¹ Irahudita Deuxu Tyhyhykỹ rarybere Noe-ò: —Maloke bera heòtyro-ò, kai kia ibutumy ariòre boho wana, kiemy dori-diarỹ umy rabire kai sohoji iny ki aõ òbitimy tewinymyhỹte. ² Ixihemy bidykre debò inatxi sõe my ihãbu-di ihãwyy-di iròdu òtaòta wiwihikỹ. ³ Kia bidylekre debò inatxi sõemy ihãbu-di ihãwyy-di nawii òtaòta, kia iròdu òtaòta su ki rỹimyhỹrenyre rexijuarenykremy. ⁴ Kiemy dori debò inatxi txu rimykreu-diarỹ biu aritòradỹỹnykre 40 txumy 40 rumy. Kawesemy tahe arihukre ibutumy aõnaõna irumy rỹimyhỹre kia rewinyrenyre wahe. ⁵ Kia Noe riwinyre ibutumy tuu Deuxu tamy rarybere mynamy. ⁶ Noe 600-my iwyra kia iu biulòrahãkỹ suu ritỹmynyreu. ⁷ Kia biulòrahãkỹ ribi rahenykremy, tii ralore bera heòtyro-ò tariòre boho wana butumy, tahãwyy wana kia tariòreriòrese boho wana. ⁸ Iròdu mahãdu wiwihikỹ kia iròdu mahãdu binabinahãkỹ, kia su my rexirurehemyhỹrenyre kia nawii mahãdu ⁹ ralòrenyre Noe wana bera heòtyro-ò inatxi inatximy, hãbu kia hãwyy, timybo Deuxu rarybere mynamy. ¹⁰ Txuu debò inatxi sỹtybymy, biulòrahãkỹ bee ritỹmynymy rare suu. ¹¹ Kia kabedeu Noe 600-my iwyra. Kia 17-my txuu inatxi ahãdu bedeu kia ròaròare ibutumy bera nihikỹ òlòna, kiata biuwetyy ijaniela rarayrenyre, ¹² kia biulòra rejujumyhỹ sutyre 40 txumy 40 rumy. ¹³ Kia ka txuutyhyle Noe kia tahãwyy wana rirònyrenyre bera heòtyro-ò tariòre boho wana ibutumy Sem, Cam kia Jafe kia ihãwyyreny tule. ¹⁴ Iki wana iròdu mahãdu òtaòta rirònyrenyre: iròdu heto my rỹimyhỹre kia iròdu bederahymy rỹimyhỹre, kia iròdu su my rexirehemy rỹimyhỹre kia nawii mahãdu. ¹⁵ Ibutumy iròdu mahãdu rirònyrenyre Noe wana bera heòtyro-ò, inatxi inatximy. ¹⁶ Rirònyrenyre hãbu kia hãwyy sohoji iròdu òtaòta, kia Deuxu tarybe riwahinyre mynamy Noe riwnykremy. Tai Deuxu Tyhyhykỹ ritybònyre bera heòty ijotobona. ¹⁷ Biulòra-di bede rỹire 40 txumy. Kia bee raòwònyre kia bera heòty làmamy rỹire, kia tii rawetòrubumyhỹ. ¹⁸ Kia bee raòwònymy rare, kia bera heòty rawetòrubuhyymy rare. ¹⁹ Kia bee sõemy raòwònyre kia ibutumy su my hãwãlò rariehekỹ rỹimyhỹre ritỹmynyre. ²⁰ Kia irahudi ixyby debò inatxi metros my raòwònyre. ²¹ Rururenyre ibutumy iròdu mahãdu irumy rỹimyhỹrenyre su my, kia heka, nawii mahãdu, iròdu mahãdu heto my rỹimyhỹrenyre, iròdu mahãdu bederahymy rỹimyhỹrenyre, iròdu mahãdu su my rexirurehemy rỹimyhỹrenyre kia iny mahãdu. ²² Rurure ibutumy su my aõ rỹimyhỹrenyre, ibutumy irumy raelewesenanymyhỹrenyre. ²³ Noe sohojile kia iki wana bera heòtyro ki ratximyhỹrenyle irumy ratxirenyre. Iuhe mahãdu tahe rexihurenyre, kia heka, iny mahãdu, iròdu mahãdu heto my rỹimyhỹrenyre, iròdu mahãdu bederahymy rỹimyhỹrenyre kia iròdu mahádu su my rexirurehemy rỹimyhỹrenyre kia nawii mahãdu. ²⁴ Kia 150 txumy bede rỹire sỹtybymy kia bee ruỹmy rare.