¹ Habsao ha marsi marsa yerphalangba ni yahon ha, bonsi ni ha bisikhthubo hajaikha, ² ode Madaini basathu, subung ni bisikhthu khe nuhi majangjaokha. Bonsi jarni nobrajikh saikhulailakha. ³ Madai thiba, "Ani besede marsirao ni basao ha dongnang niyakha, bede tikhade bonsi bahain hase dongba. Bonsi maithai jang rjasi maithaikhon seniing dongsima. ⁴ Bo bubli buthu ha habsao ha Nephilim dongba boni yahon habo dongba. Ebo buthu Madai ni basathu marsi ni bisikhthu khe noh jaba bubli buthu ha jaba, ode bonsi niha ansaraobo hajaiba. Ebo subung buthu hamseniing bol hamkhlibi, miyahsa bumu gnangrao. ⁵ Habsao ni subung buthu hamseniing phap khusi dangba khe Madai nuba, khrip bubli habo bonsi ni khaha hamya baothai sening baigoba. ⁶ Habsao ha Madai, marsi marsa khe sangsaihi gjai jajaokha ode khaha dukhu nangkha. ⁷ Odejang, Madai thiba, "Hahma jang ang sangsaiyaba marsi marsa khe ang ebo habsao niprang sdamkhlama- Marsi marsa jang mih buthu, sorbaiyaba, nokhasao ni dao buthu khe sdamtharma bede tikhade ang sangsaihi gjai jajokha.' ⁸ Tikhabo Madai ni muh nojor ha Noah khe gibi subung maiba. ⁹ Ebo niing Noah ni dongthai jithai. Noah subung gibiyaba saosi ode bo bubli ha subungrao ni bising ha gjai giriyayaba. Noah, Madai jang dongsmailaire. ¹⁰ Noah, basathu gtham ni bupha jaba: Shem, Ham ode Japheth. ¹¹ Madai ni sgang ha, habsao hamsening gjai jakha, odehe namu khormu jang gablaikha. ¹² Madai, habsao khe nuba; hamya jang gablaikha, khrip saomang hamya lamah jang habsao gablaikha. ¹³ Madai, Noah khe thiba, "Bahain jang dongyaba khe sdamma nangma bede tikhade habsao ha hamya jathai jang gablaitharkha thihi Ang muhthai jang nulakha. Odehe, Habsao ha dongyabasi khe ang sdamtharma. ¹⁴ Cypress bondo jang ning jarne rung salamla. Rung ha nohsa salam, ode bising jang bajihabo atha jang lebphungthar. ¹⁵ Ning elai rung salamma nangma: Rung laoba rjatham cubit jama nangma; warba cubitdan jama nangma ode juba cubit thimji jama nangma. ¹⁶ Rung ha nohkhim lab, odehe bijing niprang cubit masi jang sjam. Rung ha derga deng, bakhla ha thakhsi, thakhginba, thakhthamba salam. ¹⁷ Khnala, habsao ha hang gnang dongyabasi khe ang sdamtharma, ang habsao ha diyungma derima. Phirthima ha dongyabasi khrip jadi thiitharma. ¹⁸ Tikhabo ang ning jang smai dangma. Ning rung bising ha habma, ning jang nini basathu, nini nobrajikh, nini basathu ni nobrajikhthu ning jang rung ha habphama. ¹⁹ Khrip hang gnang khe, jorsi jorsi khlaihi, ning jang baosi mthanghi dengmane jla jikh khe, ning rung ha labutharma nangma, ²⁰ Khrip dao ni jadi buthu, mih ni jadi buthu, hahmang ha sorbaiyaba hembaiyaba buthu, bonsi khe mthanghi dengmane jorsi jorsi khlaihi labuthar. ²¹ Nisi jimane khlaihi ode bonsi jimane khlaihibo jimu gaimu bojom khlaithar." ²² Olainiing Noah khusi dangba. Madai sanibalai khrip jadi khe, bo dangtharba.