¹ Valala khu vafarisayo na vahandichi khurula Yerusalemi vitsa khu Yesu ni vavola, ² Shichira shina vechitswi vovo vononyinya malako ka va khulundu? Shivisavanga makhono kavo lwa valitsa mikati tawe.

³ Yarhevula na vavolera, na shichira shina munye mwononyinyanga malako ka Nyasaye ni mima chenyu? ⁴ Nyasaye yavola, "Uhane luyali khu ise wowo na nyina wowo," na "Woyo unyekanga ise anaho nyina wewe atukhana khwirwa," ⁵ Navutsa munye muvola, 'ulivolera ise wewe anaho nyina wewe, "shyosi shyutukhananga khukhonywa ninse ni shyihanwa khu Nyasaye," ⁶ woyo shyatukhana khuhana luyali khu ise wewe.' Khu injira khuli yiyi umali khulomba likhuva lya Nyasaye khuvula shivune, shichira mima chenyu. ⁷ Munye vakati, Isaya ya porofeta vulahi khu munye, na vola. ¹⁰ Yamanya nalanga shituma khuye, na vavolera, "Hulikhitsi khaandi mumanye-- ¹¹ Shishiri yesho shinjiranga mu munwa nashyo shyononyinyanga mundu, navutsa ni yeshyo shirhulanga mu munwa, nashyo shyononyinyanga mundu."

¹² Vechitswi veve va mwitsira, ni va muvolera, "Umanyikhu Vafarisayo vatunyi lwa va hulire likhuva yiri?

¹³ Yesu yarhevula navavolera, "Shirhakwa shyosi, shyavula khurhakwa na Ise wanje wu mwikuulu, shilarhinyirwa. ¹⁴ Valekhi yavo, ni vimiriri vavekhu. Muvekhu niyimirira muvekhu weshenye, vosi valakwa mu vwina."

¹⁵ Neye Petro yarhevula na volera Yesu, "Khwivalire shyu lukanu yulu luvolanga."

¹⁶ Yesu yavavolera, "Khali munye khaandi muvula limanya? ¹⁷ Shyumumanyi shyosi shinchiranga mu munwa, shiviriranga munda ma shisuvwa mu vulimo anoho mu vwina? ¹⁸ Navutsa vindu virhulanga mu munwa virhulanga mu mwoyo. Navyo vilombanga mundu khwonekha. ¹⁹ Shichira khurula mu mwoyo virhulamu ni tsinkanakani tisntamanu, vwirhi, vuheyi, khutsya mu vakhana, vwivi, khuhana livola lyuvuvehi, na manyeko; ²⁰ Yako nako kalombanga mundu khwonekha. Navutsa khulya vuchira khusava makhono shyukhulombanga mundu khwonekha tawe."

²¹ Yesu yarhula yaho, natsya luveka lwi tsisomo tsya mataala ka Tiro na Sidoni. ²² Hensa mukhali mukanani yarhulanga muluveka lwene yolo. Yahansukha na vola, "Umbere tsimbavasi, Mwami, Mwana wa Daudi! Mwana wanje mukhana anyakhitswa vutamanu ni litimoni."

²³ Navutsa Yesu shiyarhevulakhu likhuva lyosi tawe. Vechitswi veve vitsa khuye khumurhevera vukhonyi nu khuvola, mulekhe atsi, shichira akhulomberanga liyoko.

²⁴ Navutsa Yesu yarhevula, "shindarhumwa khu mundu wosi tawe, navutsa khu makondi kakora, ki insu ya Isiraheli."

²⁵ Neye yitsa na mwinamira, na vola, "Mwami, khonya."

²⁶ Yarhevula na muvolera, shyuvuli vulahi khuvukula mukati kwa vana nu khusuvira vana visimbwa.

²⁷ Neye yavola, "Nyee, Mwami, navutsa, khali tsisimbwa tsilitsanga khu matonye kakwitsanga hasi hii mesa ya vami vavo.

²⁸ Na Yesu yarhevula namuvolera, "Mukhali yiwe lisuuvira lyolyo ni likali; kave khu yiwe khuli lyenya lyolyo.' Khurhula inyinga yeyo mukhana wewe yahona.

²⁹ Yesu yarhula yaho natsya himbi ni inyansa yikalilaya, natsya khu shikulu, ni yikhala hasi. ³⁰ Vandu vanyikhi vitsa khuye vamulerhela valema, vavekhu, tsitimbiti, na vandu vafwokoya, na vandi vanyikhi vali ni vali valwale. Vavavikha hasi hi virenje vyevye atukhe khuvahonyinya; ³¹ Shituma shyali ni lichenya lwa valola tsitimbiti ni va lomolomanga, valema ni vachendanga, vavekhu ni valolanga, ni vakhuminya Nyasaye wa Isiraheli.

³² Yesu yalanga vechitswi veve na vavolera, "ndi ni tsimbavasi khu shituma yishi, shichira vavere ni inse matukhu kavaka, na vavula shyukhulya na shindavarhuma vatsi ni insala, shichira vanyala khushindira khu injira."

³³ Vechitswi veve va muvolera, na khunyole hena mikati mu shangalangwe munu, chyitukha khulikhitsa nu khwikuritsa mukanda mukali khuli yuku?

³⁴ Yesu yavarheva, "Muli ni mikati changa?" Vamuvolera, "chiranu na chiviri ni tsisutsi tsintititi" ³⁵ Na Yesu yavolera mukanda vikhale hasi mushikurhi. ³⁶ Yavukula mikati chali chiranu na chiviri ni tsisutsi, ni ya khamala khusanditsa mwisala, natong'olanyinya naha vechitswi veve. Na vechitswi veeve ni vakavulira mukanda. ³⁷ Vandu vosi valya ni vikura. Ni va vunjeritsa matonye karikala ni kitsula viluvi viranu na viviri. ³⁸ Vosi valya vali vandu tsielefu tsinne, nu khukhavalitse vakhali na vana. ³⁹ Na Yesu yamanya arhume mukanda khutsya ingo, naye na nina mu lyarho natsya muluveka lwa Magadani.