¹ Na lwa Yesu yali ya khamala makhuva yaka, yarhula igalilaya, nu khutsya mu shivala shya Yudeya, injerekha wu muchera kwa Yorotani. ² Mukanda mukali kwa mulonda neye ya vahonyinya iwene yeyo.

³ Vafarisayo va mwitsira khumucheritsa, nu khumurheva, "Ni khu Malako mundu khukhunga mukhali wewe khu lwi shivune shyosi?"

⁴ Yesu yavarhevulira, na vavolera, "Shyu mwasoma ha kavola, woyo wavalomba khurhula mwirhanga yavalomba musatsa nu mukhali? ⁵ Woyo wavalomba yavola khaandi, "Shichira yaka, musatsa alalekha Ise wewe na nyina wewe, nu khuhambana nu mukhali wewe, na vaviri yavo, valakholekha muviri mulala. ⁶ Khu lwayako shivali khaandi vaviri tawe, navutsa muviri mulala. Khulwayako shya Nyasaye amali khuhambanyinya halala, akhavaho nu mundu wu khwavavukhanyinya."

⁷ Navo va murheva, "Shichira shina Musa yavikha lilako mukhali aherwe ipalwa yu khumwavukhanyinya alero akhunganyinywe."

⁸ Neye yavavolera, "Kali khurhulana khu vutinyu vwi myoyo chyenyu, Musa ya viyamira khu khunga vakhali venyu, navutsa khurhula mulirhanga shikali ndyo tawe. ⁹ Inse muvoleranga, wosi ukhunga mukhali wewe, ni kakhali shichira vuheyi, nu khuhira wundi, akhola vuheyi. Na woyo umulera umali khulekhwa akhola vuheyi."

¹⁰ Vechitswi vamanya vavolere Yesu, "Niva kene yako nako kaliho hakarhi hu musatsa nu mukhali wewe, nuvulahi khuvula khuhira."

¹¹ Na Yesu yavavolera, Shyivali vosi vanyala khwiyama makhuva yaka, ni kakhali khuyavo vaherwa na Nyasaye. ¹² Valiho vitsiri vivulwa khurhula munda mwa vanyina vavo, na valiho vitsiri vilomba vene khuva vitsiri shichira vwami vwu mwikulu. Woyo wu khukumira mekitso yaka akakumire."

¹³ Na vamulerera vana vatititi avavikhirekhu makhono nu khuvasaalira, navutsa vechitswi va vakondekhera. ¹⁴ Nikhali Yesu ya vakaya, "Lekhi vana vatititi vitse khu inse, mu khavakayi tawe. Shichira vwami vwu mwikulu vuli khu vana khuli yava." ¹⁵ Yesu yavikha makhono khu vana, ma narhulaho nu khutsya.

¹⁶ Mundu mulala yitsa khu Yesu namurheva, "Mwechitsi mulahi, shina shilahi shyanyala khukhola ndukhe khunyola liva mwoyo lyi mihika ni mihika?"

¹⁷ Na Yesu yamurhevulira, "Shichira shina unanga mulahi? Shyaliho mulahi navutsa mulala, neye ni Nyasaye: Nu wenya khwinjira muliva mwoyo ulinde Malako."

¹⁸ Musatsa woyo na murheva, "Malako shina?" Yesu ya muvolera, "Ukhira mba, Ukhaheya mba, ukhiva mba, ukhahana vulolekhitsi vwu vuvehi, ¹⁹ Uhe ise wowo na nyina wowo luyali: uyanse murende wowo khuli wiyansa mwene."

²⁰ Muyayi muvukha woyo yamuvolera, "Yaka kosi ndakavikha khurhula mu vwana vwanje. Shina shindi?"

²¹ Yesu ya murhevulira, "Nu wenyi khuva mulunji, tsya ukulitse vyu ulinavyo na uhane khu vatakha, ulava ni livikhiro mwikulu; awitse unonde." ²² Navutsa, lwa muvukha woyo yahulira livola yero, yamanya averere munonono: shichira yali ni vuhina vunyikhi.

²³ Yesu yavolera vechitswi veve, "Ka kyirikali vavoleranga, nu vutinyu muhinda khwinjira mu vwami vwu mwikulu. ²⁴ Khaandi vavoleranga, nu vutorho khu ingamia khwinjira mulina li isindani khuvirha mundu muhinda khwinjira mu vwami vwa Nyasaye."

²⁵ Lwa vechitswi vahulira yaka, vali ni lichenya, ni vavola, "Wina unyala khuhona?"

²⁶ Yesu yava hensa navavolera, "khu vandu ni matinyu, navutsa khu Nyasaye vindu vyosi vinyalikhanga."

²⁷ Petero yamurheva ndi: Hensa kwalekha vindu vyosi nukhu khulonda. Ni shina shya nu khunyole?"

²⁸ Yesu yarhevula, "Ka kyirlikali vavoleranga, munyinga imbya lwa Mwana wu Mundu niyikale khu shirhumbi shyeshe shyu vukhumi, munye vamwanonda khaandi numwikhale khuvirhumbi likhomi na vivilri, nu khukhalachira tsihiri likhomi na tsiviri tsya Visiraheli. ²⁹ Na shya mulala walekha tsinsu, vamwavo, vambotswa, ise, nyina, vana anoho mulimi shichira lirha lyanje, valakhanyole hali imia nu mukavwa kwi liva mwoyo lyi mihika ni mihika. ³⁰ Navutsa vanyikhi vali vukhurhanga valakhave vu khumalikhitsa, na vukhumala valakhave vu khurhanga.