¹ Pa shirugho ntjosho tupu, mukumo wa mbudi ya Jesus ayi katika kwa Hompa Herodes. ² Ghuye apura vakareli vendi ashi, "Ghuno muntu naku yuvha ne ndje Johanes mukushi ndi; kaka vhumbuka kughufe ndi. Mbyo shimpe ana kara na nkondo da kuruwana vino vitetu ndi."

³ Herod kwa tumina vakavita vaka kwate Johanes, vamu mange, vamu ture mudorongo mukonda shi ghuye kwa tantelire Herodes ashi ghuye kwa kwara Herodesiya mukamali wana kufa mu kurwendi Felepusi. ⁴ Mukonda shi Johanesi kwa tantilire Herodes ashi, "Ovi waruwana vyaku kwara mukamali wana kufa mukuroye kapi vya pulitira ntani kapi vya kara paveta." ⁵ Mpopo tupu Herodes ashana kumudipaya, ano ngoli aghuye kwa tjilire vantu mukonda shi ghuye kwa kalire muporofete.

⁶ Opo shatikire shilika shaku dana livhuruko lishampuruko lya Herodis, makura ayita mona Herodesiya wa mukadona aya dane pa shilika shendi, Herodis akara naruhafo unene mumutjima. ⁷ Herodis aghamba ashi, ghuye kuvhura atape kehe shino ashungida kukwendi ghuno mukadona. ⁸ Ghuno mukadona ayendi aka pure vawina ashi vinke avhura kushingida kwa Hompa, vawina ava mutantere ashi, "Kuna shana, vadipaye Johannes Muyoyi, vatete mutwe wendi, vaghu ture pano pashisha." ⁹ Hompa opo ayuvire vino ashungidire mukadona aguvu unene, ano ngoli mukonda ya mughano ogho vapiranga kutjintja ntani na mbunga oyo ya pongiro vayuvhe mughano, akona ntani kuvi ruwana atikitemo mughano. ¹⁰ Ghuye atumu vakavita vayende mudorongo vakatete mutwe wa Johanes. ¹¹ Makura ava ka tura mutwe wendi pashisha ava tapa kwa mukadona aka tape ku vawina. ¹² Makura varongwa vendi ava damuna, rutu rwendi, vaka vhumbike. Opo vamanine kuruwana vino, ava yendi vaka tantere Jesus navintje ovyo vya shorokiro. ¹³ Jesus opo ayuvire yino mbudi, mpopo tupu atantere varongwa vendi varonde muwato vayende kulivhango lya peke vaka kare pentjavo. Mbunga opo vayuvire yino mbudi, ava tundu muvitata vyaku kushuva-shuva vava kwame oko vayendire. ¹⁴ Makura Jesus opo ayimanine kuntere amono mbunga yayinene yina pongo. Makura ava fere nkenda unene ghuye averura vaveli vavo navantje.

¹⁵ Opo lya tengukire likatoke liyuva, varongwa vendi avaya kwa Jesus ava ghamba ashi, "Lino livhango tuna kara lya mburundu, ntani liyuva lina toko kare. Tantera yino mbunga ya vantu, vayende kudi mukunda dapepi vaka shane ndya davo."

¹⁶ Ano ngoli Jesus ava tantere ashi, "Kapishi hepero vayenda kwa peke. Anwe muvapo ndya valye."

¹⁷ Vavo ava mutantere ashi, "Atwe kuna kara tupu na mboroto ntano ntani na ntjwi mbiri."

¹⁸ Jesus ava tantere ashi, "Viyitenu kuno kukwande." ¹⁹ Makura Jesus atantere mbunga ya vantu vashungire pamushoni. Ghuye aghupu dino mboroto ntano na ntjwi mbiri. Ghuye akankuka kuwiru atapa mpandu kwa Vashe, adi kandayiki, ntani abomona dino mboroto makura atapa kuvarongwa vendi, vavo ava tapere mbunga ya vantu navantje. ²⁰ Vantu navantje avali dogoro ava kuta. Vavo ava pongeke ruhupwa rwa ndya pamwe tupu - makura ava yuda vikumba murongo-navi-viri vyaku yura. ²¹ Vantu ovo valiro dino ndya kwa tikire ku mayovi matano ghava kafumu tupu, kughupako shivaro sha vakamali na vanuke.

²² Mpopo tupu Jesus atantere varongwa vendi varonde mu wato vapite kumeho varute musheli munya, ghuye akara kunyima atape mureki kuvantu. ²³ Opo amanine kutapa mureki ku mbunga, ayendi aka ronda kundundu aka kakare pentjendi aka raperere. Opo lya tokire liyuva, ghuye shimpe akara nkoko pentjendi. ²⁴ Opo vaka tikire pakatji kali-kurudiva ghure na liyenga, mankumpi ghamanene agha yambuka, ntani mpepo yayinene kwa yunga yiku vyuke na wato. ²⁵ Jesus adumpuka kundundu matiku ngogho ava kondawire, ghuye kuna kuyenda pa mema mulifuta. ²⁶ Varongwa vendi opo vamu monine kuna kuyenda pa mema, ava tukuka makura ava takuma ashi, "Shughurumba shino," ava kara na ghoma unene. ²⁷ Mpopo tupu Jesus ava tantere kumwe naku ghamba ashi, "Karenu na nkondo! Ame! Kapishi mutjire."

²⁸ Makura Peturus alimburura naku ghamba ashi, "Hompa, nkene shi ushili ove, ndenke name nuye kukoye nuyende pamema."

²⁹ Jesus amutantere ashi, "Ya kukwande." Makura Peturus adumpukamo mu wato ayendi pamema kwa Jesus. ³⁰ Peturus opo amonine mpepo kuna kuyunga unene, makura akara na woma. Makura atameke kudama mumema, ghuye atakuma naku lira ashi, "Hompa, mpopere!"

³¹ Mpopo tupu Jesus atapa lihoko lyendi, akwata Peturus, makura amu tantere ashi, "Ove wakara na lipuro lya lididi, vinke ghukarera nama shinganyeko?" ³² Tupu arondire Jesus kumwe na Peturus mu wato, mpopo tupu mpepo ayi kutura.

³³ Varongwa vendi ovo vakaliro mu wato makura ava tongamena pa ngoro varaperere kwa Jesus kumwe naku ghamba ashi, "Ushili ove Mona Karunga."

³⁴ Vavo ava rutu, ava kasheyeka pa liyenga lya Genesareti. ³⁵ Vantu vamu mushirongo opo va dimburulire ashi Jesus ana yatiki, makura ava tumu mbudi kuvantu navantje vamu mukunda, vaka yite vaveli navantje.

³⁶ Vavo ava shungida Jesus ashi ava pulitire vakwate kuvi dwata vyendi, makura kehe ghuno agumino kuvi dwata vyendi averuka murutu naruntje.