¹ Lwa Yesu yaali niyakhamala makhuva kenako koosi, yamanya navolela veechi ve, ² "Mumanyikhu kashili matukhu kavili ibasaka ilava nitushi, na mwana wa Atamu vatsitsakhumutsama nukhumuvamba."

³ Inyanga yeneyo mwimilili wa vasalisi nende vasakhulu vimilila vandu vaali viitsi vivunjelitsi halala mulufaranda lu musalisi mukali yalangwa Kayafa. ⁴ Voosi vaulishizana vakhave makhuva kanyala khuchila vamukumili nukhumwira. ⁵ Khandi vaulishitsana livuli khuva litukhu liabasaka tawe shichila vandu valakhuva liyoko nukhukoyanyinya kakhuenya khukhola.

⁶ Khandi lwa Yesu yaali nali Betsenaia munzu mwa Saimoni mkoma, ⁷ Lwa vaali nivalitsanga, mukhali yinjila nachinji ichupa yamakhura kuvukuli vululu, yamanya natsukhulula makura kenako khumurwe kwa Yesu. ⁸ Nikhali veechi ve lwa valola makhuva khenako, vasinyikha niivavoola kachilashina wononyinya makura yaka? ⁹ Kakhakulitswi mang' ondo manyisi kakhonye vandu vatakha."

¹⁰ Nikhali Yesu yamanya tsinganakani tsiavo navavolela, kachila shina musumbula mukhaliuyu? Shichila nishikholwa shilayi shiakholele. ¹¹ Munyi muli nende vutakha matukhu koosi nikhali shimutsitsa khuva ninzi matukhu kooso tawe. ¹² Shichila lwa nzushili mkura kahunya mwayu mulai, andiyalishitsanga khulikhutsa lianje lwamba nimbikwa mushilindwa. ¹³ Kilikali vavolelanga, havundu hosi ha Ivanjeli itsitsa khwilwatswa mushivala, shundu shiamukhali uyu akholi silitsishitswa lwavava nivilwatsa.

¹⁴ Khandi mulala khu veechi ve, yalangwa Yuda Iskarioti, yamanya narula natsia khuvimalili vavasalisi. ¹⁵ Navavolela, nishina shiamutsitsa khumba nayinzi nzitsa khuvikha Yesu mumikhono chienyu? Nalwo lwa vamanya nivavukula tsishilinji makhomi kavaka nivamua. ¹⁶ Khuranga Isaa yeneyo yamanya yaranga khukhava vwiyangu khuli atsama Yesu.

¹⁷ Litukhu liukhuranga limikati chialombwa vuchila mamela veechi va Yasu viitsa nivamureva nihalishina wawenya khutsii khulombe shukhulia shia basaka?"

¹⁸ Nalwo lwa yavavolela, "tsii mulitaala muvolele oyo wamba nivarukakhu, "mwekitsi avoolanga "isaa yanje imali kutukha. Nzitsa khulombela ibasaka munzu mwomwonende veechi vanje."' ¹⁹ Khandi veechi vakhola khuli Yesu yaali navavolele, nivatiyalishitsa shukhuloa shia basaka.

²⁰ Lwakhulukolova khwali nikhwakhatukha, yikhala halala nende veechi ve khulia shukhulia. ²¹ Khandi lwa vaali nivalitsinga yavavolela "kilikali vavolelanga, mulala khumunyi alanzama."

²² Vamanya vavelela muno nivaranga khumureva shia mulala nivavoola, Mwami, anyala khuva inzi toto?"

²³ Yesu yavachiipa, "oyo ulitsa halala ninzi khusahani indala naye atsitsakhunzama. ²⁴ Mwana wa Atamu atsitsa khutsia, khunjila yayalachilwa khandi khuli kaali kahandikwa khulondokhana khuye. Nikhali alikhuvutinyu mundu atsitsa khutsama mwana Atamu vwakhavele vulayi munduoyo niyakhivulwa tawe."

²⁵ Yuda, neye atsitsa khumutsama yamureva navoola "Rabii, ninzi noho?" Yesu yamuhiipa yivi mwene uvooli."

²⁶ Lwavaali nivalitsanga, Yesu yavkula mukati nakasitsa, natong'olanyinya. Nakavulila veechi ve, navavolela "vukuli mulii yuku nakwo muvili kwanje." ²⁷ Khandi yavukula shikombe shilimu idivayi nasanditsa, navaha navoola, "ng'wi munyi voosi. ²⁸ Shichila yuku nakwuo musayi kwanje khwindakano kusundukha khurulitsao vwoni vwavandu vanyishi ²⁹ Nikhali vavolelanga, shinzitsa khung' uawakhu halala namunyi matunta kumusabibu, khutukha litukhu lia nzitsa khung'ua idivai imbia halala namunyi muvuami vwa tata wanje."

³⁰ Khandi lwavali nivakhamala khwimba, varula nivatsia khushikulu misayituni. ³¹ Nalwo lwa Yesu yavavolela "munyi voosi mutsitsa khundekha vutukhu vwanunundi shichila kahandikwa nzitsa khukhupa mwayi wamakondi khandi makondi kalilukha nukhusalana.

³² Nikhali lwamba ninzisimushi khurula mulikhutsa nalimila imbeli wenyu khutsia kalilaya."

³³ Nikali Petro yamuvolela khali niiva vandivoosi valakhulekha inzi khulekhakhu tawe.

³⁴ Yesu yamuchipa "kilikali khuvolelanga, vutukhu vwa nunundi itayua nisili khulakula ulava nunzambakhane hali khavaka.

³⁵ Nalwo lwa Petro yamuvolela "khali niiva nikhukhutsa nive shinzitsa khukhwambakhanaku tawe. Khandi veechi vandi "voosi vavoola makhuva malala kenako.

³⁶ Yesu yamanya natsia navo havundu halangwangwa ketsesemane nalwo lwa yavolela veechi ve, "yikali yaha nisundakhu imbeli hati saale." ³⁷ Khandi yamanya navukula Petro nende vana vavili vazebetayo, naranga khuva nuvuveleli nukhuvula mulembe mumwoyo kwe. ³⁸ Nalwo lwa yavavoolela, "mwoyo kwanje kuli nuvuveleli vunyisi, khutukha shikha shiukhukhutsa, yikhali yaha mulindi halala ninzi." ³⁹ Yisunda imbeli hati nakwa hasi maunama, nasaala. Navoola, "tata wanje, niiva kalanyalika shikombe yishi shimbiri, nikhali kakhava khuli nenya tawe navutswa "kave khuli yivi wenyanga. ⁴⁰ Yamanya nakalukha wa veechi ve vaali nivali, nanyoola vakoni tsindolo, nalwo lwa yavolela petro, "kachilashi muvuli khuva miheso halala ninzi khali isaa intala? ⁴¹ Mwenyakha muve miheso mamusaale muvuli khwinjila mumachelitso tawe. Mwoyo kuli nilienya nikhali muvulu ni muteteshelo." ⁴² Khandi yatsia lwakhavili nasaala. Navoola, tata wanje, niiva shinyala khung' uwa mushikombe yishi tawe kave khuli wenyanga. ⁴³ Lwa yakalukha yanyoola khandi vakoni, shichila tsimoni tsiavo tsiali tsindi tohu. ⁴⁴ Khandi yavalekha natsia khandi lwakhavaka nasaala navoola makhuva malala mele. ⁴⁵ Khandi Yesu yiitsa khuveechi veve navareva "mushikona tsundolo? Loli isaa itushi yu mwana wa Atamu atsitsa khutsamwa nukhuvikwa mumikhono chia vandu vooni. ⁴⁶ Vushi khutsii, loli oyo utsitsa khunzama umali khutukha."

⁴⁷ Lwa yaali nasilomoloma, Yuda mulala khu veechi ve likhomi navavili, yiitsa nishituma shia vandu vanyishi nivarumilwi nende vimilili vavasalisi nende vasakhulu vimilila vandu, khandi vaali vachinji vivavi nitsindovoshi. ⁴⁸ Khandi mundu atsitsa khutsama Yesu yaali avavolele oyo wanzitsa khua milembe nukhumukhumbelela naye mukumili. ⁴⁹ Nalwo lawa Yuda yiittsa wa Yesu yaali nali, "namua milembe namukhumbelela namulanga Rabii!"

⁵⁰ Nalwo lwa Yesu yamuvolela "mulina khola kawitsi khukhola." Nalwo lwa vandu vayaali navo viitsa nivamukumila Yesu. ⁵¹ Nalwo lwa mulala khu khuveechi va Yesu, yasomola shivavi narumula murumishi wu mwimilili wavasalisi, khandi namurema shiroyi. ⁵² Nalwo lwa Yesu yamuvolela, "kalushitsa shivavi shioshio mushiula shiayo, shichila yavo voosi vavukula lupanga valativitswa nulupanga. ⁵³ Ukanakana shinyala khusava tata naye anyala khuruma majeshi kitsinjelosi likhomi nakavili? ⁵⁴ Navutswa kanyala khurweshitwa karina maandiko niiva yaka shikanyala khukholekha?" ⁵⁵ Isaa yeneyo Yesu yareeva vandu vaali nivitsi khumukumila, "kachilashi mwitsi nitsimbanga nitsindovoshi khungumila khuli shihuvi? Matukhu koosi mbele mlitembeli ninzekitsanga kachilashi muvuli khungumula. ⁵⁶ Nikhali yaka koosi kakholeshe khurueshitsa maandiko kavaprofeti vaali nivavoola." Nalwo lwa veechi ve voosi vamanya vilukha nivamulekha.

⁵⁷ Lwa vakumila Yesu vamuila wa kayafa msalisi mkali, khandi vekitsi vamalako nende vasakhulu vimilila vandu, vaali vivunjelitsi iweneyo. ⁵⁸ Nikhali Petro yalonda Yesu ihale khu hati khutukha mulwonyi lu mwimilili wa vasalisi, khandi niyinjila mukari niyikhala halala na validi valindao alole katsitsakhwikholekha. ⁵⁹ Nalwo lwa mwimilili wa vasalisi nende vandu vayali nali navo vakhava vikhole vitamanu via Yesu yakhola khuvatushi khumuyala vamwire. ⁶⁰ Navutswa shivanyoola tawe, khandi vandu vanyiishi virulitsa nivavoola makhuva kuvuveyi khulondokhana khu Yesu, khandi vandi vavili vamanya vasinjila nivavoola, ⁶¹ Khwaulila "mundiyu navoolanga anyala khuononyinya litembeli lia Nyasaye makhandi aliumbashe khumatukhu."' Kavaka.

⁶² Nalwo lwa mwimilili wa vasali yareva Yesu "shiuchipakhu shindu khumakhuva kavavola khwive tawe? Nishina shiavavola khulondakhana khuyive?" ⁶³ Nikhali Yesu lahojela vutwa. Khandi mwimilili wavasalisi yamuvolela "khwusuhitsanga khulira lia Nasaye khwuenya ukhuvolele niiva niiva kristo mwana wa Nyasaye."

⁶⁴ Yesu yamuchiipa yive niive mwene uvoolanga. Nikhali vavolelanga khuranga lwenulu mutsitsa khulola mwana wa Atamu niyikhale khumukhono mulunji kutsingulu, khandi niyitanga mumalesi kumwikulu.

⁶⁵ Nalwo lwa mwimilili wa vasalisi yarandula tsinguvu tsie navoola, "unyekane! Kachilashi khutsilili khukhava vushaidi vundi? Loli, muhulili makhuva keke kamanyeko. ⁶⁶ Muvoolakhu shi" khulondokhana khumakhuva kenako? Vamuchiipa nivavoola, "atushila likhutsa." ⁶⁷ Nalwo lwa valala vamusutsila mare, khandi vandi vamurumula tsingume, na vandi vamusamula tsikhovi, ⁶⁸ Nivamuvolela niive Kristo. "Profeta nivi akhurumuli?"

⁶⁹ Khandi Petro yaali yikhale ilwonyi wulufaranda lwa vayalilamu, nalwo lwa murumishi mulala wishikhana yiitsa wa petro yali nali "namuvolela, shali yive uvele nende Yesu wakalilaya."

⁷⁰ Nikhali Petro yambakhana imbeli wa voosi "namukeya manyikhu makhuva kuvolatawe."

⁷¹ Lwa yaali narula ilwonyi mushilivwa, khandi murumishi wundi wisikhana yamulola navolela vandu vaali nivalio, "huyu neye mulala khuvandu vavele naYesu wanazareti."

⁷² Khandi Petro yambakhana niyisua, navoola "inzi manyikhu munduoyo tawe."

⁷³ Lwa mwana mukhana yaali niyakhamala khulomoloma naye, vandu vaalio nivikhale mushikhalo viitsa nivavolela Petro, "kilikali yivi ulimulala khuveechi va Yasu, shichila khali lilomoloma liolio limanyinya vutswa."

⁷⁴ Nalwo lwa yaranga khulama niyisua navoola, "inzi manyikhu munduyu tawe," naho naho itaywa yamanya yalakula.

⁷⁵ Nalwo lwa Petro yitsushitsa makhuva ka Yesu yaali namuvolele, "itaywa nishili khulakula ulava nunzambakhane alikhavaka." Nalwo lwa yarula ilwonyi nalila muvuchungu.