¹ Yesu yalanga vechitswi veve likhomi na vaviri halala na vaha vunyali vwu khurhulitsa miroho mitamanu nu khuhonyinya vuli tsikavira tsyosi tsyu vulwale. ² Mirha ka varhumwa likhomi na vaviri nako yaka; wukhurhanga, Simioni, wa valanganga Petero na Andereya, amwavo wewe; Yakobo mwikhula wa Sividayo, na Yuhana, amwavo wewe; ³ Filipo na Matrumayo; Tomasi na Matayo musololi wu vusuru, Yakobo, mwikhula wa Alufayo, na Lebausi, lirha lyelye lyakhaviri Tatayo. ⁴ Simioni, yakwaniranga shivala shyeshye, na Yuda Isikalioti, woyo yitsa atsame Yesu.

⁵ Yava likhomi na vaviri Yesu yavarhuma, navalaka nukhu vavolera, mukhatsikhu havundu hosi ha vandu vitsihiiri vemenyanga tawe, khaandi mukhatsikhu mulitaala lyosi lya Vasamalya tawe. ⁶ Navutsa mutsi khu makondi kakora kyi insu ya visiraheli. ⁷ Lwa mutsya mwirwatse nu muoola, "Vwami vwu mwikulu vuli himbi." ⁸ Muhonyinye vulwale, musimukukhitse vakhutsu, muvalavitse vu vuchere, murhulitse matimoni. Shihanwa yishi munyoli vutswa, khaandi munye muhane vutswa. ⁹ Mukhachinji itsahapu, anoho ifetsa, anoho tsirupya muvisikolo vyenyu tawe. ¹⁰ Mukhachinji musiko chukhusumiramu khu luchendo tawe, anoho tsinguvu tsiviri, anoho vilarho, anoho ipikolo, shichira muhinsiri atukhananga shyukhulya shyeshye. ¹¹ Na mulitaala lyosi nu muchitsi kwosi kwa mwinjiramu mukhave mu mundu atukhananga, amumenye munsu mwemwe khutukha lwa murhula mwitaala mwene yomo. ¹² Na lwa mwinjira munsu, muhane mirembe khu vandu vu munsu mwene yomo. ¹³ Na insu yene yeyo nili itukhananga, mirembe chenyu chyilava khuvo; navutsa nikhatukhananga, mirembe chyenyu chyivakalukhire. ¹⁴ Na khu mundu wosi uvula khumwinjiritsa, anoho avula khuhulikhitsa makhuva kenyu, lwa muva nu murhulangaa munsu anoho mwiitaala mwene yomo, musungusule lukushi lwavo lurhule khu virenje vyenyu. ¹⁵ Vavoleranga ka kyirikali ndi, litukhu lyu khukhalachirwa, Nyasaye yitsa alolere tsimbavasi tsinyikhi vandu va menyanga mu mataala ka Sodoma na Gomora, khuvira vandu vi litaala lyene yero!

¹⁶ Hensi murhumanga khuli makondi hakari hyi vihulukhu: muve vacheri khuli tsinsukha, khaandi vahoma khuli vituti. ¹⁷ Mwilinde khu vandu, shichira valitsa khumukumira vamuhire mushina, khaandi valitsa khumushuta vivoko mu masinakochi kavo. ¹⁸ Mulitsa khuhirhwa mu shina imberi wa vakavana na vami shichira lirha lyanje, khuli lirolekhitsa khuvo khaandi khutsihiri tsindi. ¹⁹ Lwa valitsa khu mukumira, mukhahendi mwoyo khuli lwa mu lomoloma anoho shamuvola tawe, shichira mulaherwa shamuvola isa yene yeyo. ²⁰ Shichira shivali munye mu lomoloma tawe, navutsa Roho wa ise wenyu alalomolomera mu munye. ²¹ Amwavo alatsama amwavo wewe khutukha khwikhutsa, khaandi ise alatsama mwikhula wewe. Vana valitsa khuhangalitsa vivuli vavo nu khuchira virwe. ²² Mulahimwa na vandu vosi shichira lirha lyanje: Navutsa woyo yikhutsira khutukha limala, mundu mwene woyo alahonyinywa. ²³ Navutsa niva mulatambitswa mulitaala lilala, mwilukhire mulitaala lindi: muvoleranga kyirikali, nu mushiri khwirhukhira mu mataala kosi ka Isiraheli, Mwana wu Mundu alava nakalukhe.

²⁴ Mwechitswi shyanyala khuva mukali khuvira mwekitsi wewe tawe, anoho murukwa khuva mukali khuvira mwamii wewe. ²⁵ Katukhire mwechitswi khuva khuli mwechitsi wewe khaandi murumwa khuva khuli mwami wewe, nikava valangi mwimiriri wi insu Beltsabuli, na vandu vi insu yene yeyo valalangwa mirha kafwana ndina? ²⁶ Khulwayako Mukharhia vandu tawe, shichira shyivulaho shindu shyakhunikhirwa shitsa shivule khukhunulwa; khaandi shyaviswa shitsa shyivule khumanyikha. ²⁷ Shamuvolera mu shisundi, mu kavole havulavu mbasu, na kamuhulira nimumonyeranga mu shirhoyi, mwirwatse nu musinjire khuvisekese vi tsinsu. ²⁸ Mukharhia yavo virha muviri navutsa shivali nu vunyali vwu khwirha mwoyo: Navutsa murhi woyo wuli nu vunyali vwu khutivitsa mwoyo nu muviri mu shihatiisi. ²⁹ Manyonyi kaviri shikakulitswangwa ling'ondo lilala? Na livulakhu ho linyala khukwa hasi vuchira lyimanya lya Ise wenyu. ³⁰ Khali liswi liri khumirhwi chenyu lya valitswa. ³¹ Mukhava nu vurhi tawe, muli nu vukuli vukali khuviritsa manyonyi manyikhi. ³² Khulwayo mundu wosi untsiyamanga imberi wa vandu, na inse khaandi ndamwiyema imberi wa Ise wanje ali mwikulu. ³³ Navutsa mundu wosi unyambakhana imberi wa vandu, khaandi inse ndamwambakhana imberi wa Ise wanje ali mwikulu.

³⁴ Mukhakanakani nditsa khulera mirembe mulirova tawe. Shyinditsa khulera mirembe navutsa shivavi. ³⁵ Shichira nditsa khulera lyavukhana hakari hu mundu na ise wewe, mukhana na nyina wewe, khaandi vanakhuvitsala vakhana na vanakhuvitsala vavo. ³⁶ Na vatsiku vu mundu valava vandu vi insu yeye mwene. ³⁷ Woyo uyansa ise wewe anoho nyina wewe khuvira inse shyatukhana khuva ninse; khaandi woyo uyansa mwikhula wewe anoho mwana wewe mukhana khuvira inse, shyatukhana khuva ninse. ³⁸ Mundu uvula khuchinga musalaba kwekwe, khaandi anonde, shyatukhira khuva ninse. ³⁹ Vuli mundu ukhava khulinda liva mwoyo lyelye mwene alalikoritsa: na woyo akoritsa liva mwoyo lyelye shichira inse alalinyola.

⁴⁰ Mundu wosi yinjiritsa munye, yinjiritsa inse, khaandi mundu yinjiritsa inse, yinjiritsa woyo yarhuma inse. ⁴¹ Mundu yinjiritsanga muporofeti shichira nu muporofeti, alanyola matanyi kwu muporofeti. Khaandi mundu yinjiritsanga mundu ukholanga vulunji shichira akholanga vikholwa vyu vulunji, alanyola matanyi kwu mundu akholanga vi kholwa vyu vulunji. ⁴² Mundu wosi ahakhu mulala khu vatititi yava shikombe shya matsi mashindu shichira nu mwechitswi wanje, muvoleranga ka kyiriikali, shyalikoritsakhu matanyi keke tawe.