19

¹ Tekalo Yesus sodah menyelesaiko pembuikon-pembuikon nie, Enye bejelon deri Galilea ngan sampoi dewilayah Yudea, de seberang sungoi Yordan. ² Ngan, kerumunon godong urang lobot mehaloui-Enye, ngan Enye menyombuhko mike de sane.

³ Beberape urang Farisi njongok kenempat Yesus untuk mencuboi Nye ngan betanyo, “Mengka de bonorko bage jenton -jenton untuk sarok ngan bininye dengan berbagai aloson?”

⁴ Mengka, Yesus nyimbot ngan buik, “Ibo kowe hopi membeco behwo Enye, nyo menciptako mike sejak tekaloe, menjediko mike jenton ngan betina, ⁵ ngan Enye berfirman, ‘ulenyo iye, jenton ngan betina harus meninggalko bepaknye ngan induknye, ngan menjedi sikuk dengan bininye, ngan keduanyo iye menjedi sikuk badan?’ ⁶ Jedi, mike bukon lagi duo, meloinko sikuk badan. Ulenyo iye, ape nyo sodah depersatuko Allah, mendesio hopi boleh memisahkonye.”

⁷ Mike bekehato ngan Yesus, “Mengka, upa mone Musa memerentahko untuk memboriko surat sarok ngan menyarokko bini?”

⁸ Yesus buik ngan mike, “Ulenyo kekarason hatime, Musa mengizinko kowe besarokon ngan binime. Cuma hambuk, tekalo awalnye hopi mumunye. ⁹ Ngan, Ake ngehatoko dengan kowe behwo siape nyo sarok ngan bininye, kecuali ulenyo zina, mengka kawin dengan betina loin, enye bezina.”

¹⁰ Murid-murid buik ngan Enye, “Munye upa nie hal nye laki dengan bininye, lobih beik hopi kawin.”

¹¹ Hambuk, Yesus buik ngan mike, “hopi segelo urang depot menerimo pembuikon nie, kecuali mike nyo dekaruniai. ¹² Sabab, ado nyo hopi kawin ulenyo memang laher upa iye deri rahim induknye, ngan ado urang nyo kawin ulenyo demandulko oleh urang loin, ngan ado urang jugo nyo mandul nyo memandulko badannyo dewek demi kerajakon Serga. Barang siape nyo depot menerimo hal nie, biarlah enye menerimonye.”

(Yesus ngan budak-budak kecik)

¹³ Mengka, beberape budak kecek deunda kenempat Enye enggak konyo Enye pacok memotekko tangonNye pucuk budak-budak iye ngan mendoako mike. Cuma hambuk, murid-murid nyerediko urang-urang iye. ¹⁴ Cuma, Yesus buik, “biarkolah budak-budak kecek iye. Jengon menagahi enye njongok kenempat-Ke sabab Kerajakon Serga adolah milik urang-urang nyo upa budak -budak kecek nie.” ¹⁵ Sesodah Yesus memotekko tangon-Nye pucuk budak-budak iye, Enye bejelon deri iye.

(Upamone Buleh Hidop Kekal)?

¹⁶ Mengka, njongoklah urang kenempat Yesus ngan betanyo, “Guru, hal beik apo nyo harus kulakukoe enggo konyo mendepot hidup nyo kekal?”

¹⁷ Ngan, Yesus buik kenempat urang iye, “Mengka kowe betanyo ngan Ake tentang upamone nyo beik eh? anyo ado sikuk nyo beik eh. Cuma, munye kowe endok masuk ke delom hidup, taatilah perentah-perentah iye.”

¹⁸ Urang iye betanyo ngan Yesus, “perentah nyo mone?” ¹⁹ Hormatilah bepakme ngan indukme, ngan kasehilah sesamomu mendesio upa badanmu dewek.”

²⁰ Urang muda iye buik ngan Enye, “segelo tong iye la sodah kutaati, ape lagi nyo kurange?”

²¹ Yesus buik ngan enye, “munye kowe amat sempurno. pogilah ngan juallah segelo nyo kou miliki. Mengka, borikolah kenempat urang miskin, ngan kowe bakal memiliki reto de serga, ngan maro haloulah Ake.” ²² Cuma, tekalo urang muda iye tedongor pernyataon nie, enye bejelon dengan sedih sabab enye sajo sugih.

²³ Mengka, Yesus buik ngan murid-muridNye, “Ake ngehatoko nyo sebonornyo ngan kowe, sajo behela bage urang sugih nak masuk kedelom Kerajaon Serga. ²⁴ Sekali lagi, Ake ngehatoko ngan kowe bahwa lagi murah lah seikuk unto nak melewati lubang jerum deripado urang sugih masuk kedelom Kerajaon Allah.”

²⁵ Tekalo padong murid mendongor pembuikon iye, mike sajo tetemanga-manga, ngan buik, “Munye mumunye, siape nyo pacok de selamotkoe?”

²⁶ Sambel ngelalo mike, Yesus buik, “Munye ujo mendesio, tong nie mustahil, cuma munye ujo Allah, segelo tong nie mungkin.”

²⁷ Mengka, Petrus buik ngan Enye, “Kolekolah, kamie sodah meninggalko segelonye ngan mehaloui Kowe. Jedi, ape nyo bakal kami terimo?”

²⁸ Ngan, Yesus buik ngan mike, “Ake ngehatoko nyo sebonornye ngan kowe bahwa kowe, nyo mehalou Ake delom denia nyo beheru, tekalo Anak Mendesio duduk de tahta ke godongon-Nye, kowe jugo bakal duduk de pucuk dua belas tahta nak menghakimi kedua belas suku Israel. ²⁹ Ngan, setiap urang nyo sodah meninggalko rumah, dulurnye jenton, dulurnye betina, bepak, induk, anak-anak atau humahnye uleh kerana namo-Ke bakal nerimo seratus kali lipot ngan bakal mewarisi hidup nyo kekal.

³⁰ Cuma hambuk, lobot urang nyo pertamo bakal menjedi nyo kendion, ngan nyo kendion bakal menjedi nyo pertamo.”