20
(Perumpamoon tentang Padong Pekerejo Kebon Anggur)

1 “Sabab, Kerajaon Serga adolah upa pemilik kebon nyo pagi -pagi sekali nak ndelok pekerejo-pekerejo bage kebon anggurnye. 2 Tekalo iye sodah sepakat dengan padong pekerejo untuk sedinar seari, nye menyuruhko mike kekebon anggurnye. 3 Ngan, kiro-kiro tekalo jam tiga nye bejelon ngan ngoleh nyo loinnye sedang togok nganggur de tempat umum. 4 Mengka, enye bekehato ngan mike, ‘kowe, bejelonlah jugo ke kebon anggur ngan ape nyo pantas nak kuboriko ngan kowe.’ Ngan mike pun bejelon. 5 Sekali lagi, sekitar jam enom ngan jam sembilan iye bejelon ngan melakuko hal nyo samo. 6 Ngan, kiro-kiro tekalo jam sebelas, nye bejelon ngan menomuko nyo loin sedang togok ngan enye buik ngan mike, ‘mengka kowe togok de sie menganggur sepanjong hari?’

7 Mike buik ngan enye, ‘ulenyo bolum ado nyo memperekerejoko kamie.’ Pemilik kebon iye buik ngan mike, ‘kowe, pogilah jugo ke kebon anggurke.’

8 Tekalo hari sodah mulai malom, pemilik kebon iye buik ngan mandur nye, ‘Pantoulah padong pekerejo ngan bayarlah ngan enye upah nye, de mulai dengan nyo teaher sampoi nyo pertamo.’ 9 Tekalo mike de pekerjoko tekalo jam sebelas, njongok, masing-masing urang menerimo 1 dinar. 10 Tekalo mike de pekerejoko pertamo kali, njongok, mike mengiro nak nerimo lobih lobot. Cuma, mike masing-masing jugo nerimo 1 dinar. 11 Tekalo nerimonye, mike memprotes kenempat pemilik kebon.

12 Mike buik, ‘Urang-urang nyo masuk teaher anyo bekerejo selamo 1 jam, ngan kowe membuat mike samo dengan kamie, nyo sodah menanggung bobon ngan hangot poang seari-ari.’

13 Cuma hambuk, pemilik kebon iye menjawab ngan buik kenempat deri mike, ‘Dulur, ake hopi besaloh ngan kowe. Bukonkah kowe la sodah sepakot dengan ake untuk sikuk dinar? 14 Ambeklah, milikme ngan pogilah, cuma ake amat mboriko ngan urang nyo kendion nie, samo upa ngan kowe.

15 Ibo ake hopi debonorko untuk melakuko apepun nyo ku amatko terhadap milikku dewek? atau, mengka matome jahat ulenyo ake beik?’ 16 Jedi, nyo kendion bakal menjedi nyo pertamo, ngan nyo pertamo bakal menjedi nyo kendion.”
(Yesus Buik Lagi tentang Kemation-Nye)

17 Tekalo Yesus nak bejelon ke Yerusalem, Enye ngunda dua belas muridNye secaro bepecah. Delom pejelonon, Enye buik ngan mike, 18 “Koleko, kite sedang menuju Yerusalem ngan Anak Mendesio bakal deserahko kenempat imam-imam kepalo ngan ahli-ahli Torat. Mike bakal menghukum-Nye dengan kemation. 19 Mengka, mike bakal nyerahkonye Enye kenempat bengeso-bengeso loin bakal mengucak, mencambuk, ngan menyalibko-Nye. Ngan, singgo hari ketiga, Enye nak debangketko.”
(Permohonon Induk deri Anak-aAnak Zebedeus)

20 Mengka, induk deri anak-anak Zebedeus ngan anak-anaknye njongok kenempat Yesus ngan sujud nak meminta sesuatu kepodo Yesus. 21 Ngan, Yesus buik kenempat Enye, “ape nyo kou amatko?” Induk iye menjawab, “Perintahkolah supaya kedua anakke buleh duduk delom kerajoon-Me, sikok de sebelah kanan-Me ngan sikok de sebelah kiri-Mu.”

22 Cuma hambuk, Yesus nyimbot, “Kowe hopi tereti ape nyo kou pintak. Ibo kowe sanggup minom deri cawan nyo nak kou minom?” Mike buik ngan Yesus, “Ao, kamie sanggup.”

23 Yesus sebuik ngan mike, “Kowe memang nak minom deri cawan ke, cuma nak duduk de kanonke atau de kirike, bukon hak-Ku mborikonye, meloinko untuk mike nyo la desiapko uleh Bepak-Ke.”

24 Tekalo sepuluh murid nyo loin ndongorkonye, mike bemarah ngan kedua dulur iye. 25 Hambuk, Yesus mantou mike ngan buik, “Kowe tahuko bahwa padong penguaso bengeso-bengeso loin memerentah pucuk mike, ngan urang-urang godong mike menjalonko wewenang pucuk mike. 26 Seharusnye hopi mumunye de antaro mike, cuma siape nyo amat menjedi godong de antaro mike, nye harus menjedi pelayanme. 27 Ngan, siape bae nyo amat menjedi nyo pertamo de antaro mike, nye harus menjedi hambome, 28 Samo upa Anak Mendesio nyo njongok bukon untuk delayani, meloinko untuk melayani ngan memboriko nyawo-Nye sebagai tebuson bage lobot urang.”
(Dua Urang Buta Desembuhko)

29 Ngan, tekalo mike meninggalko Yerikho, kerumunon godong urang mehaloui-Nye. 30 Ngan, dua urang buta nyo sedang duduk de pengger jelon, tekalo mendongor bahwa Yesus lewat, mike beseru, “Tuhan, Anak Daud, kasihanilah kamie!” 31 Urang lobot menegur mike enggak konyo mike diom. Cuma hambuk, mike semakin bias mekek, “Tuhan, Anak Daud, kasihanilah kamie!”

32 Mengka, Yesus berenti ngan memantou mike. Enye buik, “apenyo kou amatko Ake lakuko untuk kowe?” 33 Mike buik ngan Enye, “Tuhan, kamie amat mato kamie de bukakko.” 34 Yesus tegerak sajo tesihan ngan mike, ngan menjamah mato mike, ngan seketiko iye jugo mike menerimo pengolehonnye belek, ngan mehalou Yesus.