¹ Khandi Yesu yalomoloma nende vituma vyiavandu nende vekitsi veves ² Navavolela vekitsi vamalako nende mafarisayo vayikhala khu shisoko shia Mus. ³ Khulwa yako shindu shiosi shia vatsitsa khuvavolela mukhole, mwenyekha mukhole, nikhali mwakhalondi vikhele viavo tawe. ⁴ Vavukula misiko militohu mavatwikha vandu khu maveka kavo, khali shivenya khukhonyana khutilakhu tawe. ⁵ Khandi vakhola vindu khwimanyinya vandu vavalole, khandi vameta vindu khulifuala liavo. ⁶ Khandi vayanzilila khwikhala khu visoko vimbeli mumasinakoki, nende muvucheni, ⁷ Nende khuelwa mileme chu luyali mutsisokoni nende khulangwa na vandu rabii, {yaani mwekitsi}. ⁸ Nikhali munyi mwakhahuchilili khulangwa Rabi tawe; shichila mwekitsi wenyu nimulala, khandi munyivoosi muli amwavo na amwavo. ⁹ Khandi mwakhalanji mundu tata tawe, shichila tata wenyu nimulala ali mwikulu. ¹⁰ Khandi mwakhauchilili khulangwa vimilili, shuchila muli nende mwimilili mulala naye ni Krisito. ¹¹ Khandi oyo ali mukaliwenyu, atsitsa khuva murumishi wenyu. ¹² Khandi mundu wosi atsitsa khwichinga ikulu alikhitswa hasi, khandi mundu wosi atsita khwiyikhitsa hasi, alachingulwa ikulu.

¹³ Mulikhuvutinyu, munyi vekitsi vamalako nende mafarisayo, vanduvakaati! Mwikalila vandu vavuli khwinjila muvuamu vua Nyasaye, khandi munyi vene shimwinjilatawe, khandi yavo venya khwinjila shimuvahuchilila vinjile tawe. ¹⁴ Mulikhuvutinyu, munyi vekitsi vamalako nende mafarisayo, vakaati! Mwayinjila mutsinzu tsiavakhunzakhali, khandi mulikatilitsa lienyu musaala lisaala lirambi, khulwa yako mwitsa khunyoola likhalachilwa likali. ¹⁵ Muli khuvutinyu munyi vekitsi vamalako, nende mafarisayo vakaati! Shichila muchenda havundu hosi munyanza, nende khulillova nimukhavanga munyoole mundu wamunya khulomba khuva mundu mulunji, lwa munduyo ahuchililanga khuva mwechi wenyu mumulomba khuva mundu mutamanu hali khavili khuvira munyi khutsia musiatisi.

¹⁶ Muli khuvutinyu, minyi vimilli vavekhu, muvolanga mundu niyisui khuvwaali nivutamanu tawe, nikhali niiva mundu alisu khu itsahabu yiliitembeli alava yivoyi. ¹⁷ Munyi vavekhu vasilo! Shikali nishilena khuvindu vienevo, ni itsahabu inoo nilitembeli lilombanga itsahabu khuva intakatifu? ¹⁸ Khandi muvolanga mundu niyisui khuvwali nivutamanu tawe. Nikhali mundu niyisui khusataka ili khuvwali alava niyivoyi. ¹⁹ Munyi vandu vavekhu! Nishina shili shikali ni isataka inoho ni vwaali vulomba isataka kuva intakatifu? ²⁰ Khulwa yako, oyo wisua khuvwali yisua khuvwali nende khuvindu viosi vili khuvwali vwenovo. ²¹ Khandi oyo wisua khulitembeli yisua khlitembeli nende khu oyo mwene litembeli. ²² Khandi oyo wisua mwikulu yisua khu shisoko shia Nyasaye nende khu Nyasaye mwene wikhala khushisoko shienesho.

²³ Mulikhuvutinyu, munyi vekitsi vamalako, nende mafaridayo, shichila mulivakaati! Murulitsa izaka khali khuviamu vihunya vulayi, nikhali mwalekha makhuva makali ka malako, yaani, vulunji nende tsimbavasi nende vusuvilwa. Nivulayi khurulitsa itsaka vuchila khulekha vulunji nende tsimbavasi nende vusuvilwa. ²⁴ Munyi vimilili vavekhu, mwamanya khwaula tsisuna navutwa mumila ingamia!

²⁵ Mulikhuvutinyu munyi vakitsi vamalako nende mafarisayo, muli vakaati! Shichila mwokitsa ilwonyi wishikombe na mukari mwayitsula vunuuli nende khuvula khwilinda. ²⁶ Munyi mafarisayo vavekhu, ranji mwokitse mukari mwishikombe, khandi khu mwokitse ilwonyi.

²⁷ Mulikhuvutinyu munyi vekitsi vamalako nende mafarisayo mulivakaati, shichila mulikhuli vilindwa viavekwa ilaanji indavu vilolekha ilwonyi vulayi, nikhali mukari mwayitsula vikumba nende vuchafu vwosi. ²⁸ Khandi nindio munyi muli, mulolekha ilwonyi vandu valunji nikhali mukari mumioyo chienyu chayitsula vukaati nende vikhole vutamanu.

²⁹ Muli khuvutinyu, munyi vekitsi vamalako nende mafarisayo, muli vandu vakaati shichila mumbashila vilindwa viavaprofeti nende vandu valunji vulayi nukhuvisiaya. ³⁰ O Khandi muvolanga, khwakhaveleo mumatukhu kavakuka veru, shikhwakhasanji navo kusundula shisayi shia vaprofeti tawe. ³¹ Khulwa yako munyi vene mushuhutiyanga muli vaana va vandu viraga vaprofeti. ³² Khulwa yako yitsulitsi shipimu shia vatata venyu vaali nivaranjitsa. ³³ Munyi tsinzukha, vaana vinzukha, nishina shiakenyakha mukhole khumwionoloshe likhalachilwa khutsia mushiatisi. ³⁴ Khulwa yako nzitsa khuruma vaprofeti nende vandu vasitsa, nende vekitsi. Khandi valala khuvo mutsitsa khuvira, navandi mutsitsa khuvavamba, navandi mulavakhupa mumasinakoki kavo, nukhuvaima shia mulitaala. ³⁵ Nalwo lwa kalitsa khuvanzwa masayi koosi kavandu valunji kamuliva numwasundula mushivala, khuranjila khu Abeli nende Zakaria mwana wa barakia wa mwirila havundu hatakatifu khuvwali. ³⁶ Kilikali vavolelanga, makuva yaka koosi kalitsa kurweshitwa khulwivulu yulu.

³⁷ "Yivi yerusalemi, yerusalemi, wira vaprofeti nukhulesa majina yavo varumwangwa khuyivi! Nihali khanga nikhuvunjelitsanga halala khuli ingokho nivunjelitsi viminyli viayo mutsimbaha, nikhali shimwenya tawe! ³⁸ Khandi lolikhu, inzu yenyu yalekhwa vutwa shikhaya vuchila shindu, ³⁹ Khulwa yako vavolelanga, khuranga lwenulu shimutsitsa khundolakhu tawe, khutukha litukhu liamilitsa khuvoola, wakasitswa oyo witsanga khulira liumwai."