24
(Khotbah Yesus tentang aher zaman, Bait Allah bakal de runtuhko)

1 Yesus keluor deri Bait Allah mengka bejelon tekalo padong murid-Nye njongok mak menunjukko bengunon Bait Allah kenempat Enye. 2 Ngan, Enye betanyo ngan mike, “Hopikah kowe ngoleh segelo hal nie? Ake ngehatoko nyo sebonornyo ngan kowe bahwa hopi ado sikuk pun betu de sie nak de biarko ado depucuk betu nyo loin, nyo hopi nak deruntuhko.”

(Awal Penderitaoon)

3 Ngan, tekalo Yesus duduk de pucuk buket Zaitun, murid-murid njongok kenempat Enye secaro dedewekon ngan buik, “Buikkolah kenempat kamie, kapan hal-hal nie bakal terjedi ngan ape nyo bakal mnjedi tando kedetongon-Me ngan aher zaman nie?”

4 Yesus nyimboti mike, “Perhatikolah enggak konyo jengon ado urang nyo menyosotko kowe. 5 Sabab, lobot nyo nak njongok delom namo-Ke ngan buik, ‘Ake adolah Kristus,’ ngan mike nak menyosotko lobot urang. 6 Kowe bakal mendongor peperangon ngan kabar-kabar tentang perang. Perhatikolah enggak konyo kowe hopi takut ulenyo hal-hal nie harus terjedi, hambuk nie bolum kesodahonnye. 7 Sabab, bengeso nak bangket melawon bengeso, ngan kerajaon, ngan de segelo tempat bakal ado kelaporon ngan gempo behumi. 8 Segelo hal nie adolah awal deri penderitakon saket melaherko.

9 Mengka, mike nak menyerahko kowe kenempat penganiayakon, ngan nak membunohme, ngan kowe nak de benci uleh segeloh bengeso ule namo-Ke. 10 Tekalo waktu iye, lobot nyo nak tesandung, ngan nak saleng menyerahko, ngan membenci sikuk samo loin. 11 Lobot nabi palsu nak timbul ngan menyosotko lobot urang. 12 Sabab, pelanggaron sain betamboh, kaseh keloboton urang nak menjedi dingen. 13 Cuma hambuk, urang nyo betahan sampoi aher nak de selamatko. 14 Ngan, Injil Kerajaon nie nak de beritako ke segelo denia upa kesaksion bage segelo bengeso, ngan mengka kesodahan nak njongok.
(Penderitaon Godong ngan Krsitus-Kristus Pelesu)

15 “Jedi, tekalo kowe ngoleh pembinaso keji, upa nyo dekehatoko Nabi Daniel, togok detempat suci, hendaklah padong pembeco memahaminye, 16 Mengka mike nyo ado de Yudea harus melariko diri ke pegunongon. 17 Siape nyo ado de pucuk atop rumah, jengonlah enye turun untuk mengambik ape pun deri delom rumahnye. 18 Siape nyo ado de huma, jengon belek untuk mengambek jubahnye. 19 Cuma, celakolah mike nyo sedang bunteng ngan mike nyo sedang nyusuko budak abangnye singgo hari-hari iye. 20 Bedoalah enggak konyo pelarion me jengo singgo musem dingen atau singgo hari Sabat. 21 Ulenyo todo nak terjdi maso penderitaon godong, upa nyo bolum pernah terjedi sejak permulakon denia sampoi kinie, ngan hopi nak pernah terjedi lagi. 22 Ngan, munye hari-hari iye hopi de perpandok, hopi ado hidop nyo nak deselamatko. Hambuk, demi mike nyo terpeleh, hari-hari iye nak de perpandok.

23 Sodah iye, munye urang buik ngan mike, ‘koleh, Kristus ado desie,’ atau ‘Enye ado de sane,’ jengonlah pecayo ngan enye. 24 Sabab, kristus-kristus pelesu ngan nabi-nabi pelesu nak timbul ngan nak mengadoko nyo godong ngan mujizat-mujizat sehinggo menyosotko, munye mungken, bahkan mike nyo tepeleh. 25 Perhatikolah, Ake la ngehatokonye ngan kowe sebolumnye. 26 Jedi, munye mike buik ngan kowe, ‘koleh, Enye ado de padang belantara,’ jengon de jongok kiune, atau ‘koleh, Enye ado de delom kamar iye,’ jengon percayo ngan enye. 27 Sabab, samo upa kilat nyo memancor deri timur ngan besinar sampoi ke barat, upa iyelah jugo kedetongon Anak Mendesio nak terjedi. 28 De tempat nyo ado bengkoi, de sanelah burung nasar nak bekumpul.”
(Kedetongan Anak Mendesio)

29 “Segerah, sesodah maso penderitaon iye, ‘Matoari nak dejedikon kolom, ngan bulan hopi nak memboriko cahayo, bintang-bintang nak betitekon deri langt, ngan kuaso-kuaso de langet nak de goncangko.’ 30 Mengka, tando Anak Mendesio nak timbul de langet ngan suku-suku de behumi nak meratop. Mike nak mengoleh Anak Mendesio njongok delom aban-aban de langet, dengan kuaso ngan kemuliaon nyo godong. 31 Ngan, Enye nak mengutus malaikat-malaikat-Nye dengan suaro trompet nyo bias, ngan mike nak mengumpulko umat pilehon-Nye deri keempat penjuru behumi, deri hujung langet nyo sikuk ke hujung nyo loin.

32 Kini, Pelajorilah perumpamoon deri betong ara tekalo rantengnye menjedi lombut ngan doun-dounnye betunos, kowe mengetahui bahwa musim poang sodah parok. 33 Upaiyelah jugo tekalo kowe mengoleh segelo hal nie, kowe tahuko bahwa Enye sodah parok, de ambang pintu. 34 Sebonornyo, Ake ngehatoko ngan kowe bahwa generasi nie hopi nak belalu sampoi segelo hal nie terjedi. 35 Langet ngan behumi nak sayaou, hambuk firman-firman-Ke hopi nak sayaou.”
(Waktu Kedetongon Anak Mendesio)

36 “Cuma hambuk, mengenai hari ngan waktunye, hopi ado sikuk pun nyo tahuko, malaikat-malaikat de serga jugo hopi, Sang Anak pun hopi, hambuk Sang Bepa bae. 37 Samo upa nyo terjedi tekalo zaman Nuh, upa iyelah pula kedetongon Anak Mendesio nak terjedi. 38 Sabab, upa tekalo hari-hari sebolum air bah, mike makon ngan minom, kawin ngan dekawinko, sampoi tekalo hari Nuh masuk kedelom bahtera. 39 Ngan, mike hopi memahaminye sampoi aek bah njongok ngan melenyapko mike segelo; upaiyelah jugo kedetongon Anak Mendesio nak terjedi. 40 Mengka, nak ado dua urang de huma, nyo sikuk nak deambek ngan nyo sikuk de tinggalko. 41 Dua betina nak menggileng de nempat betu kilangon, nyo sikuk nak de ambek ngan nyo sikuk nak de tinggalko. 42 Ulenyo iye, bejego-jegolah ule kowe hopi tohuko hari ap Tuhanme nak njongok. 43 Hambuk, ketahuilah bahwa munye tuan rumah sodah mengetahui kapan, tekalo waktu malom, sipemaleng nak njongok, enye nak bejego-bejego ngan hopi nak nguyuko rumahny de bongkar. 44 Ule kerana iye, kowe jugo harus siap sedio ulenyo Anak Mendesio njongok singgo waktu nyo kowe hopi mendugonye.
(Hambo nyo Setia ngan Hambo nyo Jahat)

45 “Mengka, siapolah hambo nyo setio ngan bijaksana, nyo tuannye angkot pucuk seluruh rumahnye nak membori mike makonon singgo waktu nyo tepat? 46 Deberkatilah hambo iye, nyo tekalo tuannye njongok, tuannye iye mendepoti Enye sedang begawai demikion rupa. 47 Sajo sungguh, Ake buik ngan kowe bahwa tuan iye nak mengangkot hambonye iye pucuk segelo miliknye. 48 Hambuk, munye hambo nyo jahat iye buik delom hatinye, ‘Tuanke pi jedi njongok,’ 49 Mengka enye mulai ngepuki hambo-hambo nyo loin, mengka makon ngan minom serompok dengan nyo mabuk; 50 Tuan deri hambo iye nak njongok tekalo hari enye hopi mengharopkonye ngan tekalo waktu nyo hopi enye ketahui, 51 Ngan nak memancungnye, ngan menempatkonye eny serompok urang-urang munafik. Detempat iye, nak ado tangeson ngan kertak gigi.