¹ Nsuika bu wukuma, ba ngudi zi nganga bakulu ye ba mbuta zi bantu ba sala fongu mu diambu di Yesu mpasi ba ngonda. ² Bawu ba nkanga nsinga; ba nata ye ba yekula ku ya di Pilatu. ³ Buna, mu ntangu Yuda yu wu yekula Yesu bu ka mona nde Yesu banzengedi tumbu, wu mona kiadi ye wu vutula palata makuma tatu ku ba ngudi zi nganga ye ku ba mbuta, ⁴ ye tedi: « Monu ndeti masumu mu ku yekulamenga ma muntu kasadidi diambu ku.» Kansi bawu bantela: « Keti mana mambu ma betu? Mambu maku.» ⁵ Buna yani wu geta palata makuma tatu muna kinlongu wukatuka wutuka ye wu yenda ku kiketika. ⁶ Ba ngudi zi nganga ba baka mbongu ye basamuna:« Ka mboti ku mu tula mbongu zozu muna tulundilanga mi nkayilu kadi yoyu yintalu menga.» ⁷ Bawu ba sisana mpaka mu diambu dina ye mudiambu di mbongu, basumba zo ntotu bantu ba fuidingi mu ku zikilaba nzensa. ⁸ Mu diambu dina, ntotu wuna bagana go nkumbu:« Ntotu menga» Na te ye lumbu ki wunu. ⁹ Buna mambu masamuna Yelemia mbikudi ma lungana bukata:« Bawu ba baka makuma atu ma bisengu, yi ntalu yizolakana ku nkangu Yisayeli ¹⁰ Ye bawu bagana zina mu ntalu ntotu wu bafua, bonso mfomu kazayisila mawu.» ¹¹ Bubu Yesu wu natua ku ntuala yadi; ye yandi wu yufula Yesu: « Keti ngeyi ye ntinu ba Yuda yo?» Yesu wuvutula: « Ngeyi tedi mo.» ¹² Kansi muntangu ba mfunda ku ba ngudi zi nganga, ye ku ba mbuta zi bantu, yanikagana mvutuku. ¹³ Buna Pilatu wu ntela: « Keti ku ta waku mfundu miakulu bata funda mu diambu di ngeyi?» ¹⁴ Kansi Yesu ka vutula kani diambu di mosi ku, ye yani utoma yituka kibeni. ¹⁵ Tala kikala bonsu kifu kiawu mu lumbu ki nkinsi ya di kafueti yambulamuntu mosi wu boloku yu basolrdi ku nkangu. ¹⁶ Muna ntangu yina, muna boloku mu kala muntu wuzayakana ku bakulu, wu kala ye nkumbu Balabasi. ¹⁷ Buna, muntangu bakutakana, Pilatu wu ba yufula: « Nani zoledi yi luyambudila? Balabasi, kani vo Yesu yu ba bokidilanga Klistu?» ¹⁸ Kadi yani wuzaya nde bawu bayekula Yesu mu diambu di kimpala. ¹⁹ Muna ntangu yina ba vuanda gana kiti kimfundusu, nkentu ani wufidisa ma gogu wu kitela: « Ku sala diambu di mosi ku mu diambu di muntu yu ba neti mambuku; kadi mu mpimpa yi wunu monu ntomeni mona mpasi mu ndosi mu diambu di yani.» ²⁰ Buna mfumu ba nganga ye ba mbuta zi bantu ba zaayisa ku nkangu balomba Balabasi ye ba gonda Yesu. ²¹ Yandi wu bayufula: « Nani luzoledi mu ba bodi yiluyambudila?» Bawu ba samuna: « Balabasi» ²² Pilatu wu yufula ku bawu: « Nki yi sala ku Yesu yu ba bokibilanga Klistu» Bakula ba vutula: « Wunkoma.» ²³ Ye Pilatu wu zayisa: « Munki diambu, nki diambu ka sadidi yani?» Kansi bawu ba toma kaya diaka mu ngolu: « Wunkoma.» ²⁴ Buna Pilatu wa bakisa nde kasi kaa lenda diambu di mosi ku, buna bantu ba yantika vunguta, yani wubaka masa, wusukula moku mani ga ntuala nkangu ye wuta: « Monu kiena ye kikumaku mumenga ma muntu yoyu kondolu diambu. Lutala mana benu mosi.» ²⁵ Bantu bakulu basamuna: « Bika menga mani ma kala ku betuye ku bana betu.» ²⁶ Buna yani wu bayambudila Balabasi kansi wu zubisa Yesu mfimbu ye wu yekula mpasi ba nkoma. ²⁷ Binuani bi nyadi ba nata Yesu kuna nzila ye bakutikisa binuani biakulu. ²⁸ Bawu ba nkatula binkutu biani ye ba nvika kiyunga ki mbuaki. ²⁹ Bawu bayidika mpu yi nsendi, batula yo ku ntu ani ye batula nti gakoku kuani ku kitata. Bawu bafukama go ntuala yani, bayantika ku nsakinina mu samuna:« Mboti, ntinu bayudayo!» ³⁰ Ye bawu ba ntabudila mate, ba baka matutu ye ba nzuba gana ntu. ³¹ Buba manisa mukunsakinina, bawu ba nkatula kiyunga ki mbuaki, bamvutudila bi nkutu biani, buna bawu ba nata mpasi ba nkoma ³² Muntangu ba tuka, bawu bamona muntu mosi muisi Kileni numbu ani Simoni, bawu bankuamisa mu kuenda ye bawu mpasi kanata kulunsi di Yesu. ³³ Bawu ba kuma ga kifulu ki bokuluanga Golongota, disongidila « kigonsongolu ki ntu.» ³⁴ Bawu ba gana vinu ba salanga ye masa mankadi mpasi ka nua, kansi mu ntangu kameka, yani ka zola nua moku. ³⁵ Muntangu ba manisa mu kunkoma, bawu ba kabana binkutu biani mu kuta wadi. ³⁶ Ye bawu ba vonda ye bakesi kuntalanga. ³⁷ Ga zulu ntu ani, bawu ba tula diambu di banfudisa, basonika: « Yani yi Yesu ntinu wu bayudayo.» ³⁸ Mitibi miodi mi komua ye Yesu, yu mosi ku koku ku kitata ye yu mosi ku koku ku kimama. ³⁹ Ba bakesi lutanga ba kesi ku mfinganga mu kuningisa ntu miawu ⁴⁰ mu kusamuna: « Ngeyi wukesi tanga nde lendi bulumuna kinlongu ye tungudila kiomu bilumbu bi tatu, wu ki vulusa ngeyi kibeni! yo ngeyi yi muana Nzambi, wu kikatula gana kulunsi!» ⁴¹ Yi buna diaka, ba ngudi zi nganga ba nsakinina ye ba nsoniki ye ba mbuta zi bantu, ye ba kesi samunanga: ⁴² « Yani wu vulusa bantu bankaka kansi ka ta lendaku kakivulusa yani mosi. Yani yi ntinu Isayeli, ka kulumuka ga kulunsi ye buna betu si tukuikila mu yani. ⁴³ Yani wu kuikilanga mu Nzambi, bika Nzambi ka ntanina bubu go yani zoledi kadi yani wuta: « Monu yi muana Nzambi"». ⁴⁴ Ye muyibi wu komu ye yani, wu mfinga diaka bifingu bina. ⁴⁵ Muna ntangu yina, tuka mu ntangu sambanu na te ye ntangu vua, mpimpa yi bua mu nsi yakulu. ⁴⁶ Munbela ntangu vua, Yesu wu kaya mu ndinga ngolu ye wuta: « Eli, Eli, lama sabatani?» disongidila: « Nzambi amu, Nzambi amu mu diambu di nki wu ngiambuluedi?.» ⁴⁷ Muntangu ba bankaka ba kala gana bawa buna, bawu basamuna:« Yani Eliya katabokila.» ⁴⁸ Muna ntangu yina yu mosi mu bawu wulemuka ye wubaka taba, wutebisa dio ye vinu di nkadi, wuyula dio mu tutu ye wugana mpasi ka nua. ⁴⁹ Bankaka basamuna:«Wunyambula; tutala keti Eliya si kesi ku nvulusa:» ⁵⁰ Yesu wu kaya diaka mu ndinga ngolu ye wu vutula moyu ani. ⁵¹ Tala nledi mi nza kinlongu mi pasuka mu ndambu zodi tuka ku na zulu na te ye gana ntotu. Ntotu wu nikuka ye matadi mapasuka. ⁵² Maziami mazibuka ye nitu zi bakinlongu ba ziama zi futumuka. ⁵³ Bawu batuka mu maziami ku nima futumuka yi Yesu, bakota mu mbansa yi nlonguye kunima bamonika ku bantu ba mbidi. ⁵⁴ Mu ntangu mfumu binuani ye bawu ba kesi talanga Yesu ba mona ndikununu yi ntotu ye mambu ma maluta, bawu ba toma mona bunkuta ye basamuna:« Munkala yani wu kesi muana Nzambi.» ⁵⁵ Ba kentu ba mbidi balanda Yesu tuka kuna ngalili mpasi ba sadisa bakala gana, bakesi tadilanga ku ntama. ⁵⁶ Gana kati ki bawu, gakala Madiya muisi Mangadala, Madiya ngudi Yakobi ye Yosefi; ye ngudi bana ba Zebedayi. ⁵⁷ Nkokila buyikuma, ga luaka muntu mosi wu mvuama wu muisi Alimataya, nkumbu ani Yosefi yu wu kala diaka nlongoki Yesu. ⁵⁸ Yani wufinama ku Pilatu ye wu lomba nitu Yesu. Ye Pilatu wu gana luve mpasi bagana nitu Yesu. ⁵⁹ Yosefi wu baka nitu, wu zinga yo nledi mi mialinumi mboti. ⁶⁰ Ye wutula yo muna bulu di yani mosi di mpa di ba timunanisa mu matadi. Kunima, yani ukindumuna tadi di neni gana muelu wu maziami ye wu yenda. ⁶¹ Madiya yu muisi mangadala ye Madiya yu wu nkaka bakala gana, bavuanda gana ntuala maziami. ⁶² Lumbu ki landa ki kikala lumbu ki kilanda nkubukulu, ba ngudi zi nganga ye ba falisi ba kutakana ga ntuala Pilatu. ⁶³ Bawu basamuna,:« Mfumu betu tu bambukidi mbundu nde mu ntangunzibakisi yoyu ba kesi mu luzingu, yani wu samuna:" Kunima bilumbu bi tatu, monu si yi futumuka mu bafua." ⁶⁴ Yidina tuma mpasi bantu batala maziami nt te ye bilumbu bi tatu. Go nkatu banlongoki bani balendi kuisq ye ku katula ye zayisa ku bantu:" Nde yani futumukini mu ba fua," buna nzibukusu yina si yi lutila yina yi nteti.» ⁶⁵ Pilatu wu batela: « Lubaka nkengi mosi. Luenda lutoma keba bonsu buna si lulendila.» ⁶⁶ Bawu bayenda ye ba keba maziami, batoma tula tadi ye ba sisa minkengi.