¹ Lwa Yesu yali ni yakhamala khuvola makhuva yaka kosi, yamanya na volera vechitswi veve, ² "Mu manye ndi matukhu kaviri khurhula nundi ilava inyinga yi Lipasaka, na Mwana wu Mundu alatsamwa nu khuhanwa avambwe."

³ Na vakhongo va vasalisi na vasakhulu vimiriri, vivunjelitsa halala munsu yu mu shikhalo shyu vwami vwu mukhulundu mukali, walangwa Kayafa. ⁴ Nivaviritsa, katukhana khukumira Yesu mu vwivisu nu khu mwirha. ⁵ Shichira vavola, "Likhava inyinga yi lilya lyu mwipasaka, khu vandu vavule khuranga lihe."

⁶ Inyinga lwa Yesu yali Bethani munsu mwa Simioni yali nu vuchere, ⁷ Lwa yali niyitili khu mesa ni yenya khulya, mukhali mulala yitsa khuye nali ni ichupa ya makura kahunyanga mwayu mulahi na khaandi ku vukuli vunyikhi, na tsukhulula khu murwi kwekwe. ⁸ Navutsa lwa vechitswi veve valola yaka, vivihirirwa ni vavola, "Shichira shina yononyinye makura kuvukuli vunyikhi? ⁹ Kavere kakulanyinywe tsirupya tsinyikhi ma tsyilakavulirwa vatakha."

¹⁰ Yesu lwa yamanya vakanakana yaka, ya va volera, "Shichira shina munyakhitsa mukhali wuyu? Shichira akholi shikholwa shilahi khwinse. ¹¹ Inyinga yosi muli na vatakha, navutsa shyu numuve ninse vuli inyinga yosi tawe. ¹² Lwansukhire makura yaka, khu muviri kwanje, akholi ndyo khunsirechekhitsa liyavirwa liyanje. ¹³ Mu volera kyirikali, hosi ha makhuva malahi kirwatswa mulirova mwosi, shikholwa shyu mukhali wuyu akholi shilitsa khu lomolomelwa khu nu khu lomba yitsukhitswe" ¹⁴ Na mulala khu yavo vali likhomi na vaviri, walangwa Yuda Iskalioti, yatsya khu vakhongo va vasaliisi ¹⁵ Na varheva, "Mulamba shina niva ndamuvikhira Yesu mu makhono kenyu?" Vamurhunga makongolo kyi ifetsa makhomi kavaka. ¹⁶ Khurhula inyinga yeyo Yuda yarhanga khukhava vwiyaangu vulahi vu khutsama Yesu.

¹⁷ Khu litukhu lyu khurhanga lyilya li mikati chyi vulamu mamera, vechitswi vitsa khu Yesu, vamurheva, "Wenya khulombe hena hu khulilra Lipasaka?"

¹⁸ Naye yavavolera, "Tsyi mu litaala yomo, mu muchitsi kwu mundu wa munyola, mu muvolere, "Mwechitsi avola, Inyinga yeye itukhi. Ndalya lipasaka halala na vechitswi vanje munsu mwomwo." ¹⁹ Na nindyo vechitswi veve vakhola, khuli Yesu yavarhuma, ni valomba mikati chyi Lipasaka.

²⁰ Lwa hamukolova hatukha Yesu yikhala halala na vechitswi veve likhomi na vaviri khulya khu mesa. ²¹ Navo lwavali valitsanga, Yesu yavola, "Muvoleranga, mulala khu munye atsitsa khuntsama."

²² Vaverera muno, nivarhanga khumurheva vuli shya mulala, "Mwami anyala khuva ninse?"

²³ Yarhevula na vavolera, "woyo wenya khutonjera mukhono kwekwe halala ninse khu sahani yukhu, neye wenya khuntsama. ²⁴ Mwana wu Mundu alatsya, khuli kahandikwa khulondekhana khuye. Navutsa ali nu vutinyu woyo utsamanga Mwana wu Mundu, kakhavere vulahi mundu woyo alavula khwivulwa."

²⁵ Yuda, wali natsitsa khumutsama yavola, "Anyala khuva ni inse, Mwechitsi?" Naye yamuvolera, "Uvoli yiwe mwene."

²⁶ Lwa vali valitsanga, Yesu yavukula mukati nasanditsa na mekanyinya. Naha vechitswi veve, nu khuvavolera, "vukuli, munyanye. Yuku nokwo muviri kwanje." ²⁷ Yavukula shikombe, nasanditsa, navaha nu khuvola, 'ngw'ii munye vosi" ²⁸ Yaka nako masahi kyi indakano imbya kasundukhanga shichira vanyikhi, khuvasameha vwoni. ²⁹ Navutsa muvoleranga, shindang'wakhu khaandi idivai ya makhuyu kwu musabibu yaka, khutukha litukhu lya nditsa ng'wi vuhya halala na munye mu vwami vwa Ise wanje.

³⁰ Lwa vali ni vakhamala khwimba lwimbo, vasimukha ni vatsya khu shikulu shya Mitseituni. ³¹ Yesu yavolera vechitswi veve, "vutukhu vwa lelo munye vosi mutsitsanga khunsirukha nu khundekha, shichira kahandikwa, "Nditsa ndumule mwayi, na shyayo shya makondi keke, kalitsa khusalana."

³² Navutsa lwamba nimali khwisimukukha, ndarhanga khutsya mu lusomo lwigalilaya imberi wenyu."

³³ Na Petero ya muvolera, "Khali niva vandi vosi vala khulekha, inse shindakhulekha."

³⁴ Yesu yamurhevulira, "Ka kyirikali, khuvoleranga, khu vutukhu vwa nundi, itaywa nishili khulakula, ulanyambakhana hali khavaka."

³⁵ Petero yamuvolera khaandi, "Khali niva ndenyekha khukhutsa na yiwe, shindakhwambakhana." Na vechitswi vandi vosi vamuvolera malala mere.

³⁶ Na Yesu yatsya halala na vechitswi veve khuukha havalaanga Getsesimani navolera vechitswi veve, "Yikhali yaha nishitsya yaho khusaala." ³⁷ Yavukula Petero na vikhula vaviri va Sividayo narhanga khuverera nu khunykhana. ³⁸ Neye yavavolera, "Mwoyo kwanje kuli nu vuvereri khali vwilikhutsa. Mwikhale yaha mulinde nu khusaala ninse." ³⁹ Yesu yisunda hamberi hati, ni yinama hasi nu khusaala. Navola, Ise wanje niva kanyala khu nyalikhana, ndulitsiraho shikombe yishi. Navutsa ka khava khuli lyenya lyanje tawe, navutsa kave khu vulaliri vwovwo. ⁴⁰ Na yitsa khu vechitswi veve, na va nyola va konanga tsindolo, narheva Petero, "Shyu muvere mulalindakhu ninse khali isa indala tawe? ⁴¹ Muhense nu khusaala muvule khukwa mu machelitso, roho kwenyanga, navutsa muviri nu mutetetekhere." ⁴² Yatsya khaandi lwa khaviri nasaala: Navola, Baba wanje ni ka kanyalikha shikombe shyakhaviri vuchira inse khung'wa, navutsa lekha vulaliri vwovwo vukholekhe." ⁴³ Yitsa khaandi na nyola vakoni tsindolo, shichira tsimoni tsyavo tsyali nu vulitoho vwi tsindolo. ⁴⁴ Yavalekha khaandi natsya khusaala lwa khavaka, na vola makhuva malala mere. ⁴⁵ Na Yesu yatsya khu vechitswi veve navola, "Mushikonanga nu khuhulukha? Hensi isa itukhi, yu Mwana wu Mundu amali khutsamwa nu khuvikhwa mu makhono ka voni. ⁴⁶ Vukhi khutsi. Hensi, mundu unsamanga arhevukhe."

⁴⁷ Lwa yali na shyi lomolomanga, Yuda mulala khu vechitswi likhomi na vaviri halala nu mukanda kwa vasikali vi vivavi ni vikong'o khu rhula khu vasaliisi vakali na vasakhulu ya tukha ho. ⁴⁸ Mutsami woyo yali uvahere shimanyinyiro, nu khu va volera, "Mundu wa mwenya khu lola ni muvusa nu khu khumberera, neye wa mukumira." ⁴⁹ Yuda yitsa vulunji khu Yesu nu khu muvolera, "Mireembe, Mwechitsi" nu khu muvusa.

⁵⁰ Yesu ya mu volera, "Mulina, shichira shina uli hanu? Khola shya witsi khu khola." Na vasikali vamanya vakumira Yesu nu khutsya neye. ⁵¹ Hensa, mulala khu vechitswi veve yanyira mukhono kwekwe narhulitsa shivavi nu khalaka shiroyi shyu muhinsiri wu musalisi mukali. ⁵² Yesu ya mu kaya nu khu mu volera, vikha shivavi mu shyula mwa shivere, khu vosi va yansa khu lwanira shivavi, vala khirhwe ni shivavi. ⁵³ Mu kanakana inse mbula vunyali vu khurheva Ise wanje mwikulu lwene yulu anderhele lukhululu lwi tsingerosi? ⁵⁴ Navutsa niva ndakhola ndyo, Mahandiko ni kharhwekhitswe ndi, kavola yaka khutukha ka kyikholekhe?" ⁵⁵ Inyinga yene yeyo Yesu ya volera mukanda "Mwitsi khwinse ni vivavi, ni vikong'o, khu ngumira khuli ndi munuli? Na vuli litukhu ndavere na munye khase nu khwikhala ni mwechitsa mulitemberi, Shichira shina mwavula khu ngumira lwene yolo? ⁵⁶ Nayaka kosi kamali khwikholekha khu ka vaporofeti vahandika mu Mahandiko Matakatifu karhwekhitswe. Na vechitswi veve vosi vamulekha nu khumwirukha.

⁵⁷ Na vandu vali va kumire Yesu va muhira mu insu ya Kayafa musalisi mukali, mwa vechitsi va malako na vasakhulu vali vivunjikhe. ⁵⁸ Navutsa Petero ya va londerera ha nyuma ihale, khu tukha mu lwanyi mu mujitsi kwu musalisi mukali. Yinjira mukari natsya khwikhala na valindi valindaho alole shya nishyikholekhe. ⁵⁹ Vimiriri va vasalisi vakali, nu mukhungano kwosi vakhava valolekhitsi vwu vuvehi vachinire Yesu khu atukhe khwirhwa. ⁶⁰ Navutsa shivavanyola tawe, khali niva valolekhitsi vu vuvuvehi vanyikhi valolekhaho. Mwimala virhulitsa vandu vaviri vu vuvehi ⁶¹ ni vavola, "Mundu wuyu yavola anyala khupomola litemberi lya Nyasaye khaandi alyumbakhe vuhya mu matukhu kavaka."

⁶² Mukali wa vasalisi vosi yasinjira na mu volera, "Uvulakhu lyirhevuli lyosi lyunyala khu hana khu ka vandu yava vakhuyalilakhu?" ⁶³ Navutsa Yesu ya shiling'ana vutswa. Mukali wa vasalisi vosi yamurheva, "Khurheva imberi wa Nyasaye, khuvolere niva yiwe neye Kristo Mwana wa Nyasaye."

⁶⁴ Yesu yamurhevulira, "Yiwe mwene uvoli. Navutsa khuvolera, khurhula lwene yulu na matsyamberi ulalola Mwana wu Mundu ni yikhale khu mukhono mulunji kwi tsingu, niyitsanga khu malesi kwu mwikulu."

⁶⁵ Mukali wa vasalisi vosi yarandula tsinguvu tsye nu khuvola, "Ulomolome manyeko! Vulolekhitsi shina vundi vywa khukhavira valolekhitsi? Hensi, mu mali khuhulira manyeko keke. ⁶⁶ Mukanakana shina?" Vamurhevulira, nu khuvola, "Atukhana likhutsa." ⁶⁷ Va manya va mu sutsire mare mu tsimoni, ni vamutuya tsinkume, na vandi va mu saamula tsikhovi ⁶⁸ ni va vola, "Porofeta khu khutse, shyuli Kristo. Nu wina akhusamule?"

⁶⁹ Inyinga yiyi Petero yali yikhale irwanyi mu mujitsi mwene yomo, na muhinsiri mukhana ya mwitsira namu rheva, "Yiwe uvere na Yesu mu Galilaya?"

⁷⁰ Navutsa Petero ya manya ya mbakhane imbeli wavo vosi, nu khu vola, "shimanyi ka mu vola tawe."

⁷¹ Lwa ya rhula khu tsya mu shilivwa, mukhana murhukwa wundi ya mu lola, nukhu volera vandu valiho, "Mundu wuyu avere halala na Yesu mu Nazaleti."

⁷² Khaandi Petero ya mbakhana nu khwi suha, "Inse manyi mundu wuyu tawe!'

⁷³ Mu inyinga intititi yitsa mulala wali ni vasinjire neye, na volera Petero, "Ka kyrikali uli mulala wavo: Khali lilomoloma lyolyo lyi manyinya vutwsa."

⁷⁴ Na ya rhanga khwi lama nu khwisuha, "Auwa, inse manyi mundu wuyu tawe," nalwo lwi itaywa yalakula.

⁷⁵ Petero ya manya yi tsukhitse makhuva ka Yesu ya mu volera, "Itaywa ni shiri khulakula umanya uve nu nyambakhane hali khavaka." Ya manya na rhula irwanyi nu khulira vululu.