¹ Khandi lwa vwali nivwakhashia, vimilili vavasalisi, nende vasakhulu vimilila vandu vahulishitsana vire Yesu. ² Vamuvoa makhono, nivamuila khu Pilato yaali nali Govana.

³ Khandi lwa Yuda yalola vamali khumukhalachila, yavelela mumwoyo kwuekwue nalwo lwa yamanya yakalushitsila vimilili vavasalisi nende vasakhulu vimilila vandu tsishilinji salasini tsia vali nivamuele ⁴ Yamanya navavolela "kholi vwoni khutsama mundu avulakhu vutamu vwosi tawe. Nikhali vo vamuchiipa makhuva kuvoolanga "kalinuvukhonyishina nakhutsi, nikoko yivi mwene." ⁵ Khandi yamanya yasuva tsishilinji tsienetso mulitembeli, narula natsia niyisunga. ⁶ Mwimilili wavasalisi yavukula mang'ondo kenako navoola, "'shivuli vulayi khuviikha mang' ondo kishisayi mulivishilo." ⁷ Vamanya vahulishitsana vatsikhukula mulimi kumundu mulonji, kuve mulimi kukhuyevelamu vaandu vacheni. ⁸ Khulwa yako mulimi kwenoko kwalangwa "milimi kwishisayi" kali nunund. ⁹ Khulwa yako makhuva kumprofeti Yeremia yaali niyavoola, kamanya karwueshitswa, nikavoola "vavukula tsishilinji salasini nivamua khuli vaali nivaulishitsane. ¹⁰ Vamanya vavukula mang'ondo kenako nivaha mulonji witsiyungu khuli Mwami yaali namolele."

¹¹ Khulwa yako Yesu yasinjila imbeli wa kavana, nalwo lwa kavana yamureva nive mwami wa vayaudi? Yesu yamuchiipa yive nive uvolanga.

¹² Nikhali lwa yayalwa na vimilili va vasalisi nende vasakhulu yahonjela vutswa. ¹³ Nalwo lwa Pilato yamuvolela shuhulila makhuva yaka koosi kavavoola khwive tawe? ¹⁴ Nikhali shiyachiipakhu khali likhuva lilala tawe, nalwo lwa Kavana yaali nilichenya likali. ¹⁵ Khulwa yako, kwali mwima kwa kavana khuvoholola muvoe mulala litukhu lia pasaka, muvohe wavandu vavetsa nivarovole. ¹⁶ Matukhu kenako khualio numuvohe mulala yalangwa baranaba. ¹⁷ Khulwa yako lwavaali nivivunjelitsi halala, Pilato yavareva "nivina wamwenyanga mboholole, ni Baraba, inoho Yesu ulangwangwa Kristo?" ¹⁸ Shichila Pilato yamanya valolele Yesu imbotokha.

¹⁹ Khandi lwayaali niyikhale khushisoko shiuvuami atushi khukhalaka makhuva, mukhali we yaruma mundu amuvuvolele, "avuli khuvakhu nilikhalaka liosi khulondokhana khumundu mulunji oyo tawe, shichila nyooli linyakhana linyishi vutukhu mumaloro shichila mundu oyo."

²⁰ Khulwa yako vimilili vamalako nende vasakhulu, vakatilitsa vandu vahuchilili Baranaba avohololwi, navutswa Yesu avabwi. ²¹ Nalwo lwa Kavana yavareva, "nivina wa mwenya mboholole khuvavohe vavili yava?" Vamuchhipa Baraba."

²² Nalwo lwa Pilato yavareva "nishina shia mwenya kholele Yesu ulangwuangwua Kristo?" Khandi vandu voosi vavoola "avambwi."

²³ Nalwo lwa yavareva "kachilashi nivutamanu shina vwakholi?" Navutswa vatsilila khuvwatsa numwoyo mukali nivavoola avambwi" ²⁴ Lwa Pilato yalola vamuchayi khandi varanji shileche, yavukula matsi nasava makhono imbeli wavo navoola, "mbulakhu vutamanu vwoosi khulondokhana khulikhutsa liu mundu uyu tawe, kali khumunyi vene."

²⁵ Khandi vandu voosi vavoola, masayi keke kavanzwi khukhutsi nendevana veru. ²⁶ Nalwo lwa yamanya navoholola Baraba, navutswa lwa vasikali ve vaali nivakhamushuta vivoko, Pilato yahana Yesu vamuvambe.

²⁷ Nalwo lwa vasikali vakavana vavukula Yesu nivamuila mupraitoria, vasikali voosi viitsa nivivunjelitsa mwenomo. ²⁸ Vamufalula tsinguvu tsie, nivamufaala tsinguvu tsia zambarao. ²⁹ Khandi valomba itaji yamavua, nivamufuala khumurwi kwuekwue, nivavukula indovosi nivavikha mumukhono kwuekwue musatsa. Khandi vasikama imbeli wewe nivamukholela shihenyehenye nivavoola, "milembe, mwami wa vayaudi." ³⁰ Khandi vamusutsila mare nivamutuyatuya ni indovosi mumurwi kwe. ³¹ Lwavaali nivakhamala khumukholela shihenyehenye, vamufalula tsinguvu tsia zambarao, nivamufuala tsinguvu tsietsie, nivamurulutsi ilwonyi khutsia khumuvamba.

³² Lwavaali nivarula ilwonyi, vavukana numundu khurula kirene yalangwa saimoni, vamulasimisha atsii navo achingi musalaba. ³³ Vamanya niviitsa havundu halangwa Gologotsa nakhwo khuvoola "avundu hivihanga." ³⁴ Khandi vamanya vamua Idivai yavachanganyinyimu shilulu, navutswa lwa yatsamakhu, yambakhana khung' ua. ³⁵ Lwa vaali nivakhamala khumuvamba vakhuva ikura nivakavuna tsinguvu tsietsie. ³⁶ Khandi vasikali vikhalao nivamulinda. ³⁷ Khandi hikulu khumusalaba khumurwi kwa Yesu, vavikha maandiko kavoola shivune shichili nivamuvamba kavoolanga "HUYU NEYE YESU MWAMI WA VAYAUDI." ³⁸ Khandi vihuvi vivili viavambwa halala na yesu milala khumukhono musatsa nawundi khumukhono mukhali. ³⁹ Khandi vandu vavira khunjila yeneyo vauka nivanuya murwi chiavo. ⁴⁰ Nivavoola "yive mupomoli wilitembeli nukhuliumbakha khumatukhu kavaka, yihonyinyi yive mwene! Rula khumusalaba niiva uli mwana wa Nyasaye!"

⁴¹ Khali vimilili vavasalisi, nende vekitsi va malako, nende vasakhulu, vamukholela shihenyehenye nivavoola, ⁴² "Yahonyinya vandu vanyishi, navutswa shianyala khwionyinya mwene tawe. Shiali mwami wavaisraeli. Niyishe khurula khumusalaba na khutsi khulamusuvila. ⁴³ Shiyasuvilila Munyasaye namukhonye khurula khumusalaba shiyavoola "ni mwana wa Nyasaye." ⁴⁴ Khali viuvi viali nivivambilwi naye valomoloma makuva matamanu khuye.

⁴⁵ Khuranga sasita tswumbasu shisundi shiitsa khutukha saatisa tswumbasu ⁴⁶ Khandi mutsisaa tsia saatisa, Yesu yalila numwoyo mukali navoola, "Eloi, Eloi, lamasabakthani?" Nakhwo khuvoola Nyasaye wanje Nyasaye wanje kajilashi unzivale?"

⁴⁷ Lwa vandu vaali nivasinjili hawenao vahulila, "vavoola alanga Eliya."

⁴⁸ Noho noho mulala khuvandu vaali nivasinjiliho, yatsia vwangu navukula Idivai yazukanyinywamu shilulu, navoela khushisala naha Yesu ang' uwi. ⁴⁹ Khandi vandu vaali nivalio vavoola, "lekha ave khuenya khulole niiva Eliya alitsa khumukhonya", ⁵⁰ Yesu yamanya yalila numwoyo mukali nakhutsa.

⁵¹ Khandi lola luvaala luali nilwashinga khuvwaali mulitembeli, lwarandukha khurula ikuli khutukha hasi, khandi shivala shiatechela machinakulwanda nikatikhana. ⁵² Khandi vilindwa vikukha, khandi vandu vatakatifu vaali nivakhutsa visimikha. ⁵³ Nivarula muvilindwa lwayaali namali khwisimukha, vamanya nivatsia mulitaala litakatifu khandi valolekha khuvandu vanyisi. ⁵⁴ Lwa mwimilili wa vasikali nende vandu vaali nivalindi Yesu lwa valola shivala nishitechelanga nende vindu viali nivikholeshenje, vamanya vava nuvurii vunyishi nivavoola, "kilikali huyu ni mwana wa Nyasaye." ⁵⁵ Khandi khwalio na vandu vakali vanyishi nivasinjilili ihale, navo vamulondanga mukalilaya nimurumishila. ⁵⁶ Vandu valala khuvandu valio, yaali meri makatalena, meri mama wa yakobo nende yosefu, nende mama wa vana va zebetayo.

⁵⁷ Lwakhulukolova kwali nikhutushi, mundu muinda yiitsa khurula mulusomo lwa arimatsea, yalangwa yosefu, kandi yaali mulala khu veechi va Yesu. ⁵⁸ Yamanya natsia khupilato namureva amuhe muvili kwa Yesu. Nalwo lwa Pilato yahana lilako ahelwi. ⁵⁹ Yosefu yamanya navukula muvili kwa Yesu nakukhunikha nuluvala, ⁶⁰ Nakuvikha mushilindwa shiyia shieshie mwene sayaali niyayeva, khandi nakolongominya lichina likali nakhunikha vwina vwishilindwa, niyakhamala yarula natsia. ⁶¹ Khandi meri makatalena nede meri wundi vaali vikhale hashilindwa henao.

⁶² Khandi militukhu liakhavili nalio liali litukhu liavali nivamali kwirecheshela ibasaka, vimilili vavasalisi nende mafarisayo viitsa halala nivatsia khuvukana na Pilato. ⁶³ Nivamuvolela "mwami, kwitsushitse mundu muveyi oyo lwa yaali nashili mwoyo, yavoola litukhu liakhavaka nzitsakhwisimukha. ⁶⁴ Khulwa yako hana lilako shilindwa shilindwi khumatukhu kavava, niiva shikhulakhola khurio tawe, veechi ve vanyala khwitsa khumuhuve mavaraje khuvolela vandu, yisimushi khurula mushilindwa; khandi vuveyi vwavo vatsitsa khuvira vukhuranga."

⁶⁵ Pilato yavavolela "vukuli vasikali, tsiimulindi khuli vene mumayi." ⁶⁶ Vamanya nivatsia nivavikha mukasa khulichina liali khushilindwa nivavikhao vasikali valindi.