¹ Mumatukhu yako Yuhana mubatisi, yirwatsa mu shangalangwe shyi Vuyuda navola, ² Mwikanire, shichira vwami vwu mwikulu vuli himbi. ³ Na wuyu naye wi Isaya muporofeti yavola makhuva keke navola, "mwoyo kwu mundu ulanjilitsanga mushangalangwe, mulombe injira yu Mwami, mulunjikhitse tsinjira tsyetsye.

⁴ Na Yuhana mwene woyo yali ni inguvu yalombelwa khu vwoya vwi ingamia, nu lukhova lwishisero mushisindi shyeshye, na shyukhulya shyeshye shyali tsisichi nu vushi vwu mbulimo. ⁵ Vandu vosi va Yerusalemi ni Ivuyuda, halala na mataala kosi kali himbi nu muchera kwa Yorodani vitsa khuye. ⁶ Na yavabatisa mu muchera kwa Yorodani, na ni viyama vwoni vwavo. ⁷ Navutsa lwa yalola Vafarisayo na Vasadukayo nivitsanga muvunyikhi khubatiswa, yavavolera, "Munye lwivulu lwi tsinsukha, wina yamuvolera munyala khwihononokha khu vurhima vwa Nyasaye vwitsanga?" ⁸ Mwaminye makhuyu katukhananga ni lyikanira. ⁹ Muvule khukanakana nu khwivolera, muli vana va Aburahamu nali khuli ise wenyu; muvoleranga, Nyasaye ali nuvunyali vu khulombera Aburahamu vana khurhula khu machina yaka. ¹⁰ Lwene yulu ihaywa ivikhirwe khumiri chyi misala. Khu lwayako musala kwosi kuvula khwama makhuyu malahi kularhemwa, nu khusuvwa mumuliro. ¹¹ Inse mubatisanga mu matsi khutukhira likanira, navutsa woyo witsanga inyuma wanje ali ni tsingulu khuvira inse, shindukhira khuchinga vilarho vyevye tawe: mwene woyo yitsa khuvabatisa mu Roho Mutakatifu, nu muliro. ¹² Luvivi lwelwe luli mu mukhono kwekwe, khuviva nu khweya lwanyi lwelwe ma avunjeritse inganu yeye mushyachi, navutsa mukhutsi alasamba nu muliro kuvulanga khutsima."

¹³ Yesu yitsa khurhula Igalilaya natukha khu Yorodani, atukhe khubatiswa na Yuhana. ¹⁴ Yuhana yachelitsa khumukaya na muvolera, "Inse ndukhana khubatiswa niwe na witsa khaandi khwinse?" ¹⁵ Yesu yamuvolera, "Vuchirira kave ndyonio khulwene yulu, shichira kakhutukhiranga khutse khurhwekhitsa vulunji vwosi." Nalwo lwa Yuhana yamanya namuvuchirira. ¹⁶ Lwa yali niya khabatiswa, Yesu yarhula mu matsi; hensa likulu likukha khuye. Nalola Roho wa Nyasaye niyikhanga khuye khuli shituti na shiyera khuye. ¹⁷ Hensa, mwoyo kwarhula mwikulu nukuvola, "Wuyu neye Mwana wanje muyanse, nyansitswa naye muno."