22
(Perumpamoon Tentang Urang Nyo De undang ke Pesta Pernikahon)

1 Yesus buik lagi kenempat mike delom perumpamoon-perumpamoon, ujo-Nye, 2 “Kerajaon Serga depot deumpamako upa seurang rajo nyo mengadako pesta perkawinon untuk anak jentonnye. 3 Ngan, enye menyuruhko padong hambonye untuk memantou urang-urang nyo sodah de undang ke pesta iye, hambuk mike hopi endok njongok. 4 Mengka, rajo nyuruhko lagi hambo-hambo nyo loin, ujonye, ‘Gerahkolah kenempat urang-urang nyo deundang, Koleko, ake sodah mempersiapko hidangonke. Lembu-lembu jenton ngan ternak-ternak gomok segelo nyelah de semboleh, ngan segelonye sodah siap. Njongoklah keperjamuan kawin nie.’ 5 Cuma hambuk, mike mengabaiko ngan pogi, nyo sikuk ke humanye, nyo loin ke usahanye, 6 Ngan nyo loinnye menangkop hambo-hambo rajo iye, menyikso, ngan membunoh mike. 7 Mengka, sang rajo bemarah, ngan mengerem tentara-tentaranye, membinasoko pembunoh-pembunoh iye, ngan menunu kota mike. 8 Mengka, enye buik kenempat hambo-hambonye, ‘pesta perkawinon sodah siap, hambuk urang-urang nyo de undang iye hopi layak. 9 Uleh kerana iye, pogilah kejelon-jelon rayo ngan undanglah seberape lobot urang nyo depot kou tomui kepesta perkawinon nie.’ 10 Mengka, hambo-hambo iye pogi kejelon-jelon ngan mengumpulko segelo urang nyo mike tomui, nyo beik ngan nyo jahat. Ngan, tempat perkawinon iye de penuhi dengan padong tamu. 11 Cuma hambuk, tekalo rajo masuk nak betomu dengan padong tamunye, enye ngoleh seurang de sane, nyo hopi menyarungko pakoyon nak pesta perkawinon. 12 Enye buik ngan mike, ‘Dulur, upamone kowe pacok masuk ke maie hopi memakoi pakoyon nak pesta perkawinon?’ Ngan, urang iye tediom. 13 Sesodah iye rajo iye buik kenempat hambo-hambonye, ‘kobotlah tangon ngan kakinye, ngan tohukkolah enye ke delom kekolomon nyo paleng luor. De sane akan ado ratopon ngan kertak gigi.’ 14 Sabab, lobot nyo de pantou, hambuk nyo sediket nyo de peleh.”

(Usaha Pemempen Yahudi nak Menjebak Yesus)

15 Sodah iye, urang-urang Farisi bejelon ngan sekongkol enggak konyo enye depot menjorot Yesus dengan pembuikon-Nye. 16 Ngan, Mike mengutus murid-murid mike kenempat Yesus, serompok dengan urang-urang Herodian. Mike buik, “Guru, kamie tahuko bahwa kowe jujur ngan mengajarko jelon Allah delom kebonoron. Kowe hopi takut ngan siape pun ulenyo kowe hopi mengoleko rupa. 17 Munye mumunye, kehatokolah pendepot-Me kenempat kamie. Ibo debonorko nak membayar pajak kaisar apo hopi?”

18 Cuma hambuk, Yesus tahuko kejahoton mike ngan buik, “Mengka kowe mencuboi Ake, hai munafik? 19 Tunjukkolah ngan Ake duit nak untuk pajak iye.” Mengka. mike menyerahko sekepeng dinar kenempat Enye. 20 Ngan, Enye buik kenempat mike, “Gambar ngan tulison siapekah nie?”

21 Mike menjawab, “Kaisar.” Kemudian, Yesus bekehato kepado mike, “Uleh sabab iye, bayarlah kepodo kaisar hal-hal milik Kaisar, ngan kepodo Allah hal-hal nyo adolah milik Allah.” 22 Tekalo mendongornyo, mike temanga-manga, ngan meninggako-Nye ngan bejelon.
(Usaha Urang Saduki untuk Menjebak Yesus)

23 Tekalo hari nyo samo, urang-urang Saduki, nyo buik bahwa hopi ado kebangketon, njongok kenempat Yesus ngan betanyo kenempat Enye. 24 Mike buik, “Guru, Musa buik bahwa munye seurang jenton teelek ngan hopi mempunyoi anak, dulur jentonnye arus mengawini bininye ngan menerusko keturunon bage dulurnye nyo teelek iye. 25 Kinie, ado tujuh bedulur de antaro kamie. Nyo pertamo kawin, ngan telek hopi ado anak, ngan meninggalko bininye bage dulurnye. 26 Upa iyelah juga dengan nyo kedua, nyo ketiga, sampoi nyo ketujuh. 27 Aher deri segelonye, betina iye jugo teelek. 28 Tekalo hari kebangketon, betina iye menjedi bini siape deri ketujuh bedulur iye? Sabab, mike segelo la mengawininye.”

29 Cuma hambuk, Yesus nyimbot ngan buik kenempat mike, “Mike tesosot, hopi tereti Kitab Suci ataupun kuaso Allah. 30 Sabab, tekalo hari kebangketon, mike hopi kawin atau pun dekawini, cuma upa malaikat-malaikat de serga. 31 Hambuk, mengenai kebangketon urang-urang teelek, bolumkah kowe membeco apa nyo dekehatoko ngan kowe uleh Allah, 32 ‘Akelah Allah Abraham, Allah Ishak, ngan Allah Yakub’? Enye bukon Allah urang nyo teelek, meloinko Allah urang nyo hidup.”

33 Tekalo urang lobot mendongor hal iye, mike temanga-manga terhadop pengajoron-Nye.
(Hukum Monekah nyo Paleng Penteng)

34 Cuma tekalo urang-urang Farisi mendongor bahwa Yesus lah membuat urang-urang Saduki tediom, bekumpullah mike. 35 Mengka, sikuk deri mike, seurang ahli hukum Torat, betanyo kenempat Yesus untuk menguji-Nye, 36 “Guru, perentah monekah nyo terpenteng delom hukum Torat?”

37 Ngan, Yesus buik nga enye, “Kowe harus mengasehi Tuhan Allahme dengan segenap hatime, ngan dengan segenap jiwome, ngan dengan segenap pekeronme. 38 Nie adolah perentah nyo sajo godong ngan nyo pertamo. 39 Nyo kedua adolah upa nie, ‘Kowe harus mengasehi sesamome upa badanme dewek.’ 40 Delom kedua perentah nie, tergentung segelo Hukum Torat ngan kitab padong nabi.”
(Pertanyoon Tentang Mesias)

41 Kinie, sementaro urang-urang Farisi bekumpul besamo, Yesus betanyo kenempat mike, 42 “Upamone pendepotme tentang Kristus? Anak siapekah Enye?” MIke bekehato kepaodo-Nye, “Anak Daud.”

43 Enye bekehato kenempat mike, “Munye upa iye, upamonelah Daud, delom Roh, memantou-Nye ‘Tuan’, ujonye, 44 ‘Tuhan berfirman kenempat Tuanke, “Duduklah de sebelah kanon-Ke, Sampoi Ake menempatko musuh-musuh-Me de bewoh kaki-Me.”’? 45 Munye Daud memantou Kristus upa ‘Tuan’, upamone mungkin Enye adolah anak Daud?” 46 Hopi seurangpun nyo depot menjawob sikuk kehato pun ngan Enye. Ngan, sejak ari iye, hopi ado urang nyo berani menayoko pertanyoon-pertanyoon lagi ngan Enye.