¹ Inyinga yene yeyo vechitswi vitsa khu Yesu ni va murheva, "Nu wina mukali mu vwami vwu mwikulu?"

² Na Yesu yalanga mwana mutititi, na musinjiritsa hakari havo, ³ Navola, muvoleranga, ka kyirikali, mukha kalukhana muve khuli vana vatititi, munye shumulinjira mu vwami vwu mwikulu. ⁴ Khulwayako, mundu wosi wichehitsanga khuli mwana mutititi wuyu neye ali mukali mu vwami vwu mwikulu. ⁵ Na khaandi mundu wosi winjiritsa mulala khuyava vana vatititi mu lirha lyanje, alava ni yinjiritsa inse. ⁶ Navutsa mundu yituyitsa khu mulala khu yava vasuuvira mu inse, vwakhavere vulahi lichina lisungwe mwing'ori mwemwe ma asuvwe mu luliva lwi inyansa.

⁷ Vulakhave vutinyu mu shivala shichira vindu vichiranga vandu nivituyitswa nu khukhola vwoni! Shichira vindu yivi vilitsa: Navutsa vulava vutinyu khu mundu wu vindu vyu khwituyitsa vyene yevo vitsirakhu! ⁸ Khulwayako, mukhono kwokwo, anoho shirenje shyoshyo ni shikhuhira muvwoni, urheme nu khusuva ihale khu yiwe. Shichira nu vulahi ive khwinjira mu liva mwoyo nu wacheherwa mukhono anoho nu walema khuvirha khuva na makhono kaviri ni virenje viviri, ma usuvwe mu muliro kwi mihika ni mihika. ⁹ Niva imoni yoyo nayo ichiranga ukhole vwoni, chyihe usiuve ihale niwe mwene, nuvulahi khwinjira mu liva mwoyo ni imoni indala, khuvirha khuva ni tsimoni tsiviri, ma usiuvwe mushihatisi shyu muliro. ¹⁰ Muhenselitse, muvule khuchaya khu khali mulala khu vatititi yava, shichira muvoleranga ka kyirikali, tsingerosi tsyavo mwikulu tsihensa inyinga yosi mumoni mwa Ise wanje ali mwikulu. ¹¹ Shichira Mwana wu Mundu yitsa khuhonyinya vandu vakora. ¹² Mukanakana ndina? Mundu ni yavaya makondi imia indala na lirala khuko likore, shalekhanga makondi makhomi tisa na tisa, ma atsya mbikulu, khukhava likondi lilala likori? ¹³ Na lwalinyolanga, muvoleranga ka kyirikali, avetsanga nu vuyansi mbirhirira khu likondi lyene yero, khuvira makondi kandi makhomi tisa na tisa kavuli khukora. ¹⁴ Khali ni ndyo, shyuvulikhu vulaliri vwa Ise wenyu ali mwikulu, ndi mulala khu vatititi yava atukhe khutiva.

¹⁵ Amwavo wowo na khukosera, tsya umuvolere, numuli vutsa neye vaviri, na khuhulire ulava nu mukhonyi khurhula muvwoni. ¹⁶ Navutsa navula khu khuhulikhitsa, vukula mundu wundi mulala anoho, vaviri niwe mwene, Khu khuvirhira khu minwa chya valolekhitsi vaviri anoho vavaka khuvuli likhuva litinyinywe. ¹⁷ Niva alamuchaya nu khuvula khuvahulikhitsa, muvolere vi likanisa, navachayi khu vahulikhitsa, vilikanisa, mu mu vukule khuva khu munye khuli mundu wi shivala khaandi khuli musololi wu vusuru. ¹⁸ Muvoleranga ka kyirikali, shyosi shya muvoha mulirova, shiravohwa mwikulu, khaandi shyosi shya mu voholola mwirova shiravohololwa mwikulu. ¹⁹ Khaandi mu volera ndi, nikava vandu vaviri va lahulikhitsana mu lirova khu shindu shyosi shya varheva, Ise waje ali mwikulu alavakholera. ²⁰ Shichira havundu hosi ha vandu vakaniire vaviri anoho vavaka mu lirha lyanje, inse ndava hakarhi havo.

²¹ Petero yatsya khu Yesu namurheva, "Mwami, kenyekha mbere amwavo wanje nakholere vutamanu hali khanga? Hali saba?"

²² Yesu yamuvolera, "Shikhuvoleranga yiwe hali saba, Navutsa khutukha makhomi saba hali saba. ²³ Khu vwami vwu mwikulu vusesanyinywa nu mwami mulala, wenya khurunilitsa livikhiro lelye na varhumikhiri veve. ²⁴ Lwa yarhanga lirunilitsa mundu mulala yalerwa khuye neye yali ni likovi lyelye tsitalanta tsielefu likhomi. ²⁵ Navutsa shichira shiyali nuvunyali khurhunga, mwami wewe ya hana Malako ndi akulitswe ye mwene halala nu mukhali wewe na vana ni vindu vyosi vya yali navyo, varhunge lyikovi lyene yero. ²⁶ Murhumikhi woyo yakwa imberi wu mwami wewe, na muvolera, "Mwami wanje yikhutsire ninse, ndakhurhunga likovi lyolyo lyosi." ²⁷ Mwami wu murumikhiri wuyu; yamuvera tsimbavasi na mu voholola, na mulekhera likovi lyelye lyosi. ²⁸ Murhumikhi mwene mulala woyo yarhula natsya irwanyi, neye na nyola mulala khu varhumikhiri veshenye, neye yali ni likovi lyelye tsidinari imia indala: ya mukumira, na mumika mwing'orhi, na muvolera, ndunga likovi lyanje lyosi.

²⁹ Muhinsiri wavahinsiranga neye yakwa hasi muvirenje vyevye, namusaya, mwatsa nu yansa, yikhutsire ninse ndakhurhunga likovi lyolyo liyosi. ³⁰ Navutswa yambakhana khu muhulilitsa, na muvukula na muhira muchela, khutukha lwa rhunga likovi lyene yero lyosi. ³¹ Lwa vahinsiri veshyenye valola kayali nakholi, vali ni shiverera, na nivatsya khwivalira mwami wavo kosi kali ni ki kholekhe.

³² Na mwami wewe yamanya nalanga murumikhiri wuyu, na muvolera, "Yiwe murhukwa mutamanu, inse khuveri likovi lyanje lyosi, shichira umbolere khu kholere ndyo: ³³ Niwe khaandi shyuvere uvere tsimbavasi murhumikhiri woshyonyo, khuli inse khuveri tsimbavasi? ³⁴ Mwami wewe yali nu vurhima, namuhira murhumikhi mwene woyo muchela khusalilitswa khutukha lwa arhunga likovi lyosi. ³⁵ Ni ndyo khaandi Ise wanje wu mwikulu yitsa amukholere, nikava munye, khurhula mu myoyo chyenyu shimulavera vamwavo venyu tsimbavasi.