¹ Yesu yarhula mu litemeeri nali khu luchendo lwelwe. Vechitswi veve vitsa khuye vali ni lyenya khumumanyinya myumbakho chyi litemberi. ² Yavarhevulira nu khuvavolera, "Mulola vindu yivi vyosi tawe? Muvolera ka kyrikali, livulakhuho liichina lyachelekhwa khu lindi lilikhavule khusavulanyinywa."

³ Lwa yali niyikhale khu shikulu shya Misayituni, vechitswi veve vamwitsira ha vwivisu ni va murheva, "Khuvolere vindu yivi vitsa vikholekhe lina? Shimanyinyiro shyi likalukha lyolyo shitsa shive ni shina, na sheheri shilava lina?"

⁴ Yesu yavarhevula navavolera, "Hensi mundu akhavakata nukhava koritsa tawe. ⁵ Shichira vanyikhi valitsa ni lirha lyanje, nivavola, inse ndi Kristo navo vitsa vakate vanyikhi. ⁶ Mulahuliramakhuva ki lihe nu vulwani vwa mahe. Muhense mukhahendi mwoyo tawe, shichira vindu yivi khutukha vikholekhe; navutsa shiheri shilava shishiri khutukha. ⁷ Shichira shivala shilarhula khulwana ni shivala shindi, na vwami vulavukhirana nu vwami vundi, khwitsa khuveho ni insala khaandi nilitechera lyi shivala mutsimbeka lukanu lukanu. ⁸ Navutsa yako kosi ni lirhanga lyu khulumwa khuli mukhali yenya khwivula. ⁹ Inyinga yene yeyo vala mutsama mutukhe khukhuvitswa shivi nu khwirwa. Namunye mulava vandu vukhutunyirwa ni tsihiri tsyosi shichra lirha lyanje. ¹⁰ Vanyikhi valisikarhala, na valatsamana nu khulekana. ¹¹ Valarhulila ho vaporofeti vanyikhi vuvuvehi nu khukoritsa vanyikhi. ¹² Shichira mahyolo kalametekha, vuyansi vwa vanyikhi vulatsilira. ¹³ Navutsa woyo ulikhutsira khutukha limala, neye alihona. ¹⁴ Na makhuva malahi kwu vwami ilirwatswa mu lirova lyosi, ive shirolekhitso khu tsihiri tsyosi, na shiheri shyi latukha.

¹⁵ Khulwayako, lwa mulola livihiritswa lyu vwononi, yelo lya volwa nu muporofeti Danyeli, lisinjire hatakatifu woyo usomanga amanye, ¹⁶ yavo vali mu Yudeya virukhire mu shikulu; ¹⁷ Na woyo uli ikulu khu shisekese shyi insu avule khwikha khuvukula vindu vyu munsu mwemwe. ¹⁸ Na woyo uli mu mulimi irwanyi avule khukalukha inyuma khuvukula tsinguvu tsyetyse. ¹⁹ Vulikhave vutinyu khu yavo vahelitsa na yavo va nunyinyanga mu tsinyinga tsyene yetso. ²⁰ Musaale, lyirukhaka lyenyu livule khuva mu inyinga yu vushindu anoho litukhu li lisabato. ²¹ Shichira mu nyinga yeyo khulava ni linyakhana linyikhi lishishiri khulolekhakhu khurhula mwirhanga lyi lirova khutukha lwene yulu khaandi shilikhavekhuho khaandi tawe. ²² Matukhu yako kalavula khuchehitswa, shiyakhavelekhuho wu muviri wosi khali mulala wakhahoni; navutsa shichira varhovole kalachehitswa matukhu yako. ²³ Mu tsinyinga yetso mundu na khuvolera; "Hensa Kristo ali hanu, anoho Kristo ali yaho," mu khasuviri. ²⁴ Shichira valarulira makristo kuvuvehi, na vaporofeti vu vuvehi, valarhulitsa virolekhitso vikali vyukhuchenyinya; vanyole khukoritsa khali, yavo vali varhovole. ²⁵ Hensi, mmali khuvavolera nu kushiri. ²⁶ Niva valavavolera, ali mu shangalangwe; mukhatsyayo ta; ali munsu, mukhasuviri. ²⁷ Shichira khuli luheni lurhulanga Ivukwi, lulolekhana khutukha Imatioli, ni ndyo kitsa kave mulitsa lyelye Mwana wu Mundu. ²⁸ Shichira hosi hakhuli ni inyama ikhutsi, hawene yaho naho hi tsintitso tsivunjelitsa.

²⁹ Navutsa liitambitswa lyitsinyinga yetso ni lyakhawa, lyuva lilitsa khukwa shisundi, mweli kwitsa kwakhe tawe, tsing'ereng'ani tsitsa tsikwi khurhula mwikulu, tsingulu tsyu mwikulu tsitsa khunuywanyinywa. ³⁰ Shirolekhitso shyu Mwana wu Mundu shitsa shilolekhe mwikulu, na tsihiri tsyosi mulirova tsitsa tsilire, Vitsa valole Mwana wu Mundu ni yitsanga mu malesi ni tsingulu tsingali nu vukhumi vukali. ³¹ Alakharhume tsingerosi tsyetsye nu muhumu mukali kwi shisiliva, na valakhavunjeritse halala varhovole veve, khurhula tsimbeka tsyosi tsinne tsi likulu.

³² Mweke khuvirhira khu musala ku mukhuyu. Lwi tsisya tsyakwo tsirhanga khumera masambu matoro, mwanse khumanya inyinga yi shimiyu yiri himbi. ³³ Munye khaandi, lwa mulola vindu yivi vyosi, mu manye ali himbi, ha shilivwa. ³⁴ Ka kyirikali muvolera, likhula yiri shyililavirha khutukha vindu yivi vyosi vikholelekhe. ³⁵ Likulu ni lirova vilavirha, navutsa makhuva kanje shilavira tawe. ³⁶ Navutsa litukhu yero ni isa yeyo shyaliho nu mundu umanyi, shyavali tsingerosi tsyu mwikulu, anoho Mwana, navutsa Ise wanje wonyene. ³⁷ Khuli lwa kali mu matukhu ka Nuhu, khaandi ni ndyo kalitsa khuva mu inyinga yilitsa lyu Mwana wu Mundu. ³⁸ Khali imbula nishiri khukhuva ni michelera, matukhu ka Nuhu, khwaliho nililya, ni ling'wa, liserelana nu khuhirana khutuka litukhu lya Nuhu yinjira mu lyarho, ³⁹ na vandu shivamanyakhu shyosi shakholekhana tawe, khutukha lwi michelera chyi imbula charhanga khuhira vandu- khaandi ni ndyo kalitsa khuva mulitsa lyu Mwana wu Mundu. ⁴⁰ Vandu vaviri valava ni vali mu mulimi, mulala alavukulwa; na wundi alarikala. ⁴¹ Vandu vakhali vaviri valava ni vali muluchina vasyetsanga, mulala alvukulwa, na wundi alarikala. ⁴² Khulwayako mu menye mu lilinda, shichira shyu mumanyi ni litukhu shina lyu Mwami wenyu alitsa. ⁴³ Navutswa mu manye yaka, niva mwene insu yakhamanyi inyinga yu mwivi yitsanga, yakhalindi, nu khuhenseritsa insu yeye vivi khuvula khupomola nu khwinjiramu. ⁴⁴ Khulwayako, munye muve virhechekhe, shichira isa yuvula khukanakana nayo yu Mwana wu Mundu alitsa.

⁴⁵ Nu wina murumikhi mulahi na wukhusuvirwa, na wuvucheri, wu mwami wewe yavikha khusinjirira vahinsiri veve nu khuvaha shyukhulya lwi tsisa tsitukhanga? ⁴⁶ Ali ni tsikhavi muhinsiri wu mwami wewe alinyola na kholanga ndyo lwa alitsa. ⁴⁷ Kakyirikali muvolera ndi mwami alamuvikha khuva mwimiriri wi myandu chye chyosi. ⁴⁸ Navutsa niva muhinsiri mutamanu, alavola mu mwoyo kwekwe, "Mwami wanje atsitsa khuchereva khukalukha inyinga intambi," ⁴⁹ ma arhange khukhuva vahinsiri veshyenye, nu khulya halala nu khutanda, ⁵⁰ lwa mwami wewe yitsa khukalukha khulitukhu ni isa yu muhinsiri woyo akhamanyi. ⁵¹ Mwami wewe alakha rheme vitonye nu khumuvikha halala na vakati, hitsa have ni liilira nu khuteteitsa mino.