28 Upa iyelah jugo ngan kowe, nyo bagion luor kowe kekenan bonor bage mendesio. Cuma hambuk, pado bagion delom kowe ponuh kemunafikon ngan kejahaton.

29 Celakolah kowe, ahli-ahli Torat ngan urang-urang Farisi, urang-urang munafik! Sabab, kowe membengun kuburon-kuburon padong nabi ngan memperbeiki nisan-nisan urang-urang saleh, 30 ngan buik, ‘munye kamie sodah hidup ngan maso nenek puyang kamie, kami hopi nak ngambik bagion dengan mike delom deroh padong nabi.’ 31 Dengan mumunye, kowe bersaksi terhadop badan me dewek bahwa kowe adolah anak-anak mike nyo membunoh padong nabi. 32 Jedi, genaplah ukuron padong nenek puyang me. 33 Kowe, ulor-ulor beludak, upamone kowe nak melapasko diri deri hukumon neraka? 34 Ulenyo iye, kolekolah, Ake mengutus nabi-nabi, urang-urang bijaksana, ngan ahli-ahli Torat kenempat mike. Beberape deri kowe nak kowe bunoh ngan salibko, beberape nak kowe kepukih de sinagoge-sinagogeme, ngan kowe aniayo deri kota ke kota, 35 Enggak konyo segelo deroh urang-urang bonor nyo de tumpahko de behumi, mulai deri deroh Habel, urang nyo bonor iye, sampoi kenempat deroh Zakharia, anak Berekhya, nyo kowe bunoh de antaro Bait Allah ngan Altar. 36 Sesungguhnye, ake ngehatoko ngan kowe bahwa segelo hal-hal nie nak njongok pucuk generasi nie.”
(Hukumon Bage Yerusalem)

37 “Oh Yerusalem, Yerusalem, nyo membunoh padong nabi ngan betohuknyo dengan betu mike nyo de utus kenempat nye. Alangko recapnyo Ake amat mengumpulko anak-anakme serompok, upa induk ayom mengumpulko anak-anaknye de bewoh kepaknye, hambuk kowe hopi endok. 38 Kolehlah, rumahme detinggalko bageme ngan menjedi sepi. 39 Sabab, Ake ngehatoko ngan kowe bahwa mulai kinie, kowe hopi nak ngoleh Ake lagi sampoi kowe buik, ‘Deberkatilah Enye nyo njongok delom namo Tuhan.’”