¹ Lwa Yesu yaali nali himbi khutukha yerusalemu, vatsia Betsefage himbi khushikhulu shia misayituni; yamanya yaruma veechi ve vavili, ² Navavolela tsii mlitaala lili imbeli wenyu khandi mulanyoola lpunda ivoelwi nende shimoli shiayo, chivohololi munderele. ³ Niiva mundu wosi alavareva muila hena ipunda, muvoleli Mwami yenyanga, naye alavasuvula mwitse nayo.

⁴ Khandi yaka koosi kakholekha kurweshitsa makhuva kamuprofeti yaali niyavoola. ⁵ Voleli vana vishikhana va sayuni, henzi mulole, Mwami wenyu yitsanga, nimuhoma, khandi yikhale khumwana wipunda.

⁶ Khandi veechi va Yesu vatsia nivakhola khuli yaali navavolele. ⁷ Vamanya valera ipunda nende mwana wayo, nivaala khuyo tsinguvu tsiavo, Yesu yikhala khupunda yeneyo. ⁸ Nalwo lwa vituma via vandu varanga kwuala tsinguvu tsiavo khunjila, navandi vaneka masambu nivaala khunjila. ⁹ Khandi vandu valala vimila imbeli wa Yesu navandi vamulonda inyuma, nivalanjilila ikulu nivavoola, "Hosana mwana wa Daudi! Wakasitswa oyo witsanga khulira liumwami! Hosana khu oyo uli ikulu muno!"

¹⁰ Lwa Yesu yinjila muyerusalemu, vandu vareva "nivina mwenoyo?"

¹¹ Kandi vituma viavandu vachiipa, "ni muprofeti ulangwaYesu khurula nazareti yakalilaya."

¹² Yesu yamanya niyinjila mulitembeli, naranga khukhunganyinya vakholi viviashara vaali nivakulitsanga nende yavo vakulanga, nende yavo vakhola viashara viamang'ondo nende yavo vakulitsa vituti. ¹³ Yavavolela kahandikwa inzu yanje ilalagwa inzu ilisaala; nikali munyi mwachilomba khuva imbinga yavanuuli.

¹⁴ Khandi vandu vavekhu nende valeme viitsa khuYesu mulitembeli khandi navahonyinya. ¹⁵ Nikhali lwa vimilili va mafarisayo nende veekitsi vamalako valola vikhole viukhuchenyinya via yaali nakholi, nende khuli vaana vaali nivalanjilili mwikulu nivavola Hosana mwana wa Daudi! Vamanya vamulolela vurima.

¹⁶ Vamanya vamuvolela, uhulila khuli vavoolanga? Yesu yamanya navachiipa mbulilanga, nikhali mushili khusomakhu khuli maandiko kavolanga, khurula muminwa chia vana vatititi khulava nilitsominya.

¹⁷ Yesu yamanya navalekha, natsia mulitaala lia Betsania nakona iweneyo.

¹⁸ Lwa vwaali nivwakhashia yarula, khandi lwa yali natsitsa mulitaala inzala yaranga khumuluma. ¹⁹ Yamanya yalola msaala kwamatunta himbi khunjila, yamanya yisunda himbi khu musaala kwenoko, nanyoola litunta liosi livulakhu tawe, kuvutswa namasambu konyene, yamanya yakuvolela, matukhu kosi matunta kavuli khunyolekha khu khwivi, khuranga isaa yeneyo musaala kwaranga khuuma.

²⁰ Lwa veechi valola, vachenya nivavoola, "musaalayuku kumi kurina vwangu?"

²¹ Nalwo lwa Yesu yavachiipa navavolela, "suvili vavolenga, niiva mulava nilisuvila vuchila khuva nilihayahaya, shiutsitsa khukhola khuli kakholi yaka konyene tawe, nikhali ulavolela khali shikulu rula yaha utsii munyanza, khandi katsitsa khukholekha kario. ²² Khandi shindu shiosi shia utsitsa khusava mulisaala niiva ulava nilisuvila ulanyoola."

²³ LwaYesu yaali niyiitsi mulitembeli, vimilili vavasalisi nende vasakulu vimilila vandu viitsa wa Yesu yaali nali lwayaali niyekitsanga, nivamureva "ukhola vindu yivi khuvunyali shina, khandi nivina yakhua vunyali vuenovo?"

²⁴ Khandi Yesu yavachiipa navavolela, khali inzi navareva lirevo. Niiva mulambolela, "khandi nainzi navavolela nihalishina wanarulitsa vunyali vujila nikhola vindu yivi. ²⁵ Shivatiso shia Yohana shiarula hena? Shiarula mwikulu inoho shiarula khuvandu?" Varanga kurevana vene khuvene khuli vanyala khuvoola "niiva khunyala khuvoola shiarila mwikulu, alakhuchiipa kachilashi mwavula khumusuvila? ²⁶ Khandi nikhuvoola shiarula khuvandu varia shichila shituma shia vandu, vaali vamanya Yohana ni muprofeti. ²⁷ Vamanya vachiipa Yesu "khomanyi ta", khandi Yesu yavachiipa, "khali inzi shinzitsa khuvavolelakhu, vunyali vuchila nikhola vindu yivi tawe. ²⁸ Nishina shia munyala khuvoola khulonndokhana khu makhuva yaka? Khwalio numundu yaali navana vishiyayi vavili. Yatsia khumwana wukhuranga namuvolela, nenya usamuli mumulimi kwa matunda.

²⁹ "Khandi mwana we wisiyayi yamukeya nzitsa tawe, nikhali yamanya natsia.

³⁰ "Khandi mundu mwenoyo yatsia khumwana we wakhavili namuvolela makhuva malala kenako. Yamuchiipa tata natsia, nikhali shiyatsia tawe. ³¹ Nivina khuvana vavili yava yakhola vulalili vwa tata we?" Vamuchiipa wukhuranga," khandi Yesu yavavolela, kilikali vavolelanga, vakhalachi vuvu shuru, nende vaheyi valimila imbeli wenyu khwinjila muvuami vwa nyasaye. ³² Shichila yohana yiitsa nali mundu wivikhole viuvulunji, nikhali mwambakhana khumusuvila, nikhali vakhalachi vuvushuru nende vandu vaheyi vamusuvula. Khali lwamwalola, shimwamanya mwikanila mwamusuvula tawe.

³³ Hulishitsi lukanu lundi. Khwalio numundu, yaali numulimi, naraka misabibu, niyeva lukaka, khandi yayeva vwina vukhuminilamu misabibu, khandi niyumbakha lisisi nilitsia mwikulu lia vandu vukhulinda misabibu, khandi navikhamu vandu vukhumenya narula natsia mushivala shindi. ³⁴ Lwa khuchesa khwali nikhutushi yaruma varumishi ve khutsia khulera matunta. ³⁵ Nikhali vandu valinda mulimi lwa valola vandu vaali nivarumilwe vakumila mulala niviira nawundi vamukhuba, na wundi vamulesa namacjina. ³⁶ Khandi mwene mulimi yaruma vandi vanyiishi khuvira vaali vhukhuranga, nikhali vandu valinda mulimi, vavakhola khuli vaali vukhuranga. ³⁷ Khandi mwene mulumi yamanya naruma mwanawe mutelwa, nakanakananga valamwicheyitsa nukhumuhulila.

³⁸ "Nikhali lwa vandu valinda misabibu valola mwama wumundu mwene mulimi kumisabibu, vavolelana venekhuvene, huyu neye yiitse arikale mumulimi yuku, chendi khumwire khuvukuli mulimi. ³⁹ Vamanya vamkumila nivamurulitsa ilwonyi wumulimi kumisabibu nivamwira. ⁴⁰ Khulwa yako lwa mundu mwene mulimi kumisabibu atsitsa kwiitsa, nishina shiatsitsa khukhola vandu yava?"

⁴¹ Vamuchiipa "atsitsa khuvarulitsa mumulimi kumisabibu nukhuvativitsa, khandi alakhava vandu vanyala khumua matunta inyanga yilichesa."

⁴² Nalwo lwa Yesu yamanya navavolea, shimwasomakhu mumaandiko khuli kavolanga lichina lia vandu vishileche vambakhana, nalio lichana likhongo liumukona, yili liarula khunyasaye, khandi liukhuchenyinya mutsimoni mwa vandu?

⁴³ Khulwa yako vavolelanga, vwuami vwa Nyasaye vutsitsa khurulitswao khumunyi khandi vutsitsa khuelwa shivala shindi shinyala khuama matunta. ⁴⁴ Khandi mundu wosi atsitsa khukwa khulichina yili alatong'okhana. Na oyo walitsitsakhukwila lilamutuvula." ⁴⁵ Vimilili va vavasalisi nende mafarisayo vahulila makhuva ka Yesu yaali navooli mutsinganu koosi, khandi vamanya avoolie khuvo. ⁴⁶ Varanga khukhava khuli vanyala khumukumila, nikhali varia shituma shiavandu vaali nivalio, shichila vandu vaali vamanya nimuprofeti.