¹ Ibuna kimfumu ki mazulu kina kifuanana ye ba muensi kumi bo babaka muinda miagu bayenda mu kukutana ye yakala di longo. ² Ba batanu gana kati kibagu bakala bilawu, ye ba bakala ngangu. ³ Ba bilawu, bu ba baka muinda miagu, ka babaka ko mafuta kumosi ye bagu. ⁴ Kansi ban'kua ngangu babaka, kumosi ye muinda miagu, mafuta muna kibungu. ⁵ Bukina nde yakala di longu gu nanga, bakulu banimba ye ba leka. ⁶ Muna kati kimpimpa, ba boka: tala yakala di longu, nda luenda ku kutana ye yani! ⁷ Buna ba muensi bakulu ba vumbuka, ye bayidika muinda miagu. ⁸ Ba bilawu ba zayisa ku ba gu bakala ngangu: lu tu gana ndambu yi mafuta menu kadi minda mietu mi tazima. ⁹ Bagu ba bakala ye ngangu ba vutula: nkatu, si ka makala ma mbidi ko mudiambu betu ye benu; nda luenda bulutidi mboti ku bagu ba ta teka magu, ye lusumba mudiambu di benu. ¹⁰ Muntangu bekedi kuendanga mu kusumba, yakala di longu kumini; bagu ba bakala ba kubama bakota kumosi ye yani muna kati ki seka di longu ye kielu kikangama. ¹¹ Kunima ntangu, ba miensi ban'kaka bayisa, ye ba samuna Mfumu, Mfumu, gu tu zibudila. ¹² Kansi gu vutula: yi ta lutela bo, kiluzeyi ko. ¹³ Luyingila, kadi ka luzeyi ko kani kilumbu, kani ntangu. ¹⁴ Si bukala bonso muntu mosi gu yenda mu ndenga, gu bokila ba n'sadi bani, ye gu ba gana mvuilu'ani. ¹⁵ Gu gana talanta tanu ku yu mosi, zodi ku yun'kaka, ye dimosi ku yu tatu, ku konso muntu bonso buna kikesa kiani, ye gu yenda. ¹⁶ Muna ntangu yina yani gu baka talanta tanu; gu yenda, gu butisa dio ye gu baka talanta tanu zi n'kaka. ¹⁷ Yi buabuna, yani gu baka talanta zodi gu baka zi zodi zi n'kaka. ¹⁸ Yani yu gu baka kaka dimosi gu ye ganga gundu muna ntotu, ye gu sueka mbongu zi mfumu'ani. ¹⁹ Kunima ntangu yinda, Mfumu gu ba n'sadi gu vutuka, ye gu tala kisalu ki muntu ye muntu. ²⁰ Yani yu gu baka talanta tanu gu finama ye gu nata talanta tanu zi n'kaka, ye gu samuna: Mfumu gu ngana talanta tanu; tala mbakidi zi tanu zi n'kaka. ²¹ Ye Mfumu'ani gu n'tela: bumboti n'sadi, gu mboti ye gu kuikama; gu kala gu kuikama mu bima binduelu, si yi kugana bima bimbidi. ²² Yani yu gu baka talanta zodi gu finama diaka, ye gu samuna: Mfumu gu ngana talanta zodi; tala, mbakidi zi zodi zi n'kaka. ²³ Mfumu'ani gu n'tela: bumboti n'sadi gu mboti ye gu kuikama; gu kala gu kuikama mu kima kinduelu, si yi kugana bima bimbidi; kota mu nkembu gu Mfupmu'aku. ²⁴ Yani yu gu baka talanta dimosi gu finama ku nima ye gu samuna: Mfumu yizaya nde ngeyi guna muntu gu mambu ma ngolu, gu yonsikanga gana ga kukunini ko. ye gu lokutanga gana gu ku sakuedi ko, ²⁵ Yimona kititu, yi yenda zika talanta diaku muna ntotu; tala baka kikina kingeyi. ²⁶ Mfumu'ani gu m'vutudila: n'sadi gu mbi ye molu, gu zaya nde yi yonsikanga ga kikunini ko, ye yi lokutanga gana ga kisakuedi ko; ²⁷ Nga buna bufuana nde gu gana mbongu zamu ku nlundi mbongu, ye mu mvutuk'amu, nga yi gola kikina kimunu ye nluta. ²⁸ Lunkatula buna talanta ye lugana diagu ku yuna guna ye ma talanta kumi. ²⁹ Kadi si bagana ku yani vuidi, ye si kakala ye ku fuluka, kansi ku yani kavuidi ko, si bakatula kani kima kina kavuidi. ³⁰ Ye n'sadi gu konda m'funu, lun'yeta muna mpimpa yi ku nganda, kuna si kukala bidilu ye nkuetisa yi menu. ³¹ Kina muana muntu sa kesa muna nkembu'ani, kumosi ye zi mbasi bakulu, si ka fonga gana kiti kiani ki nkembu. ³² Makanda makulu si bakala kimvuka ku ntual'ani. si kayambula bana ye ban'kaka, bonso m'vungudi mamemi gu gambulanga mamemi ye zi nkombu; ³³ Ye si katula mamemi ku koku ku kiyakala, ye zi nkombu ku koku ku kentu. ³⁴ Buna ntotila gu samuna ku bagu si bakala ku koku ku'ani ku kiyakala: nza luisa, lubaka luyalu lu kimfumu ki kilukubamana tuka luyantiku lu nza. ³⁵ Kadi yikala ye nzala, ye lungana madia, yikala ye kiwina ye lungana kunua, yikala nzenza ye luntambula; ³⁶ Ye yikala kinkonga, ye lu mvuika; yikala ye kimbefu; luyisi kuntala; yikala mu nzo nkodi, ye luyisa ku mbel'amu. ³⁷ Ban'kua masonga si bam'vutulula: Mfumu, nki ntangu tu kumona ye nzala, ye tukugana madia ko; go gu kala ye kiwina, ye tukugana masa ko? ³⁸ Nki ntangu tukumona nzenza, ye tukutambula; go ki nkonga, ye tukuvuika? ³⁹ Nki ntangu tukumona ye kimbefu, go mu nzo nkodi, ye tuyenda ku mbela ngeyi? ⁴⁰ Ye Ntinu si kabavutulula: yi takulutela bo mu kedika, konso ntangu yi lu gengi mana mambu ku yu gu mosi gana kati ki bagu bena ba nduelu mu ba mpangi zamu, ku munu nde lu gangidi buagu ⁴¹ Landila si katela ku bagu si bakala ku koku kuani ku kikentu: lunkatukila, bantu bena ye n'loku; nda luenda kuna tiya tukonda nsuka tu kubama mudiambu di matebu ye zi mbasi zani. ⁴² Kadi yikala ye nzala, ye kalungana madia ko; yi kala kiwina ye kalungana kunua ko; ⁴³ Yikala nzenza ye kaluntambula ko; yikala kinkonga ye kalumvuika ko, yikala ye kimbefu ye mu nzo nkodi, ye kaluyisi kuntala ko. ⁴⁴ Si bavutula diaka: Mfumu, nki ntangu tukumona gu kala ye nzala, go gukala ye kiwina, go nzenza, go kinkonga, go kimbefu, go mu nzo nkodi, ye katukufinama ko? ⁴⁵ Ye si kabavutulula: yi ta lutela bo mukedika, konso ntangu yi kalugengi ko mana mambu ku gu mosi gana kati kibagu bena banduelu; kumunu nde kalugangidi bo ko. ⁴⁶ Ye bobo si benda ku mpasi zi m'vu ya m'vu, kansi ban'kua masonga kuna luzingu lukonda nsuka.