¹ Muliyuva ndyo lyo tupu Jesus arupuka mundjugho aka shungire kuntere yalikurudiva. ² Mbunga ya vantu yayinene ayiya kukwendi ayimu kundurukida, makura ghuye aperama mu wato ashungiri, mbunga ya vantu ava yimana kuntere. ³ Makura Jesus ava tantere vininke vyavi yingi muvifanikito. Ghuye aghamba ashi, "Mukuni ghumwe kwa yendire aka kune mbuto. ⁴ Nda ahokwera kukuna, mbuto yimwe ayi were mundjira, makura vidira aviya avi yilipo yino mbuto. ⁵ Ntani mbuto yimwe ayi were pa nkarawe, yayo kapi ya wanine livhu lyaku mena ndandani. Kapi papita shirugho kare yina mene, ano ngoli livhu lyapo lisheshu unene. ⁶ Tupu lya puma liyuva lirupuke makura ayi rungwenene yikukute mukonda shi kwato ndandani. ⁷ Ntani mbuto yimwe ayi were mumiya. Miya adikuru unene makura yino mbuto ayi fu kumpato. ⁸ Ntani mbuto yimwe ayi were palivhu lya liwa lya ndombe yayo ayi yita ndanda lifere, yimwe ayi yita ndanda dimurongo ntano-na yimwe, ntani yino yimwe ayi yita ndanda dimurongo ntatu. ⁹ Kehe ghuno akaro na matwi ghaku yuvha, ayuvhe vino naku ghamba!"

¹⁰ Makura varongwa vendi avaya kukwendi va mupure Jesus ashi, "Mukonda munke nke waghamberanga mumbunga muvifanikito?"

¹¹ Jesus ava limburura naku vatantera ashi, "Mukonda shi anwe mwawana ghukonentu waku yuvha muyive naku kwata lighano kuhamena lihoramo lya Untungi waliwiru, ano ngoli vino kapi vavi tapa kukwavo kapi vavi vashororera. ¹² Mukonda shi kehe ghuno akaro na limona, ngava kamu wedererako, ntani kehe ghuno apiro kuweka limona, na kehe shino akara nasho ngava kashi mushakana. ¹³ Mukonda yino mbyo na ghamberanga mu vifanikito: Mukonda shi vavo vakara na mentjo, ano ngoli kapi va monanga; ntani vavo vakara na matwi, ano ngoli kapi va yuvhanga, ndi va kwate lighano. ¹⁴ Ku kwavo datamba dino nkango damu Porofete Isaya ntani dina tikilirimo odo aghamba ashi, 'Mwa kara na matwi ghaku yuvha, ano ngoli kapi ngamu yuvha mukwate lighano; mwa kara na mantjo ghaku mona, ano ngoli kapi ngamu vimona.

¹⁵ Mukonda shi dimutjima da vantu vaghuno muhoko dikukutu unene, ntani matwi ghavo ghaku mbandera, vavo vaferera kumantjo mposhi vapire kumonitako, ntani vambandera matwi ghavo vapire ku yuvitako, ntani vahonya dimutjima davo vapire kukwata lighano, mposhi vapire kutjindja naku wapeka ghukaro wavo vavyuke kukwande, makura ame Karunga nganu vhure kuva verura.'

¹⁶ Muntu walirago ndjeghu akaro na mantjo, ghuye avhure kukenga; ntani naghu akaro na matwi, avhure kuyuvha. ¹⁷ Vya ushili naku mutantera ashi, vaporofete na vantu vavahungami vavayingi kwa shanine ashi ndi navo vamone ovino muna kumona anwe, ano ngoli kapi vavhulire kuvimona. Ntani navo kwa shanine vayuvhe ovino muna kuyuvha anwe, ano ngoli kapi vavhulire kuvi yuvha.

¹⁸ Tererenu muyuvhe ovyo shina kutanta shifanikito sha mukuni. ¹⁹ Kehe ghuno muntu waku yuvha nkango da untungi waliwiru ano ngoli ghuye kapi ana kukwata lighano ovi dina kutanta, makura munyengi ghuye kuya aya mushakane dino nkango vana kunu mumutjima wendi. Yino ndjoyinya mbuto vakuna kuntere ya ndjira. ²⁰ Mbuto yino vakuna pa nkarawe kwa tanta shi muntu ghunya ayuviro dinya nkango, ghuye adi tambura mpopo na ruhafo, ²¹ ano ngoli mumwendi shimpe mwato ndandani, ntani ghuye shimpe kapi ana koro mulipuro. Ghuye tupu agwanekera na ma udito ntani na mahepeko mukonda ya nkango, makura ashuva lipuro. ²² Mbuto yinya vakunine mumiya, kunta shi muntu ghunya ayuviro dinya nkango, ano ngoli mukonda ya shinka na lidovo na limona lya liwa lyamu udjuni makura adipaya dino nkango mu mwendi, ghuye kapi avhulire kudi vhukita awane muyangu. ²³ Ntani yino mbuto va kunine palivhu lya liwa, kutanta shi muntu ghunya ayuviro dinya nkango makura adi kwata lighano. Ghuye ayendi aka yangure ndanda lifere, ghumwe ndanda dimurongo ntano-na yimwe, ntani ghumwe ndanda dimurongo ntatu kupita kana pado vakunine.

²⁴ Jesus makura ava tantere nka shifanikito shimwe. Ghuye aghamba ashi, "Untungi waliwiru kwafana yira muntu oghunya akunino mbuto yayiwa mulifuva lyendi. ²⁵ Opo ayendire aka rare, munyengi naye ayamo aya kunumo mushoni mulifuva lyendi lya vilya makura akayenda. ²⁶ Mbuto opo ya temukire yina mene yina kuru yina vhara mbuto ya vilya, mushoni nagho aghu monekemo ghuna kuru. ²⁷ Vakareli vantura-ghumbo makura avaya, vamu tantere ashi, 'Mukalikuto, nane kapi shi mbuto yayiwa wakunine mulifuva lyoye ndi? Ghuno mushoni ne kuni nko watunda?'

²⁸ Ghuye ava limburura ashi, 'Munyengi ndje ana ruwano vino.' Vakareli vendi ava mupura ashi, "Ghuna shana atwe tuyende mo tuka vidjupaure mo ndi?'

²⁹ Mwenya lifuva ava tantere ashi, 'Hawe nakadidishi. Mukonda shi nkene kumu duramo mushoni ghudjupuke mo, kumu djupura kumwe na ndandani da vilya. ³⁰ Shuvenu navintje vikure kumwe dogoro shiruwo shaku yangura. Opo ngashi tika shirugho shaku yangura ntani nganu tantera vayanguli ashi, "Hovenu tanko kughupamo mushoni mughupongeke, makura mughu mange kumwe muvi tungu makura mu ushore, ntani mupongeke vilya muvi ture mushishete.'"

³¹ Makura Jesus ava tantere nka shifanikito shimwe. Ghuye aghamba ashi, "Untungi waliwiru kwa fana yira mbuto, ntanga ya rukokotwa oyi akunine muntu mulifuva lyendi. ³² Yino ntanga yididi unene parudi rwa ntanga nadintje. Ano ngoli yayo kukura naku repa nakunenepa shikare shitondo shaku yungira shaku pitakana mbuto nadintje damu lifuva. Makura vidira kuya viya tunge vitunguru kudi mutavi da shitondo."

³³ Jesus ava tantere nka shifanikito shimwe ashi: "Untungi waliwiru kwafana yira hingo oyi vatulire vakamali mumahemere matatu gha utura waku duva, dogoro ghu shashite naku fulita viduva."

³⁴ Vino navintje Jesus kwa tantilire vantu muvifaniko. Ghuye kwato mbudi oyo aghambire ahana kughamba muvifanikito. ³⁵ Vino kwa shorokire weno mposhi nkango odo vaghamba vaporofete ditikiliremo, vava kaghamba ashi, "Ame nganu ghamba nkango daku tunda mu kanwa kande muvifanikito. Ame nganu ghamba muvifanikito mposhi nganu ronge nkango odo dahoramo kutunda kulishito lya udjuni."

³⁶ Jesus opo amanine kughamba na mbunga, makura ayendi aka ngena mumundi. Varongwa vendi ava yendi kukwendi ava kaghamba ashi, "Tutantere ashi vinke shina kutanta shifanikito sha mushoni wamu lifuva."

³⁷ Jesus alimburura naku vatantere ashi, "Mukuni wa mbuto yayiwa ne Mona Muntu. ³⁸ Lifuva kuna kutanta ashi ghuno udjuni; mbuto yayiwa vantu ovo vahameno mu untungi waliwiru. Ntani mushoni vantu ovo vahameno kwa Satana, ³⁹ ogho akunino mulifuva mushoni mudjonauli Satana. Muyangu kutanta ashi ghuhura wa udjuni, ntani vayanguli kutanta ashi va Engeli. ⁴⁰ Momu tupu vapongekanga mushoni ghukare ndambo makura vaghu shore na mundiro, mo ngoli ngavi kara kughuhura wa udjuni. ⁴¹ Mona muntu nga tuma va Engeli vendi, ngava pongeke vapukiti nava ndjoni ku veta ya Karunga vamu udjuni wendi. ⁴² Makura ngava vavhukumine mulidiko lyamu ndiro waku twera unene, omo ngava kalira naku kukwetja mayegho. ⁴³ Makura vantu vavahungami vavo ngava katema na kuvembera yira shite sha liyuva mu Untungi wa Shavo. Kehe ghuno akaro na matwi, ayuvhe.

⁴⁴ Untungi waliwiru kwa fana yira ghungawo ogho wahoramo wa vhumbamo mulifuva. Muntu nkene ana ghuwana ghuye ana hepa kughu horeka ghukare momo. Ghuye kukara naruhafo unene makura kuyenda aka ghulite limona lyendi nalintje, makura aka ghure lino lifuva.

⁴⁵ Ntani nka, untungi waliwiru kwafana yira muntu waku shana kughura tuwe twa ndiro twa diyamande. ⁴⁶ Nkene ana wana tuno tuwe twa diyamande ya ndiro, ghuye kuyenda aka ghulite limona lyendi nalintje, makura aya ghure tuno tuwe twa diyamande ya ndiro.

⁴⁷ "Shimpe nka, untungi waliwiru kwa fana yira likwe vateya mulidiva, makura likwate marudi ghantjwi nadintje. ⁴⁸ Nkene lina yura ntjwi, makura mwenya likwe kulikoka liyaghuke paliyenga. Makura ghuye ku shungira vatoghororemo ntjwi dadiwa vaditure mutjako yimwe tupu, ano ngoli ntjwi dadidona kudi pongeka vaka divhukume. ⁴⁹ Mo ngoli ngaku kakara kughuhura wa udjuni. Va Engeli ngavaya ngava yahangure varunde na vahungami. ⁵⁰ Varunde ngava vavhukumina mulidiko lyamu mundiro waku twera unene, omo ngava kalira naku kukwetja mayegho.

⁵¹ Ghuye apura varongwa vendi ashi, "Muna viyuvhu naku kwata lighano navintje vino ndi?" Varongwa vendi ava limburura ashi, "Yii."

⁵² Makura Jesus ava tantere ashi, "Mpo ngoli ashi kehe ghuno murongi wa matjangwa ana hepa nka kukuronga untungi waliwiru ngakare yira nturaumbo wa mundi, ngayive kuhangura limona lyendi lyali kuru-kuru litunde kulimona lyalipe."

⁵³ Opo amanine Jesus kughamba vino vifanikito, makura atundupo aka yenda. ⁵⁴ Makura Jesus ayendi kushirongo shavo, aka ronga vantu muSinagoge davo. Vavo ava tetuka ku marongo ghendi makura ava ghamba ashi, "Kuni awana ghuno ukonentu wakuruwana vino viruwana vya nkondo kumwe na vitetu? ⁵⁵ Ghuno murume nane kapishi mona mushongi vipirangi ndi? Vawina nane kapishi Maria ndi? Vaghuni vendi nane kapishi va Jakopu, na Josef, na Simon, ntani na Judas ndi? ⁵⁶ Vakuru vendi vavakamali nane kapishi kumwe twa tunga navo ndi? Kuni nko awana dino nkondo daku ronga naku ruwana navintje vino?"

⁵⁷ Vavo kwa garapire unene mukonda yendi. Makura Jesus ava tantere ashi, "Kukaru vya tunda ashi muporofete kwamu fumadeka kehe kuno nkwandi mushirongo shavo namu mundi wavo." ⁵⁸ Mukonda yaku pira kupura kwavo ghuye kapi avhulire kuruwana mo viruwana na vitetu vyavinene.