1 Lwa Yesu yalola mikanda, ya nina mushikulu. Lwa yali niyakhikhala hasi, vechitswi veve vitsa khuye: 2 Yakhunula munwa kwekwe na vechitsa, na vola,
13 Munye muli munyu kwi lirova: na munyu nu kukoritse shinoji shyakwo, shyukulava munyu khaandi, navutsa kulasuvwa irwanyi, nu khutuvakwa ni virenje vya vandu. 14 Munye muli vulavu vwilirova. Litaala lili khushikulu shilinyala khuviswa mba. 15 Vandu shivahambitsa itaha nu khuchivisa mulwalo, navutsa vachyivikha khu mesa, yakhe khuvosi vali munsu. 16 Vulavu vwenyu vwakhe khuvandu, na valole vikholwa vyenyu vilahi, khu vakhuminye Ise werhu uli mwikulu.
17 Mukhakanakani nditsa khwononyinya lilako, anoho vuporofeti: shinditsa khwononyinya, navutsa khurhwekhitsa. 18 Ka kyirikali muvoleranga, likulu ni lirova vilarhulitswaho, navutsa indukuta khali indala anoho shisya shyu vuhandichi shishilavirha vutsa mu malako, khutukha vindu vyosi virhwekhitswe. 19 Khulwayako mundu ulimunakanga lilala khu malako yaka, khaandi ni yekitsa vandi khukhola ndyo, alalangwa mutititi mu vwami vu mwikulu, na ulyekitsa kosi nu khukakhola, alalangwa mukali mu vwami vu mwikulu. 20 Shichira muvoleranga munye, vulunji vwenyu nu vukhavira vulunji vwa vahandichi na Vafarisayo, shyu mulitsa khwinjira mu vwami vu mwikulu.
21 Munye mwahulira kavolwa khuvo mu tsinyinga tsyali tsya khale, "Ukhira tawe, na khuvosi wira alatukha khu likhalakirwa 22 Navutsa muvoleranga munye mundu wosi uva nu vurhima khu amwavo wewe alakhakirwa; na khu vosi ulivolera amwavo wewe, "uli mundu musiro" alayalwa; na khu vosi ulimuvolera amwavo wewe, "Uli muyingwa" alava muvutinyu khusuvwa mu muliro kwu mu shihatisi. 23 Khulwayako nuva nuleranga shihanwa khuvwali, ma witsukhitse amwavo wowo akhukosere, 24 Lekha shihanwa ha vwali, ma utsi khulomba vuhambani na amwavo wowo, khu witse khuhana shihanwa shyoyo. 25 Lomba lihulikhitsana vwangu nu muyali wowo, nu mushiri khunjira nu mutsinga mu shina, anoho muyali alakhuhira khu mukhalachi, na mukhalachi alakhuvikha mu makhono ku musikali na ulasuvwa muvuhambe. 26 Kakyirikali muvoleranga, shyularhula irwanyi nukha vasi tsisenti tsyosi tsya akhutayanga.
27 Mwahulira kavolwa, 'Mukhaheya tawe.' 28 Navutsa mu voleranga ndi khu vosi uhensanga khu mukhali ni likhayirwa umali khuheya neye mu mwoyo kwekwe. 29 Niva imoni yoyo yu khu mukhono mulunji ikhulombanga wisikarile, uchirhulitse ma uchisyuve: shichira nuvulahi khukorhitsa shivero shilala, khuvirha muviri kwosi khusuvwa mu shihatisi. 30 Niva mukhono kwokwo mulunji ku khulombanga wisikarile, ukurheme kurhule ma ukusyuve. Shichira nu vulahi khumunye shilala khu vivero vyenyu khukorhitswa, khuvirha muviri kwenyu kwosi khusyuvwa mushihatisi. 31 Khaandi kavolwa, "mundu ni yenya khulekha mukhali wewe amuhandikire ipalwa yu khulekhana." 32 Navutsa muvoleranga munye, ulilekha mukhali wewe ni kakhali shichira vuheyi, amukhola khuva muheyi, na khuvosi amuhira akhola vuheyi neye.
33 "Khaandi mwahulira kavolwa khuvo mutsinyinga tsya khale, "Ukhisuha lisuha lyu vuvehi, navutsa ukholele Mwami vindu vyosi vya wisuhi khukhola. 34 Navutsa muvoleranga munye, ukhisuhakhu khali hati khu likulu tawe; Shichira ni shirhumbi shyu vwami vwa Nyasaye; 35 Anoho khu lirova; shichira ni ha Nysaye asenanga virenje vyevye; anoho khu Yerusalemi; shichira ni litaala lyu Mwami mukali. 36 Khali ukhisuha khu murwi kwokwo, shichira shunyala khulomba liswi lilala khuva lilavu anoho limwamu. 37 Lekha lilomoloma lyenyu live "Yee, Yee, anoho, "Auwa, Auwa." Shichira shindu shindi shyosi shya mulomoloma khuvirha yaka shirhulanga khu mutamanu woyo.
38 Mwahulira kavolwa, imoni khu imoni, lino khu lino. 39 Navutsa muvoleranga munye, mukhahinkitsani nu mundu khuvaansira mutamanu: navutsa ukhusamula khu luseya lwu mukhono mulunji, muhe khaandi lwu mukhono mukata asamulekhu. 40 Na mundu na khuyaala, ma avukule likoti lyolyo, lekha avukule khali ikanso yoyo. 41 Na khuvosi ukhunika umuhelekhitse imaili indala, muhelekhitse tsimaili tsiviri. 42 Ukhusavanga shindu muhe, ukhamwima tawe, khaandi wenyanga khuvukula khu yiwe shindu ukhenya akhukalukhitsire tawe.
43 Na mwahulira kavolwa, uyanse murende wowo, na utunyire mutsiku wowo. 44 Navutsa muvoleranga munye, uyanse vatsiku vovo, usalire yavo vakhutambitsanga, 45 Mutukhe khuva vana va Ise wenyu uli mwikulu. Shichira alomba lyuva lyakha khu vatamanu na valahi; na alerha imbula khukhuva khu valunji na vakhali valunji. 46 Niva mulayansa yavo vamuyansanga munye, ni matanyi shina kamunyola? Khali vasololi vu vushuru shivakhola ndyo? 47 Numushelitsa vamwenyu venyu vonyene, muvirila shina vandu vandi? Khali vi tsihiri shivakhola ndyo? 48 Khu lwayako muve vaseretse, khuli Ise wenyu wu mwikulu ali museretse.