¹ Inyinga yene yeyo Yesu yavirhira mu mulimi kwavali varakamu inganu inyinga yi litukhu li lisabato. Vechitswi veve vali ni insala ni varhanga khwamula imu nu khulya. ² Vafariayo va valola, niva volera Yesu, "Hensa vechitswi vovo vakhola shikholwa shya Malako kerhu kakayanga kavule khukholwa khu litukhu li lisabato" ³ Navutsa Yesu ya va volera, "Shyumwasoma khu ka Daudi yakhola mu matukhu ka yali ni insala, halala na va yali navo? ⁴ Daudii yinjira munsu mwa Nyasaye ma nalya mukati mutakatifu kwenyekha vavule khulya na yavo va vali navo, navutsa kwali vutsa kwa vasalisi vonyene khulya. ⁵ Shyu mwasoma khu mu Malako ka Musa khuli vasalisi mulitemberi khu litukhu lilisabato khuli vononyinyanga lisabato lyene yero; navutsa valolekha vavula vutamanu vwosi? ⁶ Navutsa mbavolera, hanu khuli nu mundu mukali khuvira litemberi. ⁷ Mwakhamanyi khuli Mahandiko Matakatifu kavolanga, "Ndenya tsimbavasi, shiviri tsisataka tsyi visiuviliro', Shyumwakhakhalachire vavula vutaamanu. ⁸ Shichira Mwana wu Mundu neye Mwami wi litukhu lyi Lisabato."

⁹ Khu Yesu yarhula yaho, natsya ni yinjira mu li sinakochi lyavo. ¹⁰ Na mundu yalimu nu mukhono kwali nu kwaniala. Vafarisayo vamurheva Yesu, "Katukhana khuhonyinya mundu mu litukhu lyi lisabato?" Khu vanyole shivune shyu khu muyala akholi vwoni.

¹¹ Yesu ya varheva, "Musatsa shina mu munye, niva uli ni likondi lilala lyonyene, ma likondi tsana ni likwa mu lilina khu litukhu lyi lisabato, shiyakha likumiire alikhwese khurhulamu? ¹² Mundu shyaali nu vukuli vukali khuvira likondi! "Khulwayako Malako kerhu kavuchilira khukhola vulahi mu litukhu lyi lisabato." ¹³ Yesu yavolera mundu woyo, "Nyira mukhono kwokwo." Yamanya na nyira mukhono kwekwe na nu kuhona; nu kukalukha vulahi khuli mukhono kundi kwali mulamu. ¹⁴ Navutsa vafarisayo varhulaho ni vatsya khu lomba shikhalo khuli vanyala khu mwira.

¹⁵ Yesu lwa ya manya kavali ni va lokhitsanga, ya manya arhule hawene yaho. Vandu vanyikhi va mu londa, neye ya va honyinya vosi. ¹⁶ Navutsa ya va kaya va khatsya khu lomba amanyikhe khu vandu. ¹⁷ Khu karhwekhitswe kali kandikwa nu muporofeti Isaya lwa ya oola, ²¹ na mu lirha lyelye vandu vyi tsihiri valitsa khuva ni lisuuviritswa."

²² Valera Yesu mundu muvuvekhu khaandi itimbiti neye yali na matimoni. Yahonyinya mundu wuyu, natukha khumoloma nu khulola. ²³ Vandu vosi vachenya khu yaka, ni va vola, "wuyu anyala khuva mwana wa Daudi?"

²⁴ Navutsa lwa Vafarisayo vahulira shilolekhitso yishi, vavola, "Wuyu shakhungamga matimoni navutsa arhumikhira Beletsebuli mwamihi wa matimoni."

²⁵ Yesu yamanya inganakani yavo na vavolera, vwami vwosi vukavukhananga vulera khusambukha, na shyavuli litaala anoho insu ikavukhananga shyilasinjira. ²⁶ Niva Setaani akhunga Setaani, yikavukhanyinya mwene Khu mwene. Khu vwami vwe vwakhasinjire ndi? ²⁷ Na niva inse khunga matimoni khurumikhira Beletsebuli, na vana venyu navo vakakhunga matimoni ni varhumikhira wina? Shichira yaka valitsa khuva vakhalachi venyu. ²⁸ Navutsa niva khunga matimoni na Roho wa Nyasaye, mu manye vwami vwa nyasaye vwitsi khu munye. ²⁹ Ma khaandi ndyo wina unyala khwinjira munsu yu mundu witsingulu yonone vindu vyevye nikharangi khuvoha mundu wi tsingulu mwene khu yononyinye insu yeye. ³⁰ Mundu ukhali ninse ahangalitsana ninse, ukhavunjeritsa halala ninse asalanyinyanga. ³¹ Khulwayako muvoleranga, vuli vwoni na manyeko vandu valikheverwa, navutsa khunyeka Roho shivaliverwa tawe. ³² Mundu ulolmoloma vatamanu khu Mwana wa Mundu alaverwa tsimbavasi, navutsa ulomoloma vutamanu khu Roho Mutakatifu, shyaliverwa mulirova yiri anoho mulirova liitsanga. ³³ Lombi musala khuva mulahi na makhuyu ka kwo kalava malahi, anoho lomb musala mutamanu na makhuyu ka kwo kalava matamanu, shichira musala kulamanyikha khu lwa makhuyu ka kwo. ³⁴ O munye lwivulu lwi vihirikomo, shichira muli vatamanu, munyala ndi khuvola vindu valahi? Khurhula khu vindu vitsula mu mwoyo munwa kulomolomanga. ³⁵ Mundu mulahi khurhula mu livikhiro lilahi lyu mwoyo kwekwe alalera vindu vilahi. Na mundu mutamanu khurhula mulivikhiro lyu mwoyo kwekwe alarera vindu viri vitamanu. ³⁶ Muvolereranga khu litukhu lyu khalachirwa vandu vitsa vahane livalitsa lya vuli vali likhuva lyi tsimbakha tsya vutsa kavitsa vave ni vavola. ³⁷ Shichira khu makhuva koko mwene ulavalitsirwa vulunji, khaandi khu mukhuva koko mwene ulakhalachirwa."

³⁸ Valala khu vahandichi na Vafarisayo vamurhevulira Yesu ni vavola, "Mwechitsi, khwakhayansi khulola shilolekhitso khurhula khu yiwe."

³⁹ Navutsa Yesu yavarhevulira na vavolera, "Munye likhula litamanu ni lyu vuheyi murheva shilolekhitso. Navutsa shivulaho shilolekhitso shyamuherwa, shikhali shilolekhitso shyu muporofeti Jona. ⁴⁰ Khuli Jona yali matukhu kavaka mmbasu nu vutukhu munda mwi isutsi, khaandi ni ndyo Mwana wu Mundu alakhave matukhu kavaka mmbasu nu vutukhu mu mwoyo kwi lirova. ⁴¹ Vandu va Neneve valakhasinjire ni likhula yiri mu mayalo navo valitsa khumukhalachira. Shichira vo vikanira khuvirhira khulirwatsa lya Jona, Navutsa hensi, mundu mukali khuvirhitsa Jona ali hanu. ⁴² Muruchi wi shikhali wa Sheba alitsa khusinjira mumayalo na vandu vi likhula yiri nukhu vakhalichira, shichira yachenda khurula khu shiheri shyi lirova khuhulira mekitso kuvucheri ku mwami Solomoni, na hensi, mundu mukali muno khuviritsa Solomoni ali hanu. ⁴³ Lwa roho mutamanu kurulanga mu mundu, kuchendachendanga mushangalangwe nukukhava ha kuhuluukhira, navutsa lwakuvula khunyola hukhuhulukhira ⁴⁴ kumanya kuvola ndakalukha munsu yanje yandarhulamu, lwene lwa kukalukhanga nu khunyola nili insere yayenswa nu khulokhitswa vulahi. ⁴⁵ Kumanya kutsya khuvukula miroho chindi saba mitamanu khukuvirha ma chyitsa chyosi khumenye mu. Na liva lyu mwimala lyu mundu woyo litamana khuvirha lyukhurhanga. Khaandi kalakhave ndyo khu vandu va likhula litamanu yiri."

⁴⁶ Lwa Yesu yali nashilomoloma na vandu, Nyina wewe na vamwavo veve vasiinjira irwanyi, nivenya valomolome naye. ⁴⁷ Mundu wundi yamuvolere, "Hensa Nyina wowo na vamwavo vovo vasinjire irwaanyi yeyo na venya khulomoloma niwe."

⁴⁸ Navutsa Yesu yamurhevulira na muvolera, "Nyina wanje na vamwavo vanje ni vanga wina? ⁴⁹ Ma nanyira mukhono kwekwe nu khusona khu vechitswi veve nu khuvola, "Hensi yava navo mama wanje na vamwavo vanje! ⁵⁰ Woyo ukholanga vulaliri vwa Ise wanje uli mwikulu, navo vamwavo, na vambotswa na mama."