¹ Yesu yinjira mu lyaro, ni yambukha, natukha mu mu litaala lyelye mwene. ² Khaandi, hensa va mulerera mundu yafwokoya nali khu shitali: Na Yesu lwa yalola lisuuvira lyavo, yavolera mundu yafwokoya woyo: "Mwana wanje, suvira, vwoni vwovwo vu vulekhwerwe.

³ Hensa, valala khu vahandichi vavolerana vene khu vene, "mundu wuyu anyeka Nyasaye." ⁴ Na Yesu shichira yamanya tsinganakani tsyavo, yavavolera, shichira shina mukanakananga vutamanu mu myoyo chyenyu? ⁵ Ni lili hena lili litoro, khuvola, 'Uvererwe vwoni vwovwo,' anoho khuvola, 'sinjira uchende'? ⁶ Navutsa Khumutukhe khumanya Mwana wu Mundu ali nu vunyali mu liirova vwu khulekhera vwoni ----" Yavolera mundu yali yafwokoya, "sinjira, vukula shitali shyoshyo, na utsi munsu mwomwo. ⁷ Na mundu yali niyafwokoya woyo yasinjira natsya munsu mwemwe. ⁸ Navutsa lwa shituma shyalola yako, vali nilichenya, ni vakhuminya Nyasaye ya hana vunyali khuli yuvu khu vandu. ⁹ Lwa Yesu yavirha khurhula hawene yaho, yalola mundu musatsa yalangwangwa Matayo niyikhale munsu ya vasololeramu vusuru, namuvolera, "Nonda," Neye yasinjira vwangu na mulonda.

¹⁰ Lwa Yesu yikhala munsu khulya, hensa vasololi vu vusuru vanyikhi na voni vitsa khaandi nivalya halala na Yesu na vechitswi veve. ¹¹ Lwa vafarisayo valola ndyo, varheva vechitswi va Yesu, shichira shina Mwechitsi wenyu asanganga shyukhulya na vasololi vu vushuru khaandi na voni?

¹² Lwa Yesu yahulira ndyo ya va volera, "Vandu vali valamu shivenya mushirikhi tawe, navutsa valwale navo venyanga mushirikhi. ¹³ Navutsa mutsi mweke shivune shya mang'ana yaka: Kavolanga, 'Ndenya tsimbavasi, navutsa vihanwa vyi visiuviriro tawe.' Shichira shinditsa khulanga valunji tawe, navutsa khulanga voni vikanire."

¹⁴ Khaandi vechitswi va Yuhana vitsa khuye ni va murheva, shichira shina khutse na vafarisayo khuhonga vuchira khulya vuli khase navutsa vechitswi vovo shivahongakhu vuchira khulya tawe?

¹⁵ Yesu yavarhevulira, vacheni vu musatsa aserere mwiha vanyala khuverera musatsa mwene woyo naliho? Navutsw matukhu kitsanga, ku musatsa yaserera mwiha yitsa arhulitsweho, nalwo lwa vali honga vuchira khulya. ¹⁶ Shyukhuliho nu mundu anaviranga shiraka shihya khu inguvu ikhulu, shichira shiraka shihya shililinga a shirandule inguvu yene yeyo, nayo ilarandukha vutamanu. ¹⁷ Khaandi vandu shivatsukhakhu idivai impya mu masero makhulu tawe. Nivakhola ndyo masero kene yako ka la rhulikha, idivai isundukhe yosi, ma masero konekhe: Navutsa vavikhanga idivai impya mu masero mahya, na vyosi vilalindwa.

¹⁸ Lwa Yesu yali navolanga makhuva yaka khuvo, hensa mwamihi mulala yitsa namwinamira imberi wewe. Navola, "Mwana wanje mukhana arhula khukhutsa lwene yulu, navutsa hamba uvikhe mukhono kwokwo khuye, naye alava mwoyo." ¹⁹ Na Yesu yasinjira na mu londa, na khaandi vechitswi veve valondekhana neye.

²⁰ Hensa, mukhali yali yanyakhana khu lu khuratsa masahi khu mihika likhomi na chiviri yitsa inyuma wa Yesu na kumira khulupindo lwi inguvu ya Yesu. ²¹ Shichira yali niyivolere "Niva ndakumira vutsa khu inguvu yeye, ndahona."

²² Na Yesu yishevukha na mulola, na muvolera, "Mwana wanje wi shikhana uve ni kholo, lisuuvira lyolyo likhuhonyinye." Na mukhali woyo yamanya na honyiywa khurhula khu isa yene yeyo. ²³ Lwa Yesu yinjira munsu yu mwamihi woyo, yalola vakhuvi vi lidulele vali mwiyoko na shituma ni vimbanga tsinyimbo tsyu khwikhula. ²⁴ Na yavavolera, "Rhuli munu, shichira mwana wi shikhana wuyu akhutsi yawe, navutsa akonanga." Navutsa vamusekha khumukholera shihenyehenye. ²⁵ Lwi shituma yesho shyali shirhuli irwanyi, yinjira muns namukumira mukhono, na mwana wi shikhana woyo yavukha. ²⁶ Makhuva khulondekhana khu makhuva yaka kalanda mu lusomo lwene yolo lwosi.

²⁷ Lwa Yesu ya simukha khurhula iwene yeyo, vavekhu vaviri vamulonda. Vatsiririra khu hansukha nu khuvola, "Ukhuvere tsimbavasi, mwana wa Daudi!"

²⁸ Lwa Yesu yali niyakhinjira munsu, vavekhu yavo vitsa khuye. Na Yesu navarheva, "Musuuvira nyala khumuhonyinya?" Navo vamuvolera, "Nyee Mwami unyala."

²⁹ Yesu yatira khu tsimoni tsyavo na vola, "Ka kholekhane khumunye khulondekhana khu lisuuvira lyenyu," ³⁰ na tsimoni tsyavo tsyamanya ni tsikukha. Na Yesu yavakaya vutinyu nu khuvavolera, "Mundu wosi akhamanya khu yaka tawe." ³¹ Navutsa vandu vaviri yavo vatsya nu khulanditsa mang'ana khu londekhana khu Yesu yali navakholere hawosi mu lusomo yolo.

³² Lwa vandu vaviri yavo vali ni vatsitsanga, hensa, musatsa yali itimbiti shichira litimoni lyali muye yalerwa khu Yesu. ³³ Lwa litimoni lyali lirhulitswe irwanyi, itimbiti yeyo yalomoloma. Shituma yashachenya nu khuvola, "Yaka kashiri khulolekhakhu mu Isiraheli!"

³⁴ Navutsa Vafarisayo vavola, "Nu khuvirira mu tsingulu tsyu mwami wa matimoni, natsyo tsyarhumikhiranga khukhunga matimoni."

³⁵ Yesu yatsya hawosi mu mataala nu mu michitsi. Ya tsyanyinya khwekitsa mu masinakochi avo, niyirwatsa makhuva malahi kwu vwami nu khuhonyinya vulwale likanu lukanu. ³⁶ Lwa yalola mikanda yavalolera tsimbavasi shichira ni lihenda mwoyo chyavo. Vali khuli makondi kavula mwayi. ³⁷ Yesu yavolera vechitswi veve, "Incheso ni inyikhi, navutsa vachesi ni vatititi. ³⁸ Khulwayako, saali vwangu khu mwami wi lichesa, atukhe khurhuma i vachesi mulichesa lyelye."