¹ Vafarisayo na Vasadukayo vamwitsira khumucheritsa, vamurheva avamanyinye virolekhitso virhulanga mwikulu. ² Yarhevula, na vavolera, "Lwa yitukha halukolova mu manya muvola, mulenjero kulavakhu mulahi lero, shichira likulu ni limuchi. ³ Na ni kushiri mu mavwevwe, 'muvola, lero khulava ni imbutsa; shichira likulu ni limuchi khaandi malesi kitsule.' Munye vatamanu mwamanya khumanyilitsa khuli malesi kafwananga, navutsa shyumumanyiltsanga vilolekhitso vi tsinyinga. ⁴ Likhula litamanu nu lyu vuheyi, mukhava shilolekhitso, nikhali shivula shindi shyamuherwa nishikhali shilolekhitso shyu muporofeti Jona." Na Yesu yalekhana navo natsya ha wundi.

⁵ Lwa vechitswi vatukha lucherekha lundi, vali vivirire khuvukula mikati. ⁶ Yesu yavavolera, "Muhense khaandi mwilinde khu mamera ka vafarisayo na vasadukayo."

⁷ Vechitswi varhevana vene khu vene ni vakanakana nu khuvola, "Ni shichira khuvuli khuvukula mikati."

⁸ Na Yesu yamanya inganakani yavo, ya vavolera, "O munye virisuvira lititi, shichira shina mukanakanga hakari henyu nu khuvola ni shichira khuvuli khuvukula mikati?" ⁹ Mushiri khumanya? Khali shyumwitsukhitsakhu mikati chyali chyiranu na chyiviri chalirwa na vandu tsihelefu tsiranu, khaandi viruvi vyanga vya mwavunjeritsa? ¹⁰ Anoho mikati chyali saba chalirwa na vandu tsihelefu tsinne, na ni viruvi vyanga vya matonye vya rhikala nu muvukula? ¹¹ Kali ndina mukorhwa khumanya nomoloma khumunye shichira mikati tawe? Muhense khaandi mwilinde khu mamera ka vafarisayo na ka vasadukayo." ¹² Na vamanya ni vamanya ndi shyi yavola khu mamera kumukati, navutsa vihense nu khwirinda khurhula khu mekitso ka vafarisayo na vasadukayo.

¹³ Na lwa Yesu yatsya muluveka lwa Kaisalyia-Filipi, yarheva vechitswi veve navola, "Vandu va vola Mwana wu Mundu nu wina?"

¹⁴ Navo vavola, "Vandu valala vavola uli Yuhana Mubatisi; na vandi vavola uli Elicha, vandi Jeremia, anoho mulala khu vaporofeti."

¹⁵ Naye yavarheva, "Navutsa na munye muvola inse ndi wina?"

¹⁶ Simioni Petero yarhevula nu khuvola, "Yiwe wuli Kristo Mwana wa Nyasaye Umenyanga."

¹⁷ Yesu yarhevula na muvolera, "Ukasitswe yiwe Sioni mwikhula wa Jona, shichira muviri na masahi shivikhuvulire yaka, navutsa Ise wanje uli mwikulu. ¹⁸ Inse khaandi khuvoleranga, yiwe ni Petero, na khwichina yiri ndumbakhakhu likanisa lyanje. Khali milyango chyi shihatiisi shichilanyala khulikurha tawe. ¹⁹ Inse ndakhuha tsifungu tsyu vwami vwu mwikulu. Shyosi shya uvoha hasi hanu shilavohwa mwikulu, na shyosi shamuvoholola hasi hanu, shilavohololwa mwikulu." ²⁰ Yesu yavakaya vavule khuvolerha khu mundu wosi ndina yali Kristo.

²¹ Khurhula inyinga yene yeyo Yesu yaranga khuvolera vechitswi veve, khuli kamutukhira khutsya Yerusalemi, na anyakhitswe muvindu vinyikhi mu makhono ka vasakhulu na vasalisi na vahandichi; atukhe khwirhwa, ma ni yisimukukhe litukhu lya khavaka.

²² Petero yamuvukula haluveka namukondekhera nu khumuvolera, "Yaka shi kakhunyola tawe, Mwami! Yako shikalakhunyola!"

²³ Navutsa Yesu yishevukha navolera Petero, "Tsya inyuma wanje yiwe Shetani! Uli shisikaraliro khu Inse, shichira shyu kanakanga khulondekhana ni vindu vya Nyasaye, navutsa khulondekhana ni vindu vya vandu." ²⁴ Yesu yavolera vechitswi veve, "Mundu wosi niyenya khunonda, yiyambakhane mwene, ma yityukhe musalaba kwekwe mwene nu khunonda. ²⁵ Woyo wenya khwihonyinya liva mwooyo lyeelye mwene alalikoritsa, na woyo ukoritsa liva mwoyo lyelye shichira inse, alalinyola. ²⁶ Shichira mundu alanyola vukhala shina niva alanyola shivala shyosi, navutsa akorhitse liva mwoyo lyelye? Na mundu anyala khuhana shina havukono hyi liva mwoyo lyelye? ²⁷ Shichira Mwana wu Mundu alitsa khwitsa mu vukhumi vwa Ise wewe halala ni tsingerosi tsyetsye. Nalwo lwa alirhuunga vuli mundu matanyi keke khulondekhana khu vikholwa vyevye. ²⁸ Ka kyirikali muvoleranga munye, khuli na vandu vasinjire na munye hanu vavula khulolakhu likhutsa khutukha lwavalilola Mwana wu Mundu ni yitsanga mu vwami vwevwe."