¹ Lwa Yesu yikha hasi khurhula khu shikulu, mukanda mukali kwamulonda. ² Na mundu yali yalwala vuchere yitsa namwinamira imberi wewe nu khuvola, "Mwami, niva unyala khwenya ntakasa mbe munihu."

³ Na Yesu yanyira mukhono kwekwe namutirakhu, nu khuvola, "Ndenyanga uve mutakase." Na khuvwangu yalavitswa khurhula khu vuchere vwevvwe." ⁴ Yesu yamuvolera, "Hensa, ukhavolera khu mundu shindu shyosi tawe. Navutsa tsya wilolekhitse khu musalisi na urhulitse shihanwa shyalakwa na Musa shive shilolekhitso khuvo!"

⁵ Yesu lwa yali ni yinjiranga Kaperanamu, mwimiliri wa vasikali va Varoma mulala yitsa khumurheva, ⁶ Na vola, "Mwami murumikhi wanje akoni hasi ingo alwalanga na alumwangwa muno."

⁷ Yesu yamuvolera, "nditsa khumuhonyinya."

⁸ Musikali woyo yamuvolera, "Mwami inse shintukhane yiwe khwinjira munsu mwanje; navutsa vola vutsa likhuva na murumikhi wanje alahona. ⁹ Inse mwene ndi mundu ali hasi hu vunyali khaandi ndi na vaskali vandi vali hasi hanje mu malako. Lwambolera mulala tsya atsitsanga na wundi lwamuvolera hamba yitsanga, na khumurumikhi wanje khola yishi akholanga.

¹⁰ Lwa Yesu yahulira mang'ana yaka, yali nilichenya navolera yavo vali ni vamulondanga, kakyirikali vavolerhanga, shiri khulolakhu lisuuvira lyikali khuli yiri mu Isiraheli. ¹¹ Inse muvoleranga, vanyikhi valitsa khurhula ivukwi ni imatiooli, navo valitsa khwikhala khu mesa halala na Aburahamu, na Isaka, na Yakobo mu vwami vwu mwikulu. ¹² Navutsa vana vu mbwami valitsa khusuvwa irwanyi mu shisundi, iwene yeyo wa vandu valitsa khulira nu khuteteyitsa mino. ¹³ Yesu yavolera musik ali woyo, "Tsya! Khuli lusuuvire, kalarhwekhitswa khu yiwe." Ma murumikhi woyo yahona khurhula mu tsisa yetso.

¹⁴ Lwa Yesu yinjira munsu mwa Petero, yalola nakhuvitsala Petero na koni khushitali na lwalanga murengo. ¹⁵ Yesu yamukumira khu mukhono kwekwe ma murengo kumurhula, na yavukha nu khurhanga khuvaha shyukhulya. ¹⁶ Lwa hamukolova hatukha vamulerhera vandu vanyikhi vali na matimoni; nakhunga miroho khu likhuva lyelye, na khuhonyinya vosi vali ni vali valwale. ¹⁷ Yaka kali khurhwekhitsw kavolwa nu muporofeti Isaya, navolanga, "Ye mwene yavukula vutekheranu vwerhu, nachinga vulwale vwerhu."

¹⁸ Lwa Yesu yalola mukanda mukali kwa vandu ku tsitsajiliranga khu metekha, yavolera vechitswi veve vambukhe khutsya khu luchelekha lundi lwi inyansa yigalilaya. ¹⁹ Na mwechitswi mulala wamalako yitsa khu Yesu na mu volera, "Mwechitsi, inse ndakhulonda hawosi ha utsya."

²⁰ Navutsa Yesu yamuvolera, "Vivwe viri ni tsimbangaywa tsyavo, na manyonyi kwu mbwerefu kali ni vitsu ni vyavo, navutsa Mwana wu Mundu avula hu khuvikha murhwi kwekwe."

²¹ Mwechitswi wundi yamuvolera, "Mwami mbe munwa mbalyo nsi khuyavira Ise wanje.

²² Navutsa Yesu yamuvolera, "Nonda, lekha vakhutsu vayavire vakhutsu vavo."

²³ Lwa Yesu yinjira mulyarho vechitswi veve vamulondamu. ²⁴ Na hensa imbutsa yahutsa khu inyansa, na vikuvuli vyakhunikha lyarho: Navutsa Yesu yali na koni. ²⁵ Vechitswi veve vitsa khumuvukhitsa ni vamuvolera, "Mwami, khuhonyinye, khutivanga!"

²⁶ Navutsa Yesu yavavolera, "shichira shina muritsanga, munye vamuli ni lisuuvira litititi?" Neye yasinjira nakondekhera imbutsa ni inyaansa: na vyahonjera, vwirhuliri vwaliho.

²⁷ Vandu vachenya nivarhevana, "Wuyu nu mundu wa lukanu shina, khali vushindu ni inyansa vimuhuriranga?"

²⁸ Lwa Yesu vatukha hanjelekha mushivala shya Vagadara, vandu vaviri vali na matimoni vakana neye. Vali nivarulanga mu virindwa khaandi vali valulu muno, khushyalikhuho mundu yavirirhanga khu inira yeyo. ²⁹ Vahansukha ni vavola, "Wenya shina khukhutse yiwe Mwana wa Nyasaye? Witsi hanu khukhutambitsa inyinga yerhu ni shiri khutukha?"

³⁰ Ihale hati khwaliho ni shituma shyi tsimbitsi ni tsyayanga. ³¹ Matimoni yako katsyanyinya khusaya Yesu ni kamuvolera, "Nu khukhunga nuyansa lekha khutsi mu shituma shyi tsimbitsi yetso."

³² Nayakavolera, "Tsi", na karhula nikinjiramu na shituma shyosi sharhekukha maliviri nukhutsya mu inyansa ni khutsira mu matsi. ³³ Vayi vali vayitsanga tsimbiitsi vilukha nivatsya mwitaala ni vivala vuli shindu, muno kali ni kikholekhe khu yavo vali na matimoni. ³⁴ Na hensa litaala lyosi litsa khwakanira Yesu: na lwa vamulola vamusaya arhule mu lusomo lwavo.