¹ Mu litukhu lyene yero, Yesu ya rhula irwanyi wi insu na yikhala khu luchinga lwi inyansa. ² Mukanda mukali kwa vandu kwivunjelitsa hayali, neye natsya khwikhala mu lyaro na mukanda ku sinjira khu luchinga. ³ Yesu yavavolera vindu vinyikhi khuvirhira mu tsinganu, na vola: "Hensa mumitsi yarhula nu vukutsia khumitsa. ⁴ Lwayamitsa, vukutsa vulala vwakwa khunjira, na manyonyi kitsa nikavotsa vukutsa tsana. ⁵ Vukutsa vundi vwakwa khulwanda, hakhali na malova manyikhi na vukutsa vwamera vwangu vuchira malova kukhuhiramu miri. ⁶ Navutsa lyu lyuva lyaka, vwasambwa ni shimiyo shichira vwali ni mir tawe, navwo vuniala. ⁷ Vukutsa vundi vwakwa mushisakha shya mahwa kivikunga kavukhunikha ni ing'inini. ⁸ Vukutsa vundi vwakwa mu malova manulu, nu vwama imu, vulala vwaminya imia, vundi vwaminya makhomi sita, nu vundi makhomi kavaka. ⁹ Woyo uli na maroyi kukhuhulira, na ahulire.

¹⁰ Vechitswi veve vitsa, ni va murheva, shichira shina ulomolomanga khu vandu khuvirhira mutsinganu?

¹¹ Na Yesu yavarhevulira: Shichira munye mwaherwa vucheri vu khumanya tsisiri tsyu vwami vu mwikulu, navutsa vo shivaherwa vucheri vwene yovo tawe. ¹² Shichira woyo ali navyo, alametwa, ave navyo mu vunyikhi. Navutsa woyo avula shindu shyosi, khali shyakanakananga ali nashyo alitsa khunulwa. ¹³ Yishi nashyo shivune shichira ni nomoloma khuvo khuvirhira mu tsinganu: Khali niva valolanga, vavule khulola. Khali niva vahulikhitasanga, navutswa shivalahulira nu khumanya. ¹⁴ Khuvo vu vuporofeti vwa Isaya vulatukha vwa Nyasaye yavoola: "kakyirikali mulahulikhitsa navutsa shyu mulava ni limanya, makhandi mulahensa, navutsa shyumulalola nu khumanya." ¹⁶ Navutswa tsya kasitswa tsimoni tsyenyu, shichira tsiloranga: khaandi marhoyi kenyu shichira kahuliranga. ¹⁷ Kakyirikali muvoleranga, vaporofeti na vandu valunji vanyikhi vali nilyenya lyu khulolakhu vindui vya mulolanga, navutsa shivalavilola tawe. Vikomba khuhulira kamuhuliranga, na shivalahulirakhu tawe. ¹⁸ Khahulikhitsi, khaandi lukanu lwu mulimi yatsya khumitsa vukutsa. ¹⁹ Mundu lwa huliranga likhuva lyu Vwami vwu mwikulu, ma avula khuli manya, mutamanu woyo ayitsa, amunula imu ivetsa nirakirwe mu mwoyo kwekwe. Yuvu navwo vukutsa vwakwa khundulu khwinjira. ²⁰ Vukutsa vwakwa khulwanda, ni yavo vandu vahuliranga likhuva na valivukula nu vuyansi. ²¹ Navutsa shilinjira mukarhi mwu myoyo chyavo tawe na khaandi yikhutsalakhu hatiti. Lwa vanyola vutinyu anoho khutambitswa shichira likhuva, vakhutsa myoyo vwangu nu khukalukha inyuma. ²² Vukutsa vwarakwa mu mahwa ki vikunga navo vandu vahuliranga likhuva, navutsa shichira lihendera mwoyo vindu vyi shivala yishi nu vukati vwu vuhinda limikanga likhuva, alivula khwaminya vyamo. ²³ Vukutsa vwamiitswa mu malova manulu, ni vandu vahuliranga likhuva ma valimanya. Avaminya vyamo: valala imia khu, vandi makhomi sita, na vandi makhomi kavaka khu imia khurhula khu viti vyiarakwa.

²⁴ Yesu yavavolera lukanu lundi: Navola, "vwami vwu mwikulu vunyala khusesanyinywa khu mundu ya mitsa vukutsa vulahi mu mulimi kwekwe. ²⁵ Navutsa lwa vandu vali vakonanga, mutsiku wewe yitsa na mitsa mu mulimi tsana vukutsa vwa mavanse mu inganu ma natsya. ²⁶ Lwa vwamera, nuvutukha nalwo lwa mavanse kalolekha kamera halala ni inganu. ²⁷ Vahinsiri vu mwene mulimi vitsa va mu volera, 'Mwami, shyu wamitsa vukutsa vulahi mu mulimi kwokwo? Shichira shina mavanse kanyolekhamu?'

²⁸ Yamanya na vaolera, 'mutsiku neye ukholi yaka. "Na vahinsiri vamurheva, 'Wenya khutsi khwiha mavanse khukarhulitsemu?'

²⁹ Mwene mulimi yavavolera, 'Auwa. Shichira lwamuva nu mwihanga mavanse. Mwitsa khwiha inganu halala nako. ³⁰ Lekhi vyosi vimerere halala khutukha mu inyinga yi lichesa. Mu inyinga yu khuchesa nditsa mbolele vachesi, "murhange khuvunjiritsa mavanse halala nu khuvoha mu vituma nu khuvisamba, navutsa inganu muvunjelitse nu khulera mu shyachi shyanje."

³¹ Na Yesu yamanya na vavolera lukanu lundi. Yavola, "Vwami vwu mwikulu vuli khuli lukutsa luti muno khuli lwi lisavakhwa, lwa mundu yavukula namitsa mu mulimi kwekwe. ³² Nalwo nu lutititi muno khuvirha vukutsa vundi vwosi, navutsa nulwakhamera, lukaliha muno khuviritsa virakwa vindi vyosi. Lukwitsa musala, ma manyonyi ku mwikulu kitsa khumbakha vitsu vyavo mu tsisya tsyakwo. ³³ Yesu yamanya na vavolera lukanu lundi. "Vwami vu mwikulu vuli khuli mamera ku mundu mukhali yavukula natsukanyinya mu vichero vivaka vyuvusi ni kalomba shinokho shyosi khuvurhikha."

³⁴ Yesu yalomolomera makhuva yaka kosi khu mikanda tsinkanu; na shivulaho shya yavavolera vuchira khurhumikhira tsinkanu. ³⁵ Yesu yakhola yako kosi khurwekhitsa ku muporofeti yali niyavola; "Ndakhunula munwa kwanje valomolomere mu tsinkanu. Ndavirwatsira makhuva kaviswa khurhula khurhula lwu muse kwi lirova kwavikhwa."

³⁶ Yesu yamanya alekhane ni shituma shya vandu ni yinjira munsu. Vechitswi veve vitsa khuye ni vamurheva, "khwivalirekhu lukanu lwi intiva mu mulimi."

³⁷ Yamanya yarevula na vavolera, "Woyo amitsanga vukutsa vulahi ni Mwana wu Mundu. ³⁸ Mulimi ni shivala; vukutsa vulahi, yava ni vana vwu mu vwami. Mavanse, ni vana vwu mutamanu woyo; ³⁹ khaandi mutsiku yamitsa mavanse ni ibilisi, lichesa nalyo shiheri shi lirova; khaandi vachesi ni tsingerosi. ⁴⁰ Khulwayako, khuli mavanse kavunjeritswangwa nu khusambwa mu muliro, ni ndyo khaandi kalitsa khu kholekha matukhu ki shiheri. ⁴¹ Mwana wu Mundu alitsa kurhuma tsingerosi tsyetsye, natsyo tsyilitsa khuvunjeritsa khurhula mu vwami vwevwevuli mundu wosi wisikaralitsanga na yavo vosi vakholanga vwoni, ⁴² Vitsa vavasuve mu muliro kwi lilumbi, wa khuliva ni lilira nu khuteteitsa mino. ⁴³ Nalwo lwa valunji viitsa vang'ang'e khuli vulavu vwi lyuva mu vwami vwa Ise wavo. Woyo uli na marhoyi, na ahulire.

⁴⁴ Vwami vu mwikulu vuli khuli livikhiro lyi itsahabu lyaviswa mu mulimi. Mundu mulala yajilola najivisa. Nali nu vuyansi yatsia khukulanyinya vyosi vya yali navyo atukhe khukula mulimi tsana. ⁴⁵ Khaandi vwami vu mwikulu vuli khuli mushiranyinyi akhavanga tsi lulu tsyu vukuli vululu. ⁴⁶ Lwa yanyola ilulu indala yu vukuli, yatsia nakhulitsa vindu vyosi vya yali navyo najikula.

⁴⁷ Khaandi vwami vwu mwikulu vuli khuli miluvo chya valuvi vasiuva mu inyansa khuluva tsisutsi tsinkanu tsinyikhi. ⁴⁸ Lwa kwali ni kwitsule tsisutsi valuvi vakukhwesa khuluchinga. Ni vikhala hasi nu khuvunjelitsa tsisutsi tsindahi nu hutsivikha muviruvi, navutsa tsisutsi tsindamanu vatsisiuva. ⁴⁹ Ni ndyo kitsa kave mu inyinga yi shiheri. Tsingerosi vitsa vitse nu khwavukhanyinya vandu vatamanu khurhula mu valunji. ⁵⁰ Vitsa vavasiuve mu lilumbi lyu mu muliro, hanakhuve ni lilira nu khuteteyitsa mino.

⁵¹ Yesu yavarheva, "muhulire yako kosi kamuvolere?" Navo vamuvolera, "Nyee."

⁵² Yesu Yavavolera, "vuli muhandichi wosi wa Malako ukwire mwechitswi wu vwami vwu mwikulu anyala khusesanyinywa khu mwene insu, arhulitsanga mulivikhiro lyelye vindu vikhulu ni vihya." ⁵³ Na katukha lwa Yesu yali niya khamala khwekitsa tsinkanu yitsi, yasimukha narhula havundu hene yaho.

⁵⁴ Khu Yesu yatukha mu lusomo lwelwe khaandi ni yekitsa vandu mu lisinakochi lyavo. Vachenya ni vola, "Mundu wuyu arulitsa hena vucheri yuvu ni tsingulu tsyu khukhola vindu vyukhuchenyinya yivi? ⁵⁵ Wuyu shyali mwikhula wu mufundi? Nyina wewe shyalangwangwa Malya? Na vamwavo veve shyi vali Yakobo, Yosefu, Simioni nende Yuda? ⁵⁶ Na vambotso veve vosi shyivali hanu halala na khutse? Mundu wuyu yanyola hena vindu yivi vyosi? ⁵⁷ Vamanya va vihiritswe neye. Navutsa Yesu ya va volera, "Muporofeti shya vulakhu khuherwa luyali, nikhali mushivala shyi wavo nende khu vandu vyi insu yeye. ⁵⁸ Shiyakholakhu akhole vyukhuchenyinya vinyikhi iwavo tawe shichira khuvula khu suuvira khwavo.