¹ Khu vwami vwu mwikulu vulafwananyinywa nu mundu mwene mulimi, yarhula mukamba tsuli khu khava vahinsiri mu mulimi kwi misabibu. ² Lwa yamala khulakana na vahinsiri mirhungu chya vuli litukhu, yavarhuma mu mulimi kwekwe kwi misabibu. ³ Yarhula khaandi khu isaa ikhola tsivaka, na lola vandi vasinjire mu shiru. ⁴ Khaandi yavavolera, 'Mutsi mu mulimi kwi misabibu, ndamurhunga matanyi kenyu.' Navo vasamula. ⁵ Khaandi khutukha isa ya sa sita, khaandi isa ya sa tisa nahandika vahinsiri vandi khutsya mu mulimi. ⁶ Khaandi khu isa ikhola likhomi ni indala, yanyola vandi vasinjire vuchira mihinsi, na navarheva, shichira shina musinjire yaha litukhu lyosi vuchira khuyinsira?

⁷ Navo vamuvolera, "shichira shaliho nu mundu ukhusamulitse ta," Naye yavavolera, Samuli mu mulimi kwi misabibu.' ⁸ Lwa hamukolova hatukha, Mwene mulimi kwi misabibu yavolera musinjiriri wewe, 'Langa vahinsiri, na uvahe mirhungu chyavo khurhula wu khumala khutukha khu wukhurhanga.

⁹ Na lwa vitsa vasamulitswa khu isa ikhola likhomi ni indala vanyola vuli mundu murhungu kwi idenari. ¹⁰ Lwa vimberi vitsa, vakanakana valanyola mirhungu minyikhi, navutsa vanyoola idenari idala shya mulala. ¹¹ Ni va khamala khonyola mirhungu chyavo, vimonya khuli mwene mulimi yali na varhunji. ¹² NI va vola, "Vahinsiri vasamule inyuma hamukolova vahinsire isa indala yonyene, navutsa uvalekhanyinye na khutse vukhuranga, vakhuchinji vulitoho vwu mihinsi nu khusambwa ni lyuva mmbasu kwosi.

¹³ Navutsa yarhevula na volera mulala khuvo, Mulina, shikhukholere vutamanu ta. Shikhulakane mirhungu chyi idenari indala? ¹⁴ Vukula shiri shyoshyo, na utsi. Ndoli mbane mirhungu shilala khu vahinsiri vasamulitse mulimala khuli lwa varhunji. ¹⁵ Shivuli vulahi inse khole khuli nyansi khu vindu vyanje? Anoho ushendekhanga shichira ndi mulahi? ¹⁶ Khu vu khumala valakhave vu khurhanga, na vu khurhanga valakhave vu khumala. Shichira vanyikhi valankwa, navutsa varhovole ni vati.

¹⁷ Lwa Yesu yali natsitsanga Yerusalemi, yahira vechitswi veve likhomi na vaviri haluveka hi injira, na vavolera, ¹⁸ "Hensi, khutsitsanga Yerusalemi, na Mwana wu Mundu alatsamwa khu vasalisi vakali nu khu vahandichi. Navo valamukhalachira likhutsa, ¹⁹ na valamuhana khu vyi tsihiri va mukholere shihenyehenye nu khumuhula mishaliti nu khu muvamba. Navutsa litukhu lya khavaka alasimukukha."

²⁰ Hene yaho nyina wa vikhula va sividayo yitsa khu Yesu nali na vana veve nu khumwinamira nareva shindu khuye. ²¹ Yesu yamurheva, "Wenya shina? Neye ya muvolera, "Uhane lilako vana vanje vaviri yava vikhale, mulala khu mukhono kwokwo mulunji na wundi khu mukhono kwokwo mukhali mu vwami vwovwo."

²² Navutswa Yesu yarhevula na muvolera, "Shyumanyi shyurheva tawe. Munye munyala khung'wa shikombe shyandi himbi khung'wera mu? Vamuvolera, "Khutse khula nyala."

²³ Neye ya vavolera, "Mulang'wa likali mu shikombe shyanje, na mubatiswe mu libatiswa lya mbatiswa mu, navutsa khwikhala khu mukhono mulunji kwanje, nu khumukhono mukhali kwanje, shuvuli vunyali vwanje khuhana, navutsa vulahanwa khuyava valomberwa na Ise wanje." ²⁴ Na lwa vechitswi vali likhomi vahulira yaka, vavihiritswa na vamwavo vaviri yava. ²⁵ Navutswa Yesu ya valanga khuye, navavolera, "Munye mwamanya vamihi vyi tsihiri vamihanga ni tsingulu khumunye na vamanyinya vunyali khu munye. ²⁶ Navutsa shikali ndyo khumunye, khu vosi wenya khuva mukali khu munye khutukha ave murhumikhiri wenyu, ²⁷ Na khu vosi wenya khuva mwimiriri wenyu khutukha ave murhukwa wenyu, ²⁸ na khuli Maana wu Mundu shiyitsa khurhumikhirwa, navutsa arhumikhe, khaandi ahane liva mwoyo lyelye live lirhunjiro lya vanyikhi."

²⁹ Lwa varhula Jeriko, mukanda mukali kwa mulonda. ³⁰ Na, hensa vavekhu vaviri vasatsa vali ni vikhale khunjira khulujinga, lwa vahulira Yesu avirhanga himbi, ni vavola, Mwami, Mwana wa Daudi, ukhuvere tsimbavasi." ³¹ Na mukanda kwa vakondekhera, nivavavolera vashiling'ane, navutswa vahansukha vutinyu likali, nivavola, "Mwami, mwana wa Daudi, ukhuvere tsimbavasi."

³² Khaandi Yesu yasinjira, navalanga, na vola, "Mwenya mukholere shina?"

³³ Ni va muvolera, "Mwami khwenya tsimoni tsyerhu tsikukhe." ³⁴ Khu Yesu yavalolera tsimbavasi navatira mutsimoni tsyavo: noho naho tsimoni tsya lilola, na ni vamulonda.