¹ Yesu ya lomoloma navo khaandi mu tsinkanu, na vola: ² Vwami vwu mwikulu vuli khuli mwami mulala yalomba shiserero shyu mwana wewe muyayi. ³ Narhuma vahinsiri veve khulanga vacheni vali valangwa mushiserero, navutsa shyi vitsa tawe. ⁴ Khaandi mwami yahuma vahinsiri vandi, navola, 'Volera yavo va ndalanga, "Hensi mali khutekha vyukhulya. Tsichirishi ni tsing'ombe tsyanje tsikhomeru tsisinsirwe khale, na vuli shindu shirechekhe. Hambi mu lilya lyu mu shiserero." ⁵ Navutsa shivahulikhitsa khu tawe, nikhali vasamula khu mihinsi chyavo, mulala yatsya mu mulimi mwemwe, na wundi khu vukhala vwevwe. ⁶ Navandi vakumira vahinsiri vu mwami ni vavasalilitsa, nu khuvira. ⁷ Mwami woyo ya vukula vurhima nu rhuma vasikali veve khutysa khwira valumindi yavo nu khusamba litaala lyavo. ⁸ Yamanya na volera vahinsiri veve, shiserero shitukhi, na yavo valangwa shivali vatukhananga tawe. ⁹ Khulwayako tsi mu masanganjira kyi mihanda, mulange vandu vanyikhi khuli munyala, ma muvinjiritse mu shiserero. ¹⁰ Vahinsiri vatsya khu mihanda, nu khuvunjeritsa vandu vosi vavanyola, vatamanu na valahi: khu insu yi shiserero shyitsula vacheni. ¹¹ Lwu mwami yitsa khulola vacheni, ya lolamu mundu mulala yakhali ni tsinguvu tsyu mu shiserero. ¹² Na mwami ya murheva, 'Mulina yiwe, witsi ndina munu vuchira inguvu yi shiserero?' Navutsa naye shiyali ni lyukhuvola ta. ¹³ Mwami yamanya na volera vahinsiri veve, 'Muvohi makhono ni virenje, mu murhulitse irwanyi nu khu musyuva mu shisundi, ha nakhuve nu khulira nu khuteteitsa mino.' ¹⁴ Shichira vanyikhi valaangwa, navutsa vatititi navo varhovolwa.

¹⁵ Na Vafarisayo vamanya varhule irwanyi khutsya khulokhitsa khuli vanyala khureka Yesu mu makhuva keke mwene. ¹⁶ Vamanya va murhumire vechitswi vavo, nivali halala na Vaherode. Niva volera Yesu, "Mwechitsi, khwamanya yiwe ni wa ka kyirikali, khaandi wekitsanga injira ya Nyasaye mu vwa kyirikali. Khaandi shyu henderanga mwoyo ka vandu va volanga tawe, shichira shyu hensanga khuli mundu ali khaandi shyuli niliyansilira vandu valala ni lyavukhanyiya tawe. ¹⁷ Khulwayako khuvolere, ukanakana shina? Nililako mundu khuhana vushuru khu kayisali, anoho tawe?"

¹⁸ Navutsa Yesu yamanya vali ni inkanakani intamanu, na vavolera, "Shichira shina mwitsi khunjeritsa, munye vakati? ¹⁹ Mmanyinyi ling'ondo lyu vushuru." Nivamulerhera idenari. ²⁰ Na Yesu ya varheva, "Ni likondo ni lirha lya wina viri khu ling'ondo yiri?"

²¹ Na vamurhevulira, "Ni ya Kayisale." Na Yesu ya vavolera, "Khulwayako hani khu Kayisale vya Kayisale na hani khu Nyasaye vya Nyasaye." ²² Lwa va hulira yaka, vachenya. Na vamulekha nu khulekhana naye.

²³ Mulitukhu lyene yero Vasadukayo vitsa khuye, yava navo vavolanga shahaliho ni lisimukukhitswa, ni va murheva, ²⁴ ni vavola, "Mwekitsi, Musa yavola, mundu musatsa na khutsi, na khali nu mwana, amwavo wewe, alakalukhitsa mukhali wewe ma amwivulire vana. ²⁵ Khwaliho na vamwavo saba, wukhurhanga, lwa yali ni ya khaserera mukhali, yakhutsa, na vuchira khunyola khu mwana wosi, na lekha mukhali wewe khu amwavo wewe. ²⁶ Malala mere kyikholekha khu wa khaviri, nu wa khavaka, kutukha khu wa kharhanu na vaviri. ²⁷ Ma lwu khumalilikha khuvosi, mukhali wene woyo yakhutsa khaandi. ²⁸ Khu lwayako mu litukhu lyu khusimukukhitswa, yitsa ave mukhali wa wina khu vamwavo saba yava? Shichira vosi vali vasatsa veve."

²⁹ Yesu yarhevulira, "Mwakorha, shichira shyu mwamanya Mahandiko Matakatifu, anoho tsingulu tsya Nyasaye tawe. ³⁰ Mulisimukhitswa, shyi vasererananga nu khuhira anoho khuhirwa. Navutsa, vali khuli tsingerosi tsya Nyasaye mwikulu. ³¹ Navutswa khulondekhana ni lisimukhitswa lya vakhutsu, shyu mwasoma kavolwa khu munye na Nyasaye, na volanga ³² "Inse ni Nyasaye wa Aburahamu, Nyasaye wa Isaka, khaandi Nyasaye wa Yakobo? Nyasaye shyali Nyasaye wa vakhutsu tawe, navutsa wa vali mwoyo. ³³ Lwu mukanda kwahulira makhuva yaka, vachenyinywa, khu mekitso keke.

³⁴ Na lwa Vafarisayo vahulira, Yesu ashiring'anyinye Vasadukayo, vivunjeritsa halala. ³⁵ Mulala khuvo, nali mwekitsi wa Malako, yamurheva lirhevo, khumuchelitsa, navola, ³⁶ "Mwechitsi, lilako shina likali mu Malako kosi?

³⁷ Yesu ya muvolera, "Uyanse Mwami Nyasaye wowo nu mwoyo kwokwo kwosi, ni vulamu vwovwo vwosi, ni tsinkanakani tsyotsyo tsyosi. ³⁸ Yiri nalyo lilako lyu khurhanga khaandi likali mu Malako kosi. ³⁹ Lya khaviri lisesana nalyo, Uy'anse murende wowo khuli wi yansanga yiwe mwene. ⁴⁰ Khu Malako kaviri yaka nako ka malakoka musa na vaporofeti kasinjirakhu."

⁴¹ Lwa vafarisayo vali nivashivunjelitse halala, Yesu ya varheva lirhevo. ⁴² Na vola, "Munye "Mukanakana shina khulondekhana khu Kristo? Ni Mwana wa wina?" Va muvolera ni, "Mwana wa Daudi."

⁴³ Yamanya avavolere, "Ka khava ndina Daudi nali mu Roho ya mulanga Mwami, lwa ya vola, ⁴⁵ Niva Daudi amulanga 'Mwami,' nave ndina mwana wewe?" ⁴⁶ Shiyaliho nu mundu yamurevulirakhu likuva lyosi tawe, na shiyaliho nu mundu wosi yajelits khumurheva khu marhevo khurhula litukhu lyene yero.