¹ Na lwavali ni vali himbi khutukha Yerusalemi, vatukha Betsifake, mu shikulu shya Mitseituni na Yesu ya varhuma vechitswi vaviri, ² na va volera, "Tsyi mu mukitsi kulondakhu, na vwangu mu lanyola isukhiri ivoherwe halala ni shimoli shyayo: munderere. ³ Na mundu namureeva, mu muvolere Mwami avyenyanga, na alavaha mwitse na tsyo."

⁴ Na yaka kaholekha ka tukhe khu rwekhitswa kavolwa nu muporofeti, lwa yavola, ⁵ "Volera vakhana va Siyoni, hensi Mwamihi wowo yitsa khu yiwe, yikhale khu isukhiri nu khu shyi shomoli shyi isukhiri."

⁶ Na vechitswi vatsya, ni vakhola khuli Yesu yali na vavolera, ⁷ Ni valerha isukhiri ni shimoli shyi isukhiri, niva vikhakhu tsinguvu tsyavo, ma ni yikhala khu. ⁸ Na vanyikhi mu mukanda mukali vala tsinguvu tsyavo khunjira: vandi ni varhema tsisia khu misala ni vala khunjira. ⁹ Mukanda kwimira imberi wa Yesu na kundi kulondakhu ni valanjiritsa nu khuvola, "Hosanna khu Mwana wa Daudi! Ali nu vukasu wuyu witsanga mu lirha lyu Mwami; Hosanna mwikulu."

¹⁰ Lwa Yesu ya tukha mu Yerusalemi, litaala lyosi lyavukha, ni varheva, wuyu nu wina?

¹¹ Mukanda kwoosi kwavola, "Wuyu ni Yesu muporofeti wa Natsaleti yikalilaya."

¹² Yesu yinjira mu litemberi. Na va khunganyinya vandu vosi vali ni va kulitsanga nu khu kula vindu mu litemberi, na kunamula tsimesa tsya vashiranyinyi vi tsisenti, nakunamula visako vya vakulitsi vi vituti. ¹³ Nava volera, "kahidikwa, Insu yanje ila langwa insu yi liisaala, navutsa munye mujikholi khuva luhangaywa lwa vanuli."

¹⁴ Na vavekhu na valema vitsa khuye mu litemberi na va honyinya. ¹⁵ Navutsa lwa vasalisi na vahandichi valola vindu vyu khu chenyinya vya yakhola, na vana ni vahansukha mu litemberi, ni va vola, "Hosanna khu Mwana wa Daudi," vamanya niva vihilirwa.

¹⁶ Ni vamuvolera, shyu hulira ka yava vavolanga? Na Yesu yavavolera, "Yee, shyu mwasoma, mu minwa chya vana na va nunanga, ulalomba litsominya lya kyirikali?

¹⁷ Na Yesu ya valekha na tsya irwanyi wi litaala, khutsya mwitaala lya Bethani na kona iwene yeyo.

¹⁸ Mukamba kwene lwa yakalukha mulitaala lya Yerusalemi, yali ni insala. ¹⁹ Lwa yalola musala ku mukhuyu haluveka lwu muhanda, yatsya khukwo, na shiyanyolakhu shindu, navutsa masambu mere, na kuvolera, "Mukhuyu makhuyu kakhama khuyive khaandi khurhula nundi ni mihika chyosi", naho noho mukhuyu yoko kwaniala.

²⁰ Lwa vechitswi vakulola, vachenya, ni vavola, mukhuyu kuniali ndina vwangu.

²¹ Yesu yarhevula na vavolera ndi, ka kyirikali muvolera munye nu muva ni lisuuvira, na muvule khuhayahayitsa, shyumulakhola vutsa yaka kakholekhe khu mukhuyu vava, navutsa khaandi mulavolera shikulu yishi, rhula yaha na usiuvwe mu inyansa, na kalakholeha ndyo. ²² Na khu vindu vyosi vya murheva mu lisaala, nu musuuvira, mulanyola.

²³ Na lwayali ni yitsanga mu litemberi vasalisi vakali na vakhulundu va vandu vitsa khuye naye niyechitsanga, ni vavola nu khu vunyali shina ive ukholeramu vindu yivi? Na ni wina yakhuha vunyali yuvu?

²⁴ Na Yesu yarhevula na vavolera, na inse ndavarheva shindu shilala, nu mumbolera khaandi inse ndamuvolera ni khu vunyali shina vwa kholeramu vindu yivi. ²⁵ Libatisa lya Yuhana- lyarhula hena? Lyarhula mwikulu, anoho lyarhula khu vandu? Navo vakanakana, ni vavola, ni khuvola, 'lyarhula mwikulu,' alakhuvolera shichira shina khwavula khumusuuvira? ²⁶ Na nu khuvola, 'Lyarhula khu vandu,' khwarhia mukanda, shichira vandu vosi vavola Yuhana nu muporofeti." ²⁷ Varhevula nivavolera Yesu, "Shyukhumanyi tawe." Neye ya vavolera, "Khaandi inse shindavavolera ni khu vunyali shina vwa kholera vindu yivi. ²⁸ Navutsa mukanakana shina? Mundu mulala yali na vana vaviri vayayi, yitsa khu wu khurhanga na muvolera, 'Mwikhula usamule nundi mu mulimi.'

²⁹ "Navutswa muyayi wuyu yamurhevulira navola, 'Nsitsa tawe,' na lwinyuma yakalukhanyinya tsinganakani nasamula.

³⁰ Khaandi yatsya khu mwikhula wewe wa khaviri na muvolera khaandi ndyo, narhevula na muvolera, 'Ndatsya, mwami,' navutswa shiyatsya khu tawe. ³¹ Uli alena khu vaviri yavo yakhola vulaliri vwa ise wewe?" Vamuvolera, "Wu khurhanga." Yesu ya va volera, "Ka kyirikali va volera munye, vasololi vu vusuru na vaheyi valitsa khwinjira mu vwami vwa Nyasaye imberi wenyu. ³² Shichira Yuhana yitsa khu munye khu injira yu vulunji na shimwamusuuvira: Navutsa vasololi na vaheyi va musuvira: na munye, lwa mwalola yaka, shyumwikanira lwinyuma, mutukhe khusuvira muye.

³³ Huliri khu lukanu lundi yulu. Khwaliho nu mundu, neye yali nu mulimi, yarhaka misabibu, niyeva khu lukaka, nayava vwina vukhukhamiramu vyu khulomberemu idivai, ni yumbakha munara, na hana khu vahinsiri ma natsya mu shivala shyi ihale. ³⁴ Na lwa inyinga yu khuchesa makhuyu yali ni tukhi, yarhuma varhukwa veve khu vahinsiri, vavukule misabibu chyechye khuvo. ³⁵ Na vahinsiri vavukula varhukwa, ni vakhupa mulala, nivira wundi, na wundi ni vamulasa na machina. ³⁶ Khaandi mwene mulimi yarhuma varhukwa vandi vanyikhi khuvirha vu khurhanga, ni va vakholera ndyo khaandi. ³⁷ Navutsa lwi inyuma yarhuma mwana wewe, navola, "Valarhia mwana wanje."

³⁸ Navutswa lwa vahinsiri valola mwana, vavolerana vene khu vene. "Wuyu neye mwunguli wi myandu. Hambi, khumwire ma khuvukule myandu chyeche." ³⁹ Khu vamukumira, ni vamurulitsa irwanyi wu mulimi kwi misabibu, ni va mwira. ⁴⁰ Lwa mwene mulimi kwi misabibu yitsa, alakhola shina khu vahinsiri yavo?"

⁴¹ Vamuvolera, "Alononyinya vandu va tamanu yavo nu vululu, na alahana mulimi kwekwe kwi misabibu khu vandi, vanyala khulera makhuyu khu inyinga yilichesa."

⁴² Yesu ya vavolera, "Shyu mwasoma mu Mahandiko Matakatifu, 'Lichina lya vumbakhi vambakhana, lyakwa nalyo lichina lyu mukona yinsu. Yaka karhula khu Mwami, khaandi ni khuchenyinya mu tsimoni tsyerhu'?

⁴³ Khulwayako muvolera munye, vwami vwa Nyasaye vularhultswa khumunye na vuherwe khu ihiri yaminya makhuyu kavwo. ⁴⁴ Na khu wosi ulikwa khulichina yiri alamunikhana: na khuvosi wa likwiira, lilamusia. ⁴⁵ Lwa vasalisi vakali na Vafarisayo vahulira tsinkanu tsyetsye, vamanya avola khuvo. ⁴⁶ Lwa venya khumukumira, varhia mukanda, shichira mukanda kwa muvukula khuva muporofeti.