¹ Lwayesu yikha hasi khurula khushikulu, shituma shikali shiavandu shiamulonda. ² Khandi mundu yaali niyalwala vuchele yiitsa namusikamila, namusaya navoola mwami nuyanza mbonyinya.

³ Yesu yamutilaku numukhono kwe navoola, mbuchilili nenya uve mulamu, khandi yamanya nahona nava mulamu khuranga isaa yeneyo. ⁴ Yesu yamaaanya namuvolelaheenza, wakavolelakhu mundu wosi tawe, nikali tsia wimanyinye khuvasalisi, kandi urulitse shianwa shiukhusanditsa Nyasaye kwimanyinya khuli lilako lia Musa livolanga.

⁵ Lwa Yesu yinjila kaberenamu, mwimilili wa vasikali yiitsa khu Yesu namusaya nuyanza ukhonye, ⁶ Navoola "Mwami, murumishi wanje ukoni ingo ulwali khali shianyala khuvukha tawe."

⁷ Nalwo lwa Yesu yamuvolela nzitsanga namuonyinya.

⁸ Nalwo lwa mwimilili wavasikali yamuvolela Mwami, shindushili yive kwitsa munzu mwanje tawe, nikhali nuvoola likhuva lilala murumishi wanje alahona. ⁹ Khali inzi ndi hasi havasikali vali nuvunyali, khandi inzi ndi navasikali vali hasi huvunyali vuanje, nimbolele huyu hamba yitsanga khandi nimbolele hundi oyo tsia atsitsanga, khandi ndio khuvarumishi vanje nimbolele huyu khola muinzi yuku akholanga.

¹⁰ LwaYesu yahulila makhuva yako yachenya navolela vandu vaali nivamulondi, kilikali vavolelanga shili khulolakhu lisuvila likali khuli yili muisiraeli mwosi. ¹¹ Khandi vavolelanga, vandu vanyishi valitsa khurula ivukwi nande imbo, navo valikhala na Ibrahimu, na naIsaka, na Yakobo, muvwami vumwikulu. ¹² Nikhali vaana vu vwami valasuvwa ilwonyi mushisundi, nalwo lwa khutsitsa khuva nililila nukhutekeyitsa mino." ¹³ Nalwo lwa Yesu yavolela mwimilili wa vasikali, "simukha utsii! Kave kwivi khuli usuvili. Khandi murumishi wewe yahona isaa yeneyo.

¹⁴ LwaYesu yiitsa niyinjila munzu mwa petro, yanyoola nakukhulu we nakoni khushitali nalwala ihoma. ¹⁵ Yesu yatiila khumukhono kwe ihoma nimulekha. Navukha navarumishila. ¹⁶ Lwa tsisaa tsia alukolova tsiali nitsitushi, vandu valera vandu vamatimuni kanyakhitsanga: khandi yakhunganyinya matimoni khuvirilalikuva lielie, khandi nahonyinya valwale vaali niviitsi voosi. ¹⁷ Kamanya karueshitswa makhuva kumuprofeti isya yaali niyavoola, avukuli vuteteshelovweru nende vulwale vueru.

¹⁸ LwaYesu yalola vandu vanyiishi viitsi vivunjelitsi wayalinali, yavolela veechive chendi kwambushe luveka lundi lwinyanza. ¹⁹ Mwekitsi waamalako yiitsa navoola, mwekitsi nzitsa khukhulonda havundu hoosi wutsia.

²⁰ Nalwo lwa Yesu yamuvolela, vivwe vili na havundu wavimenya, khandi khandi manyonyi kali nivitsu viakamenyamu, nikhali mwana wumundu avulakhu havundu hanyala khuvikha murwi kwekwe.

²¹ Khandi mulala khu veechi ve yamuvolela, mwami, suvula nzi khuyevela tata wanje.

²² Nikhali Yesu yamuvolela, nonda, lekha vakhutsu vayevele vakhutsu vavo.

²³ Yamanya natsiamuliaro, khandi veechi ve vamulonda. ²⁴ Khandi lola, vushindu vwimbutsa vulitohu vwautsa khunyanza, nivunuya liaro nitsingulu niliva himbi kwiyinikha. Nikali Yesu yaali akoni tsindolo. ²⁵ Nalwo lwa veechi ve viitsa wa yali nali nivamuvushitsa, nivavola Mwami khuhonynye khutivanga.

²⁶ Nalwo lwa Yesu yamanya navavolela, "kachilaschi muli nuvurii munyi vandu valisuvila litititi?" Yasinjila nakonde shela vushindu nende inyanza. Khandi vushindu vwimbutsa vwalekha khuhutsa matsi nikalekha kwinuya.

²⁷ Voosi vaali muliaro vachenya nivavoola hiyu nimundu walukanu shina, khalivushindu nende inyanza vimuhulilanga"?

²⁸ Lwa Yesu yatukha luveka lundi mushivala shia vakeresi, vandu vavili vaali namatimoni vavukana naye, vaalinivarula mumulimi kwa vayevelamu vandu vakhutsii. Khandi vandu venavo vaali valulu muno avulakhuo mundu wosi yavirakunjila yeneyo. ²⁹ Khandi lola valila numwoyo mukali nivavoola, nishina shiawenya khukukholele yive mwana wa Nyasaye? Witsi khukhunyakhitsa matukhu keru nikashili khutukha.

³⁰ Khandi kwalio nende shituma shikali shitsingulume himbi hawenao, nitsilitsanga. ³¹ Nalwo lwa matimoni kaali nikamenya muvandu yavo kasaya Yesu, lu khurulitsanga muvandu yava lekha khutsii kwinjili mutsinngulumetso.

³² Nalwo Yesu yakavolela ruli mtsii, lwakarula katsia nikinjila mutsingulume: khandi lola tsingulume tsiakholomokha maliviri khurula khushikulu tsiosi nitsinjilamunyanza nitsikhutsa. ³³ Nikhali vandu valindanga tsingulume tsienetso, lwa valola kaali nikikholeshe, viilukha nivatsia mulitaala nivavolela vandu koosi kaali nikikholeshe khulondokhana khuvandu vaali namatimoni. ³⁴ Kaandi lola, vandu voosi khurula mulitaala viitsa khulolaYesu. Lwa vamulola vamusaya aruli mulusomo lwavo.