¹ Lwa matukhu karanu ni lilala kali kakhavira, Yesu yavukula Petero, Yakobo, na Yuhana amwavo wewe na vahira mushikulu shirambi havali vutswa vonyene. ² Na likondo lya Yesu lyakalukhanyinywa imberi wavo, mmoni mwa Yesu mwakha khuli lyuva, na tsinguvu tsyetsye tsiang'ang'a khuli vulavu. ³ Hensa, Musa ni Elicha valolekha khuvo ni valomolomanga na Yesu. ⁴ Na Petero yarhevula na volera Yesu, "Mwami nuvulahi khutse khuva hanu: Nuyansa ulekhe khumbakhe matiri kavaka; lilala lyolyo, lindi lya Musa na lindi lya Elicha."

⁵ Lwa Petero yali nashilomolomanga, hensa lilesi lilavu lyavakhunikha vosi: nu mwoyo kwahulirikha khurhula mwilesi mwene yomo nu kuvola, "Wuyu nu Mwana wanje wandayansa, na nyansitswa neye; mu muhulikhitse."

⁶ Na vechitswi veve lwa vahulira mwoyo kwene yoko, vakwa hasi mahumama, ni vatechera muno. ⁷ Navutsa Yesu yitsa navatirakhu, navavolera, "Sinjiri mukhava nu vurhi tawe." ⁸ Na lwava hensa ikulu shivalolakhu mundu wundi wosi, navutsa Yesu wonyene vutsa.

⁹ Lwa vali nivikhanga khurhula khu shikulu, Yesu yavakaya, navavolera, mukhavolerikhu mundu wosi kamuloli tawe, khutukha lwu Mwana wu Mundu yitsa yisimukukhe khurhula mu likhutsa.

¹⁰ Na vechitswi veve va murheva, shichira shina vahandichi vavola khutukha Elicha yitse khurhanga mbalyo?"

¹¹ Na Yesu yavavolera, ni kakyirikali Elicha alitsa wukhurhanga, ma khaandi akalukhitse vindu vyosi khuli vyali. ¹² Navutsa muvolera ndi, Elicha yayitsa khale, navo shivamulaviritsa tawe, navutsa va mukholera kosi kavenyanga. Khaandi ni ndyo vitsa khusalilitsa Mwana wu Mundu mu makhono kavo. ¹³ Nalwo lwa vechitswi veve vamanya ndi Yesu ya vavolera makhuva khulondekhana khu Yuhana mubatisi.

¹⁴ Na lwa vatsya nivatukha hi shituma shyali, mundu mulala yitsa khu Yesu, na musikamira imberi wewe, na vola, ¹⁵ "Mwami vera mwikhula wanje tsinbavasi, shichira ashindanga indulume nu khunyakhana muno: akwitsanga mu muliro vuli inyinga na lundi akwa mu matsi. ¹⁶ Inse mulerhi khu vechitswi vovo, navutsa shivanyalitse khumuhonyinya tawe.

¹⁷ Yesu yarhevula navola, "Munye lwivulu luvula khusuuvira na khaandi mwakoyana, ndamenya na munye khutukha lina? Mwenya ndikhutsire khutukha lina? Nderera hanu mwaana mwene woyo. ¹⁸ Yesu ya kondekhera litimoni lyene yero; na ni lirhula muye: na mwana mwene woyo yahona khurhula isa yene yeyo.

¹⁹ Na vechitswi va Yesu vitsa khuye haluveka, ni vamurheva, shichira shina khutse khuramirwe khukhunga litimoni lyene yero?

²⁰ Yesu yavavolera, "Shichira lisuuvira lyenyu ni litititi: Navutsa muvoleranga ka kyirikali nu muva ni lisuuvira khuli lyu lukutsa lwi lisavakhwa mulavolera shikulu yishi, rhula yaha wisunde yeyo, nashyo shilisunda; Na shivulakhuho shivula khunyalikha khumunye. ²¹ Navutsa litimoni khuli yiri shilirhulanga vuchira lisaala nu khuhonga khuvula khulya.

²² Na lwavali nivashimenyi ikalilaya, Yesu yavolera vechitswi veve, "Mwana wu Mundu alitsa khutsamwa khu vandu. ²³ Na valitsa khumwira na khu litukhu lya khavaka alisimukukha." Na vechitswi veve vali ni liverera likali muno.

²⁴ Lwa vatukha mulitaala lya kaperanaumu, vasololi vu vushuru vatsya khu Petero, ni vamurheva, "Mwekitsi wenyu arhunga khu vusuru?"

²⁵ Petero yarhevula, "Nyee." Lwa Petero yinjira munsu, Yesu yali wukhurhanga khulomoloma, na murheva, "Ukanakana shina, Simioni? Vami vwu mulirova yumu varhungitsa vusuru khurhula khu vanga wina? Nu khurhula khu vana vavo anoho khurula khu vandi?"

²⁶ Petero yamuvolera, khurhula khu vandu vandi. Yesu neye ya muvolera khu lwa yako khu vana vavo ni vavoholole. ²⁷ Shichira shikhwenyi khuvituyitsa myoyo mba, mutsi mu nyansa mureke ingaka, isutsi irulamu yu khurhanga mwikule mu munwa, mulanyolamu tsisenti. Muvukule murhunge vusuru vwanje nu vusuru vwenyu.