¹ Mu matukhu kene yako Herode yahulira lukhumu khulondekhana khu Yesu. ² Navolera varhumikhiri veve, "Wuyu ni Yuhana Mubatisi; yisimukukhe khurula mu vakhutsu. Khulwayako tsingulu yitsi tsihinsiranga muye."

³ Shichira Herode yali yakumira Yuhana, namuvoha, namuvikha muchela shichira Herodia, mukhali wa amwavo wewe Filipo. ⁴ Shichira Yuhana yali niyamuvolera, "Malako kambakhana yiwe khuhira mukhali wa wanula amwavo wowo." ⁵ Shavulira shiti Herode amwirhe, navutsa yarhia vandu, shichira vandu vali va musuuvira khuli muporofeti.

⁶ Na litukhu lyu khwitsukhitsa livulwa lya Herode lyatukha, mukhana wa Herodia yasieva vulahi hakari hi shituma nu khuyansitsa Herode. ⁷ Khu manyinya uyansitswe, yalaka nu khwisuha khumuha shindu shyosi shya rheva. ⁸ Naamali khwivalira na nyina wewe, mukhana yarheva, "Umbe yaha, khu besheni yiyi, murhwi kwa Yuhana Mubatisi lwene yulu." ⁹ Mwami yavereritswa ni lyenya lyu mukhana wuyu, navutsa shichira lyisuuha lyelye ma khaandi shichira yavo vosi valiho mulilya yero neye, yalaka kikholekhe ndyo. ¹⁰ Yarhumana nivakhalaka murwi kwa Yuhana muchela. ¹¹ Nivalerha murhwi kwekwe khu besheni nu khuha mukhana wa Herode, na mukhana na vukula nu khuhirira nyina wewe. ¹² Na vechitswi va Yuhana vitsa nivavukula muviri kwa Yuhana, nivatsya khumu yavira. Nivakhamala vatsya nivavolera Yesu kali kyikholekhe.

¹³ Na lwa Yesu yahulira yaka, yarulaho mu lyarho natsya mu shangalangwe. Lwu mukanda kwahulira, vamulonda khuvirenje khurhula mu mataala. ¹⁴ Na Yesu yitsa imberi wavo nu khulola mukanda mukali muno. Yavalorera tsimbavasi nu khuhonyinya valwale vavo. ¹⁵ Lwa halukolova hatukha, vechitswi veve vitsa khuye nivavola, "Hanu nu mushangalangwe, na tsisa tsitsire muno. Lakhula mukanda kutsi, khuvatsyi mu mikitsi khwikulira shyukhulya vene."

¹⁶ Navutsa Yesu yavavolera, "Havulaho shivune shyukhuvalakhula vatsi. Vahi shavanyala khulya."

¹⁷ Navo vamuvolera, "Khuli vutsa ni mikati chiranu ni tsisutsi tsiviri tsyonyene."

¹⁸ Yesu yavavolera, "Nderheli." ¹⁹ Yesu yavolera mukanda vikhale hasi khuvulimo. Navukula mikati chali chiranu ni tsisutsi tsiviri. Na hensa mwikulu, yakaasitsa nu khutong'olanyinya mikati nu khukavulira vechitswi veve, navo vansa khukavulira mukanda. ²⁰ Vandu vosi valya na ni vikurha. Na ni vavunjeritsa matonye karikala--viluvi likhomi na viviri ni vitsule. ²¹ Na vandu valya vali vasatsa himbi tsihelefu tsiranu, vuchira khuvalitsa vandu vakhali na vana.

²² Na vwangu Yesu ya varhuma vechitswi veve vinjire mu lyarho nu khutsya imberi wewe khulujerekha lwi inyansa, neye narhikala nashirhuma mikanda khuhuya. ²³ Yali niyakhamala khuvasevula mikaanda, yanina khushikulu ye mwene khusaala. Khu lukolova lwa khwatukha, yaliyo wonyene. ²⁴ Na lyarho lyali litsire ihale munyansa khurhula khuluchinga, na nilinuywa vutinyu ni imbutsa khaandi ni vikuvuli vinyansa, shichira imbutsa yali nivalumbanga khukalukha inyuma. ²⁵ Mu tsisa tsikhola khanne mu vutukhu, Yesu ya valolekhera ni yitsanga himbi khuvo, khaandi nachendanga khu matsi ki inyansa. ²⁶ Lwa vechitswi veve va mulola na chenda khu inyansa, va henda mwoyo nu khuvola, "Ni shinanyenso," navo valira nu vurhi.

²⁷ Navutsa Yesu yava lomolomera na vola, "Muve ni ikholo! Niinse! Mu kharhi mba."

²⁸ Na Petero yarevula namuvolera, "Mwami, niva niyiwe, nanga nditse khu yiwe ninchenda khu matsi."

²⁹ Yesu yamulanga, "Hamba." Khulwa yako Petero yikha khurula mu lyarho nachenda khu matsi natsya khu Yesu. ³⁰ Navutsa, Petero lwa yalola imbutsa initoho, yamanya narhia. Na lwayansa khusikhira mu inyansa, yalira nu khuvola, "Mwami mbonyinya!

³¹ Na vwangu Yesu yanyira mukhono kwekwe, nu khukumira Petero, nu khumuvolera, "Yiwe wi lisuuvira lititi, shichira shina nuvula khusuvira?

³² Lwa Yesu na Petero vatsya khwinjirha mu lyarho, imbutsa ya sinjira khuhutsa. ³³ Na vechitswi vali mulyarho vinamira Yesu nu khuvola, "Ka kyirikali uli Mwana wa Nyasaye."

³⁴ Lwavali ni va khambukha vatukha khu shivala shya Gennesareti. ³⁵ Vandu va hawene yaho lwa vamanya ni Yesu, varumanyinya likhuva havundu hosi mu tsisomo tsili himbi hawene yaho, navamulera vuli yali mulwale. ³⁶ Vamusaya ndi vakumire vutsa lupindo lwi inguvu yeye, na vanyikhi vakumirakhu vahona.