¹ Liyuva lya Sabata Jesus kwapitire avindakane mumafuva gha mbuto. Varongwa vendi kwayuvire ndjara unene, makura ava tameke kutjora ntafu va lye. ² Opo vavamonine Vafalisayi, makura ava tantere Jesus ashi, "Kenga, Varongwa voye ovino vana kuruwana kapi vya pulititra kuviruwana muliyuva lya Sabata."

³ Jesus ava limburura ashi, "Kapi mwa varura matjangwa ovi aruwanine David na vantu vendi, opo vayuvire ndjara? ⁴ Ghuye kwa yendire mu Ntembeli ya Karunga, aka lya mboroto ya kupongoka ya ndjambo, oyi vapira kupulitira kulya ghuye na kehe ghuno, nkwandi vaPristeli tupu. ⁵ Ntani kapi mwavarura omo vatjanga veta ya Sabata ashi, vaPristeli nkene kuna kuruwana mu Ntembeli liyuva lya Sabata makura vatjore veta vavo kwato undjoni? ⁶ Ano ngoli ame kuna kumu tantera ashi ogho apitakano Ntembeli mpwali mukatji kenu. ⁷ Ashi ndi anwe kwayiva ovi dina kutanta dino nkango da Karunga daghambo ashi, 'Ame kwa hora ghufe nkenda, kapishi ndjambo,' anwe ndi kapi mwa panguranga vantu vakupira undjoni. ⁸ Mukonda shi Mona Muntu ndje Hompa wa liyuva lya Sabata."

⁹ Makura Jesus atundapo akangena muSinagoge yavo. ¹⁰ Mwamo kwakaliremo mukafumu wa kufa lihoko. Vafalisayi makura ava pura Jesus ashi, "Vya pulitira kuverura muntu muliyuva lya Sabata ndi?" Vavo kwa shanine varundire Jesus ashi kuna ruwana undjoni.

¹¹ Jesus ava limburura ashi, "Opo muna kara mukatji kenu, nkene ndjwi yoye yimwe tupu, yina were mulitope muliyuva lya Sabata, kapi ngaghu vhura kuyikoka yitundemo ndi? ¹² Ame shi, monyo wa muntu, kwa kara na mulyo unene kupita kana wa ndjwi? Mpo ngoli shi vya pulitira kuverura muntu naku ruwana uhunga kehe lino liyuva nampili lya Sabata." ¹³ Makura Jesus atantere ghuno murume ashi, "Honyonona lighoko lyoye." Ghuye ahonyonona, lighoko lyendi aliveruka mpopo likare yira ghunyalyo. ¹⁴ Makura Vafalisayi ava rupukamo naghu gara vaka kuyonge kuhamena kukwendi. Vavo ava shana ndjira ashi weni omu vamuruwana Jesus mposhi vamudipaye.

¹⁵ Jesus opo anongononine vino, makura ghuye atundupo. Vantu vavayingi navo ava mukwama, kumwe navaveli makura ghuye ava verura navantje. ¹⁶ Makura ghuye ava pampilikida ashi ndi kapishi vamu yiyaghuke, ¹⁷ mpongolishi dino nkango, damu porofete Jesaya ditikiliremo, odo aghambire ashi, ²² Mpop tupu makura ava yita muntu wa shitwiku wa shipuru-puru, ghuye kwakalire na mpepo ya yidona, ava muyita kwa Jesus. Ghuye amu verura, mpopo tupu atameke kumona naku ghamba. ²³ Vantu navantje ava tetuka, ava ghamba ashi, "Oghuno mukafumu kuvhura vikare ashi ghuye ndje Mona David?"

²⁴ Vafalisayi opo vayuvire yino mbudi yavi tetu, vavo ava ghamba ashi, "Ghuno murume kapi atjida ngamo mpepo dadidona nankondo dapeke, nane ngoli na nkondo da Belisebubu, mukondi wampepo dadidona."

²⁵ Jesus ayivire ovi vyakaliro mumaghayaro ghavo makura ava tantere ashi, "Kehe shino shirongo shaku kutavakana ngashi hanaukapo, shikare shitata ntani mundi waku kutavakana kapi ngaghu tika mo mughuta wakora. ²⁶ Nkene shi Satan kutjida mo Satan, kutanta shi ghuye kwa kara nama kutavakano mwa mwene. Weni ngoli omo ngaghu vhura kukarapo untungi wendi ghuyimane? ²⁷ Nkene shi ame kutjidamo mpepo dadidona na nkondo da Belisebubu, ovano vana venu vavone nkondo dare varuwanitanga vadi tjide mo? Mukonda ndjoyino vavo mbo ngava kamu panguro. ²⁸ Ano ngoli nkene shi ame kutjida mpepo dadidona na Mpepo ya Karunga, yivenu ashi untungi waKarunga ghunaya papenu.

²⁹ Weni omo ngaghu vhura kutjora ghungene mundjugho ya lipenda ghuka vake limona lyendi ove wahana kufunda ghumange lino lipenda? Nkwandi ghuna hepa kufunda lipenda ntani ngaghu ngena mundjugho yendi ghuka vake limona yendi.

³⁰ Kehe ghuno apiro kuhamena ku ruha rwande, ogho kwa kulimba name, ntani kehe ghuno wakupira kupongeka name, ghuye kuhanaura.

³¹ Mbyo naku mutantera ashi, kehe yino ndjo na lishwaghu lyaku tunda ku vantu kuvhura kuyi dongononapo, ano ngoli kehe ghuno waku shwaura Mpepo ya Kupongoka kwato kuyidongononapo. ³² Kehe ghuno waku ghamba nkango dadidona kwa Mona Muntu, kuvhura kumu ghupirapo. Ano ngoli kehe ghuno waku shwaura Mpepo ya Kupongoka, kwato kumu ghupirapo, muno mu udjuni, ndi mu udjuni waku meho.

³³ Nkene shi shitondo shashiwa na nyango daku yimako nado kuwapa, ano ngoli shitondo shashidona na nyango dakuyimako nado didona, ntani kehe shino shitondo kushi dimburura mukonda ya nyamngo navi yimwa vyako. ³⁴ Anwe vana vavambaroka, anwe muva dona, weni ngoli omo muvhura kughamba vyaviwa ndi vya uhunga? Mukonda shi mbyovo vyayuro mumutjima mbyo vya rupukango muka nwa. ³⁵ Muntu wamuwa kushorora ghuwa wamunda ya mutjima wendi, ntani muntu wa mudona kushorora udona wamunda yamu yamutjima wendi. ³⁶ Ame kuna kumu tantera ashi, muliyuva lya mpanguro kehe yino nkango waghamba yaku pira mulyo, ngayi karupuka ngayi katape ghumbangi kukoye. ³⁷ Mukonda shi liyuva lya mpanguro ngaghu kaparukira munkango doye odo wa ghambanga daghu uhunga, ndi ngaghu kayenda mulidjonauko mukonda ya kunkango doye odo waghambanga dadidona."

³⁸ Makura varongi matjangwa na vafalisayi ava limburura Jesus ashi, "Murongi, atwe kuna shana ghuruwane vitetu tuyive ashi ushili ove kwa kutuma."

³⁹ Jesus ava tantere naku ghamba ashi, "Anwe vantu vavarunde, ruvharo rwa rushonda mbo vaku shana viyivito. Ano ngoli kwato shiyivito osho nuvhura kutapa kukwenu nkwandi shiyivito shamu Porofete Jona. ⁴⁰ Jona kwa kalire mayuva matatu ntani na matiku matatu munda mulipumba lya ntjwi, Mona Muntu naye nga kara mayuva matatu ntani matiku matatu munda kuntji ya livhu. ⁴¹ Muliyuva lya mpanguro vantu vamu Ninive ngava kayimana kumwe na vantu vano vana kuparuko weno paruvede runo ngava katape undjoni kukwavo. Mukondashi vavo vaku shighulire vashayeke kuruwana udona opo ayuvitire Jona mbudi kukwavo, kengenu, wamunene waku pitakana Jona mpwali mukatji kenu. ⁴² Hompa wamukadi waku virongo vyaku ruha rwaghu rundu ngaka shapuka muliyuva lya mpanguro ya vantu va muhoko wenu ngaka tape undjoni ku kwavo. Mukondashi ghuno Hompa wa mukadi katundanga kughure kughu hura wa udjuni aye kwa Solomoni, aya terere naku yuvha naku kuronga ukonentu, kengenu, wamunene waku pitakana Solomoni mpwali mukatji kenu.

⁴³ Nkene shi mpepo yayidona yina rupuka yitunde mu muntu, yayo kuyenda yirenda-renda yika shane mavhango gha uturo mumburundu, makura nkene kapi yina ka wana ghuturo kuka vyuka. ⁴⁴ Paka vyuka yayo ku ghamba ashi, 'Ame kuna kuvyuka kundjugho yande oko natunda.' Paka vyuka yayo kuya wana ndjugho vayi kwera yina wapa yina kene yayo yina kara muporongwa. ⁴⁵ Paka vyuka yayo kuka shimbako mpepo dimwe ntano-na-mbiri dadidona unene kupita kana payene, makura kuya ngena diyatunge mo. Makura ghukaro wa udona wa vantu kupita kana wa kuhova. Nanwe mo ngoli mwa fana mwa yuvha ntani mwa mona navintje ovyo na ruwana ngoli kapi mwa pura anwe muhoko wa urunde.

⁴⁶ Jesus ghuye shimpe munda kuna kuronga mbunga ya vantu, vaharukako, vawina na vaghuni vendi vana yimana pandje, kuna shana vaghamba naye. ⁴⁷ Makura muntu ghumwe amu tantere ashi, "Kenga, vanyoko na vaghuni voye vana yimana pandje, kuna shana vaghambe nove."

⁴⁸ Makura Jesus alimburura atantere ghuno muntu ashi, "Vanimbo vanane ntani vanimbo vaghuni vande?" ⁴⁹ Makura Jesus aneye lighoko lyendi ku varongwa vendi aghamba ashi, "Kenga, Vano mbo vanane ntani navaghuni vande! ⁵⁰ Mukonda shi kehe ghuno waku tikitamo mpangera ya Vavava vamu liwiru, ndje mughunyande, mpandjande, ntani mbo Vanane."