¹ Odehe Jacob, boni basathu khe longhi thiba, "Khripbo nisi gathaisi ha bojom ja, ode phaiginyaba basain ha bede jama ang sainthinang. ² Nisi gthimlai ode khna, Jacob ni basathu. Nisi ni bupha, Israel ni grao khe khna. ³ Reuben, ningde ani hajaijenyabase, odehe ang bol maijenyabase, mahn sonman maiba, hamseniing bol maikha. ⁴ Dislong suyaba dilai, musi esap giriyayaba, bede tikhade ning nini bupha ni thuyahm ha thangba, Odehe bo khe gusu khlaiba, ning ani nohkho ha thangba. ⁵ Simeon jang Levide khaphlungthusise. Sengniing bonsi nihamya khusi ni yaodi. ⁶ O ani besai, bonsi ni rogong ha daphai; O ani muima, bonsi jang dakhamphalai. Bede tikhade bonsi thampsi baigoba ha subung sthaidu. Haglai biglai melma ni yateph dophaidu. ⁷ Bonsi ni thampsi sahrithai maithing bede tikhade khinthgaosisi ode bonsi raoba, hamseniing khinthaothao. Ang bonsi khe Jacob niha ronphaitharma ode Israel ha dradri mkhlaitharma. ⁸ Judah, nini khaphlungthu, ning khe bkhan khlaima. Nisi ni dusmonrao ni gorna ha nisi ni yao glaima. Nisi ni buphathuni ansarao nini ha gonglaima. ⁹ Judahde mihsi raigonma basase. Ani basa, ning dukhu maihise, ning gakhulangba. Bo akhaibuba, mihsi raigonmalai thuba, mihsilai. Serese bo khe musaraomakho? ¹⁰ shiloh phaipinyasi Judah niprang musi khalibo goda degaolangnang niya, yawaiyarao ni yega niprangbo goda degaolangnang niya. Rajirao, bo khe manima ¹¹ Bondeph, daobra ha boni mihleng khe khahi dengba ode boni mihleng basa khe bonsa ha khaba, bo, boni rijem khe ju jang suba, ode boni goda khe angur bidi jang suba. ¹² Boni muhthai ju lai simbrobro ode boni bahathi phuba gakherlai. ¹³ Dimlang dergong ha Zebulun dongma. Bode rung buthu ni mthaothan jama ode boni hahride Sidon sosi jama. ¹⁴ Issacharde raoyaba mihl; engse, dimlang jang dimlang hatho ha thure. ¹⁵ Bode lengothaosisiyaba hahthan khe smaire. Boni phagrong, bubain jang gonglaima odehe dangthaijaoyarao ni leng jama. ¹⁶ Dan, boni subungrao, Israel ni jadi buthu khe jadisi ni esap jang bisar khlaima. gorai gari gayaba subung phaipinlamane ¹⁷ Dan de lama bising ni jubu jama, lamayung ni bis raoyaba gorai ni yakhlong ha waidu. ¹⁸ Ang nini golam khe jonba, Madai. ¹⁹ Gad - Gorai gayarao ning khe gajephma tikhabo bo, bonsi khe bonsi ni yakhlong ha baiphama. ²⁰ Asher niha jimu gainmu bangma odehe bo thaosisi baorima. ²¹ Naphtalide, daodingbaiyaba mihsai, bo hamba hamba grao khnaridu. ²² Joseph de bthai thaiyaba bongphangmadibu dergong ha bthai thgaiyaba buphangma, boni yaderde bari khorong habo maikhuthardu. ²³ Baithuli diyarao bo khe gajephphaima ode bla jang sui naihi gaoma. ²⁴ Tikhabo boni baithulide salaihi dongma ode boni yaode mlaithane pherdaoma bede tikhade Jacob ni yaodopse, bede tikhade raokhiyah ni bumuse, Israel ni longthaima. ²⁵ Nini bupha ni Madai ning khe jurunang ode nokhasao niprang Gabara Madai hamthai rinang, hoo bising ni hamthai, gakher jang sahthip ni hamthai. ²⁶ Gda ni hajikhro ni hamthaithane, naithaosisi gdani hajikhro ni hamthaithanebo nini bupha ni hamthaide baining dedao. Bo buthu Joseph ni khrosao ha glaithing ode boni khaphlungthu ni rajarao ni khrosao habo glaithing. ²⁷ Benjaminde hukhri dongyaba mosrongse. Phorongma niing bode mih remjithardu, ode sahriphang jakhaniing mlaini khe sejithrdu." ²⁸ Ebo buthu jakha Israel ni jadijigin. Bonsi ni bupha, bonsi ne hamthai ribaha, bonsi khe thiba. Saosi saosine jagothai khrinebo, bo hamthai riba. ²⁹ Odehe bo saniba, bonsi khe thiba, "Ang ani subungrao niha thangma jakha, Hittitsa Ephraim ni hahyam ha longkhor dongyaba ha ani bai jang baosi ang khebo phippha, ³⁰ Machpelah ni longkhor ha, Canaan rajini Mamreh gbaha, Hittitsa Ephron niprang Abraham mahngkhlung braiyaba ha. ³¹ Oraha bonsi, Abraham jang Sarah khe phiphba; oraha bonsi, Issac jang boni nobrajikh Rebeca; odehe oraha Leah khebo phiphba. ³² Bo jakha Hethsarao niprang braiyaba hahthan ode longkhor. ³³ Jacob, boni basathu khe elai saniba ni yahon ha, bo, boni thuyahm ha yega mosorba, hang lathaoba, ode boni subungrao niha thangba.