¹ Inyinga yeyo, vwami vwu mwikulu vulasesanyinywa na vakhana vachima likhomi vavukula tsitaha tsyavo nivatsya khwakanira musatsa usereranga mwiha. ² Varhanu khuvo vali vasiro, na varhanu khuvo vali vacheri. ³ Lwa vakhana vasiro vavukula tsitaha tsyavo, vivilirha khuchinga makura kukhutasa lwa kalimu kahwa. ⁴ Navutsa vacheri vachinga mutsichupa makura kukhutasa kukhurhanga ni kawa mutsitaha tsyavo. ⁵ Musatsa wukhuserera mwiha yacherevitwsa khutukha, vakhana vukhumwakanira vosi varhenjetsa nu khukona tsindolo. ⁶ Navutsa hakarhi mu vutukhu, lilanjilira lya liho, "loli, musatsa uselere! Mutsi khumwakanira."

⁷ Na vachima vosi vavukha, ni va hambitsa tsitaha tsyavo. ⁸ Vali vasiro vavolera vacheri, 'Khuhikhu makura, shichira tsitaha tsyerhu tsitsimanga.'

⁹ "Navutswa vacheri varhevula ni vola, 'Shichira kakhutukha khutse vosi tawe, nuvulahi munye mutsi wavakulitsanga makura mwikulire vene.' ¹⁰ Na lwavali nivatsitsanga khukula makurha, musatsa wu khuserera mwiha yitsa, na yavo vali ni virechekhe vinjira naye mushiserero: nu mulyango kwikalwa.

¹¹ "Lwinyuma vitsa vachima vandi ni vavola, 'Mwami, Mwami, khwikulire.'

¹² Navutsa yarevula navola, 'Ka kyirikali muvoleranga, shivamanyi tawe.' ¹³ Khu mulinde, shichira shyumumanyi litukhu ni isa lwa Mwana wu Mundu yiitsanga.

¹⁴ "Khaandi vwami vu mwikulu vuli khuli mundu yenya khutsya mushivala shihale, yalanga varhukwa veve, navaha myandu chyechye vamulindire. ¹⁵ Mulala khuvo yamuha tsitalanta tsirhanu, na wundi na muha tsiviri, na wundi khaandi na muha indala. Na vuli mundu yanyola khulondekhana ni tsingulu tsyuvunyali vwevwe, na mundu woyo natsya khuluchendo lwelwe. ¹⁶ Woyo waherwa tsitalanta tsirhanu yatsya vwangu na khola vukhala natsyo, na lomba tsindi tsitalanta tsirhanu. ¹⁷ Na woyo yaherwa tsitalanta tsiviri khaandi naye yakhola vukhala na lomba tsindi tsiviri. ¹⁸ Navutsa murhukwa waherwa italanta indala, yatsya nayava vwina mumalova, na visamu tsisenti tsyu Mwami wewe. ¹⁹ Mu inyinga ya mutukhu manyikhi khuvirha, mwami wa vurhukwa yavo yakalukha, nakhola livalitsa lyi myandu chyechye navo. ²⁰ Murhukwa wali wu tsitalanta tsirhanu, yitsa nalera tsindi tsirhanu. Na vola, 'Mwami wamba tsitalanta tsirhanu, hensa ndashiranyinya nu khunyola tsindi tsirhanu.'

²¹ Mwami wewe yamuvolera, "Urio muno, wakhola vulahi murhukwa musuvirifu! Yiwe uvere musuvirifu khu vindu vitititi. Ndakhuvikha khulinda vinyikh. Yinjira mu vuyansi vwu Mwami wowo."

²² Murhukwa yanyola tsitalanta tsiviri, yitsa navola, 'Mwami, wamba tsitalanta tsiviri, Hensa, ndakhola vukhala nu khelera tsindi tsiviri.'

²³ Na mukhongo wewe yamuvolera, "Urhio muno, murhukwa mulahi khaandi musuvirifu! Uvere musuvirifu khu vindu vitititi, ndakhuvikha khulinda vindu vinyikhi. Yinjira mu vuyansi vwu Mwami wowo."

²⁴ Na murumkhiri yanyola italanta indala yitsa, navola, 'Mwami, ndamayna yiwe uli mundu mutinyu, Uchesa ha wakharhaka, khaandi uvunjeritsanga ha wakhamitsa. ²⁵ Ndali nu vurhi, khu ndatsya khuvisa italanta yoyo mu vwina hasi mumalova. Hensa, khu shili vutsa ni italanta yoyo.

²⁶ Mwami we yamuvolera, 'Yiwe murhukwa mutamanu, khaandi mukara, iwe wamanya nchesanga ha ndakhamitsa, khaandi mbunjeritsanga ha ndakhasalitsa. ²⁷ Khulwayako shyuwali ulavikha tsisenti tsyanje khu vashilanyinyi na mulitsa lyanje khani ndakhanyoli tsyanje nu vukhala vulikhu. ²⁸ Khulwayako vukula italaanta indala yawali nayo ma uhane khu murhumikhi wali ni tsitalanta tsirhanu. ²⁹ Shichira khu woyo uli ni vinyikhi alametwa, ma ave navyo mbunyikhi. Na woyo ukhali navyo, khali shiti shyali nashyo shilavukulwa khurhula khuye. ³⁰ Musiuvi murhumikhi mutamanu irwanyi yeyo mushisundi, ha khwitsa khuve ni liliira nu khuteteisa mino.

³¹ Lwa Mwana wu Mundu alitsa nu vukhumi vwewe halala ni tsingerosi, nu khwikhala khu shirhumbi shyeshye shyu vwami, khaandi shitsula vukhumi. ³² Imberi wewe khulikhave na vandu vyi tsimbya tsyosi neye alikhavukhanyinye vandu mulala khurula khu wundi, khuli mwayi yavukhanyinya makondi khurula mu tsimbuli. ³³ Yitsa avikhe makondi khu mukhono kwekwe mulunji, na tsimbuli khu mukhono mukata. ³⁴ Nalwo lwu Mwami alivavolera yavo vu khu mukhono mulunji, "Hambi munye vakasitswa na Ise wanje, nyoli vwami vwa mwalomberwa munye khurhula mu lilongwa lyu muse kwi lirova. ³⁵ Shichira ndali ni insala na munye mwamba shyukhulya, ndali nu vuluhu na munye mwamba matsi, ndali mucheni na munye mwansinjiritsa, ³⁶ Ndali shyahonyo na munye mwafwala, ndali mulwale na munye mwandwalitsa nu khuninda, ndali muchela, na munye mwanchederera.

³⁷ Na valunji valakharhevule nu khuvola, "Mwami, ni lina khwakhulola nuli ni insala khu khulikhitsa, anoho nuli nuvuluhu khwa khuha matsi? ³⁸ Lina lwa khwa khulola nuli mucheni khwa khwinjiritsa anoho nuli shahonyo na khwakhufwala tsinguvu? ³⁹ Khaandi ni lina khwakhulola nuli mulwale, khwa khulinda nu khu khulwalitsa, anoho nuli muchela, khwa khuchenderera?"

⁴⁰ Na Mwami alivavoleera ndi, Mvolera ka kyrikali, khuli mwakholera mulala khu vamwavo vanje vali vatititi yava, mwakholera inse. ⁴¹ Na alikhavavolere, yavo vali khumukhono mukata, "Rhuli khu inse, munye mwalamwa, tsyi mu muliro kwi mihika ni mihika kwalomberwa Setani ni tsingerosi tsyetsye vakwa. ⁴² Shichira ndali ni insala na shyu mwamba shyukhulya, ndali nuvuluhu, navutswa shyumwamba matsi; ⁴³ Ndali mucheni navutsa shyumwansinjiritsa, ndali shyahonyo na shyu mwafwala ta, ndali mulwale khaandi nindi muvuhambe, navutsa shyu mwanjenderera nu khuninda tawe."

⁴⁴ Navo valikharhevule nukhuvola, "Mwami ni lina khwakhulola nuli ni insala, anoho nu vuluhu, anoho nuli mucheni, anoho shyahonyo, anoho mulwale, anoho muchela, na khwavula khu khurhumikhira?"

⁴⁵ Naye alikhavarhevulire, 'Ka kyirikali, muvoleranga, kamwavula khukholera khu mulala khu vatititi vanje yava, mwavula khukholera inse.' ⁴⁶ Yava valikharhule khuye nu khutsya mu likhuva shivi lyi mihika ni mihika, navutsa valunji valakhinjire mu liva mwoyo lyi mihika ni mihika."'