¹ Yesu yamanya na lomoloma nu mukanda halala na vechitswi veve. ² Navola, "Vahandichi na vafarisayo vikhalanga mu shisako shya Musa: ³ Khulwayako shyosi shya vavalaka mukhole khaandi mukalonde. Navutsa mukhakholi khuli yavo vakholanga tawe, shichira vavola vindu navutsa shyi vavikholanga tawe. ⁴ Vatyukhanga vandu misiko militoho chya vene vavula khunyalitsa khuchinga tawe, vachyivikha khu maveka ka vandu. Navo vene shyivanyala khali khukumirakhu ni shitere shyavo tawe. ⁵ Vakhola vikholwa vyavo khulolekha khu vandu. Shichira vivohanga mishipi chya mahandiko kalikhu khuvweni vwavo, nukhu makhono kavo khaandi varambihitsanga lupindo lwi tsikanso tsyavo. ⁶ Khaandi va yansanga vwiyangu vwahikulu mu vyikhalo vwivilirwa, khaandi mu virhumbi vya hamberi mu masinakochi. ⁷ Vayansanga khuherwa mirembe chyu luyali mu shirhu, khaandi khulangwa mira kuvukhongo vwavo "Mwechitsi" na vandu. ⁸ Navutswa munye mukhenya mulangwe "Mwechitsi" shichira muli nu mwechitsi mulala, nali Kristo na munye muli vamwavo. ⁹ Mukhalanga mundu wosi khulirova "baba" shichira muli na Baba mulala wonyene ali Mwikulu. ¹⁰ Khali na munye mukhalangwi "Mweechitsi," shichira muli nu Mwechitsi mulala, nali Kristo. ¹¹ Navutsa woyo ali mukali mu munye alava murhumikhi khu munye. ¹² Na wosi wichinjiriranga alachehitswa, na woyo wichehitsanga alachingulwa.

¹³ Nuvutinyu khu munye, vahandichi na Vafarisayo, vakati! Mwikalanga mulyango kwu vwami vwu mwikulu mutsimoni tsya vandu. Shichira munye vene shyu mwinjiramu, khaandi shyumwenyera yavo venya khwinjira vinjeremu. ¹⁴ Muli khu vutinyu munye vahandichi na Vafarisayo, vakati! Mulitsanga myandu nu khuchyimala mu tsinsu tsya vakhunsakhali, nu mwikhola musaalamu lisaala lirhambi, khulwayako mulikhanyole lisalilitswa likali. ¹⁵ Muli nu vutinyu munye vahandichi na Vafarisayo, munye vakati! Mwambukhanga inyansa nu mutsya mu lirova, khutsya khuluva mundu mulala, na lwa kholekha mulala khu munye, mumulomba khuva mwana wu mu shihatisi hali khaviri khuvirha munye vene.

¹⁶ Nuvutinyu khu munye, vimiriri va vavekhu, munye muvolanga, 'Woyo yisuha khu litemberi, ni vutswa. Navutsa woyo yisuha khu itsahapu yu mu litemberi, ali ni likovi li shivoho shilisuha lyelye.' ¹⁷ Munye vavekhu vasiro! Shikali khu vindu viviri yevo ni shilena? Itsahapu anoho litemberi lilomba itsahapu ive intakase? ¹⁸ Khaandi, 'Woyo yisuha khu vwali, ni vutswa. Navutsa mundu wosi yisuhanga ni shihanwa shyu khu vwali, ni muvohe khulisuha lyelye.' ¹⁹ Munye vandu vavekhu, ni shilena shilikhu shikali, ni shihanwa anoho ni vwali vutakasanga shihanwa? ²⁰ Khulwayako mundu wosi wisuhanga khu vwali, yisuhiranga vwali ni vyosi vilikhu. ²¹ Woyo wisuhanga khu litemberi yisuha khulitemberi nu khu woyo umenyimu. ²² Na woyo wisuhaanga khu liikulu yisuha khu shirhumbi shya Nyasaye na khaandi khu woyo wikhalakhu.

²³ Muli khuvutinyu, munye vechitsi va Malako na Vafarisayo, vakati! Shichira murhulitsanga shitonye shyi shirala mu likhomi shi vindu vitititi khuli shy itania, shyi itangausi ni shyi livokoyi navutsa mwalekha khukhola vikholwa vyitsingulu mu Malako khuli vulunji, ni tsimbavasi khaandi vusuvirifu. Mwenyekha mukakhole kosi vuchira khulekha vikholwa kandi. ²⁴ Munye vimiriri vavekhu, va murulitsanga isuna mu shya mung'wetsnga navutswa mu miranga ingamia!

²⁵ Muli khu vutinyu, munye vahandichi na Vafarisayo, vakati! Shichira mwokitsa shikombe irwanyi khaandi isahani, na mulekha mukarhi mwayitsula vunuli ni lyenya litamanu. ²⁶ Munye Vafarisayo vavekhu! Murhange khwokitsa mukarhi mwi shikombe khaandi isahani, khulero mumale nu khwokitsa irwanyi.

²⁷ Muli nu vutinyu, munye Vafarisayo na vahandichi, vakati! Shichira muli khuli vilindwa vya vekhwa iranji indavu irwanyi, vamulolekha vanihu irwanyi navutsa mukarhi ni vikumba vya vakhutsu ni indakala ikundanga. ²⁸ Mu injira indala nsere, mulolekha irwanyi khuva valunji khu vandu, navutsa mukarhi mwayitsula vukati ni limunaka Malako.

²⁹ Muli khuvutinyu, munye vechitsi va Malako, na vahandichi, vakati! Shichira mumbakha vilindwa vya vaporofeti nu munihitsa vilindwa vya valunji. ³⁰ Muvola, khwa khamenyi mutsinyinga tsya vaise verhu, shyu khwa khasanji khurakhitsa masahi ska vaporofeti khuli vakhola. ³¹ Khulwayako mwihanira lirolekhitsa lyenyu ndi muli vana va yavo vira vaporofeti. ³² Mwitsulitse shichero shyu vwooni vwa vaise venyu. ³³ Munye tsinsukha, likhula lyi vihirikomo, munyala khwihonolokha ndi likhalachirwa lyu mu shihatiisi? ³⁴ Khulwayako, hensi, murhumira vaporofeti na vacheri na vahandichi. Valala khuvo mulavira nu khuvavamba, na vandi mwitsa muvashute masinakochi kenyu nu khuva khunga khurhula mwitaala mwavali khutsya mwitala lindi. ³⁵ Khulwayako shisalya shya masahi ka valunji vosi varakhitsaa hasi hanu, khurhula khu shisahi shya Abili, woyo wakhali nu vwoni, khutukha khu Zakalia mwana wa Berekia, woyo wa mwirira mulitemberi nali hakarhi hu vwali na hatakatifu. ³⁶ Ka kyirikali mu volera, yaka kosi kalavatukhira vandu vyi likhula yiri.

³⁷ "Yerusalemi, Yerusalemi, ive wirhanga vaporofeti nu khuvalasa machina yavo varhumangwa khu yiwe! Ni khanga ndajeritsa khuvunjeritsa halala vana vovo, khuli lwi ingokho inyavuli ivunjeritsa viminyoli halala mutsyimbaha tsyetsye, navutsa shyu wenya ta! ³⁸ Hensa insu yoyo imali khulekhwa khwiwe mwene nili insere nu khung'anywa. ³⁹ Shicira khuvoleranga, shyu mulandolakhu khaandi khurhula lwene yulu, khutukha lwa nu muvole, "Ali nu vukasu woyo witsanga mu lirha lyu Mwami."