¹ Muhava vandu vu khukhalachira vandi, khu na munye mulivula khukhalachirwa na Nyasaye. ² Shichira likhalaka lyukhalakanga, nalyo lyulikhalajirwa nalyo, shichero shyu chereramu vandi nashyo shyulichererwamu. ³ Shichira shina ulolanga shisala shiri mu moni ya amwavo wowo na yiwe shyulolakhu shitonye shyu musala shiri mu moni yoyo? ⁴ Anoho unyala ndi khu khuvolera amwavo wowo, lekha khurhulitse shisala shiri mu moni mwo: na yiwe mwene nuli ni shitonye shyu musala mu moni yoyo? ⁵ Munye vakati! Rhanga urulitse shitonye shiri mu moni yoyo, khu ulole vulahi, khuli urulitsa shisala shiri mu moni ya amwavo wowo. ⁶ Mukhahi khu tsisimbwa vindu viri vitakatifu tawe, khaandi mukhasuvi tsilulu tsyenyu imberi wi tsimbitsi. Tsiratuvakira hasi ni virenje khaandi tsivakalukhane nu khuvarandulanyinya mu vitonye.

⁷ "Musave na munye mulahelwa, mukhave na munye mulanyola: mwikulikhitse na munye mulikulirwa. ⁸ Shichira wosi usavanga alaherwa: na woyo ukhavanga alanyola: na uyu yikulikhitsanga alikulirwa. ⁹ Anoho nu wina khu munye wu mwana wewe na musava mukati alamuha lichina? ¹⁰ Anoho mwana wewe na musava isutsi alamuha insukha? ¹¹ Khulwayako, niva munye va muli vatamanu mwamanya khuhana khu vana venyu vihanwa vilahi, ni khanga likali khu Ise wenyu wu mwikulu alavaha vindu vilahi yavo vamusanga? ¹² Khulwayako, shyosi shya wakhayansi vandu vakhukholere, na yiwe vakholere ndyo. Yiri nalyo lilako na vaporofeti.

¹³ Mwinjire khuvirhira mu mulyango kuli munyerere: shichira mulyango muvambalalu khaandi injira ni imbambalalu itsitsanga mu litivitswa, na hawene yaho naho ha vandu vanyikhi vavirhiranga. ¹⁴ Navutsa shilivwa ni shinyerere, na injira ni indinyu ihilanga vandu mu livamwoyo, na ni vatititi vajinyolanga.

¹⁵ "Muve vacheri khu vaporofeti vu vuvehi vamwitsiranga nivi fwali tsinguvu tsya makondi, navutsa mukari mwavo ni vivwe vilulu. ¹⁶ Mulavamanya khulondekhana khu vikholwa vyavo. Vandu vanyala khwatula makhuyu ki misabibu khurhula khu misala chyi vikunga, anoho makhuyu khurhula khu munyenya? ¹⁷ Munjira indala nsere, musala mulahi kwamanga makhuyu malahi, navutsa musala mutamanu kwaminyanga makhuyu matamanu. ¹⁸ Musala mulahi shyukunyala khwama makhuyu matamanu, khaandi musala mutamanu shyukunyala khwaminya makhuyu malahi. ¹⁹ Vuli musala ku khaminyanga makhuyu malahi kuremakanyinywangwa ma kusyuvwa mu muliro. ²⁰ Khu lwayako mulavamanya khulondekhana khu makhuyu kavo. ²¹ Shyali vuli mundu unankanka Mwami Mwaami: alitsa khwinjira mu vwami vwu mwikulu navutsa ni woyo ukholanga vulaliri vwa Ise wanje uli mwikulu. ²² Litukhu yero, vandu vanyikhi valitsa khumbolera Mwami, Mwami shyukhwa rulitsa vuporofeti mu lirha lyolyo, khaandi mu lirha lyolyo khwakhunga matiimoni? Khaandi mu lirha lyolyo khwakhola mihinsi chyi vyukhuchenyinya? ²³ Na inse nditsa vambakhane havulavu shindamumanya khu tawe, rhuli khuyinse munye vakholi vu vwoni!"

²⁴ Khu lwayako mundu uhulilanga makhuva kanje nu khukakhola, alasesanyinywa nu mundu mucheri yumbakha insu yeye khu lwanda. ²⁵ Imbula lwa yakhuva, micherera chya matsi chyikholomokha nu vushindu vvwishihutsutsu nuvutuya insu yeyo, navutsa shiyakwa tawe, shichira yali niyumbakhwa khu muse kwu lwanda. ²⁶ Khu vuli mundu uhulilanga makhuva kanje yaka, ma avule khu kakhola, asesanyinywa nu mundu musiro, yumbakha insu yeye khu muyeshe. ²⁷ Imbula yakhuva, micherera chya matsi chikholomokha, ni, shihungutsu shyahutsa nu khuduya insu yene yeyo, nayo yakwa hasi nu muhumu mukali.

²⁸ Lwa Yesu yali yakhamala khuvola makhuva yaka mukanda kwa vandu vamuhulikhitsa vachenya khulondekhana khu mechitso keke. ²⁹ Shichira yekitsa khuli mundu wu vunyali, shiyali khuli vekitsi vavo va Malako.