¹ Odehe Joseph hamseniing dukhu nanghi boni bupha niha bliphphaba ode bo, boni basao ha graba ode, bo khe khudimba. ² Odehe Joseph boni sao naiyah dangyahsarao khe bupha ni mahngathi khe hamsisi dengmane saniba, odehe sao naiyahrao Israel ni mahngathi khe naiba. ³ Bonsi basain jang bisagin dengba, mahngathi khe dengphubalalai dengba. Egyptsarao, boni khlaihi basain jang bisatham sainji graba. ⁴ Grama ni basain jamba ni yahon ha, Joseph, Pharaoh ni nokhor khe thiba, "Ani basao ha nini khasaoma dongkha tikhade khasaohi Pharaoh jang sainlaimamu, thiba, ⁵ 'Ani abai ang jang smai danghi thiba, "Nai, angde thiima jakha. Canaan raji ha ang jarne mahngkhlung khuhi dengyaba ha ang khe phiphtha. Oraha ning ang khe phiph." Ang khe khasaohi abai khe phiphmane haiha ode ang phaipinanang." ⁶ Pharaoh thiba, "Thang, nini bupha, ning jang smai dangbalai, nini bupha khe phiphtha." ⁷ Joseph, boni bupha khe phiphmane thangba. Pharaoh ni khrip dangyahsaraobo, khraorao, Egypt ni khrip gedebarao, ⁸ Joseph ni nokhor buthu, ode boni khaphlungthu, buphanmi nokhor buthu, bo jang baosi thangphaba. Tikhabo, boni ansarao, dao mih, buthu Goshen haphai ha thaolangba. ⁹ Gorai gari, ode Gorai gayahrao, bo jang thangphaba. Jon badamma, bo jang thangphaba. ¹⁰ Jordan dibu bnar ha bonsi Atad ni maibar siphthan ha sophaibaha bonsi kha dukhu nanghi hamseniing gralaiba. Joseph, oraha basain jang sainsni buphani khlaihi graba. ¹¹ Atad ni maijubu jaothan ha oraha dongyahrao Canaansarao nuhi, bonsi thiba, "Egyptsarao ni khlaihi ebo basainde dukhu ni basainse." Odebani darajangse, bo hahthan khe Abel Mizraim thiba, bo jakha Jordan bnar ha. ¹² Bupha sanilangbalainiing, basathu khusi dangba. ¹³ Boni basathu, bo khe Canaan raji ha langba ode Machpela ni hahyam Mamreh gbaha bo khe phiphba. Mahngkhlungyahm ni khlaihi Abraham, longkhor jang hahyam braiba. Hittitsa Ephron niprang bo braiba. ¹⁴ Bupha khe oraha phiphbani yahon ha Joseph, boni khaphlungthu ode bupha khe phiphmane, bo jang thangphayaraosi khripbo Egypt ha phaipinba. ¹⁵ Joseph ni khaphlungthu, bonsi ni bupha thiiba ni yahon ha, bonsi thilaiba, "Jing, Joseph ni basao ha hamya khusi dangbalai, bo jini basao ha duhabo thampsi baigohi jing khe hamya khlaipinnang niya?" ¹⁶ Odejang bonsi Joseph ni sgang ha thiba, "Nini bupha thiiyasani ha elai sanilangba, ¹⁷ "Ebo grao khe Joseph ne thi, "Nini basao ha bonsi hamya khusi dangyaba khe khasaohi nini khaphthu khe maph khlai." Nini bupha ni Madai ni dangyahsarao khe maph khlai.' Joseph graba ode bonsi jang sainlaiba. ¹⁸ Boni khaphlungthubo thanghi boniha gonglaiba. Bonsi thiba, "Nai, jingde nini dangyahsaraose." ¹⁹ Tikhabo Joseph, bonsi khe thipinba, "Nisi dakhin. Angla Madai niyada? ²⁰ Nisila ang khe hamya khlaima baoba tikhabo Madaide hambase khlaiba, subungrao buthu khe sgomane khlaihi, nisiniing nulakha. ²¹ Odebnani khlaihi duha nisi khinma nangya. Ang nisi khe khrangnang ode nisini ansarao nebo nangbasi ritharnang." Elaiba graothai jang bo, bonsine khadema riba ode bonsi jang maigrugru sainlaiba. ²² Khaphlungthu ni nokhor jang, Joseph Egypt ha dongba. Bo maithai jang rjasi maithaiji habsaha thahnghi dongba. ²³ Ephraim ni jugthamba sosi ni ansarao khe Joseph nulangba. Manaseh ni basa Mikir, Joseph ni yasugu ha gonglaiyaba ansarao kheo, bo nulangkha. ²⁴ Joseph, boni khaphlungthu khe thiba, "Angde thiima jakha; tikhabo Madai nisi niha asalai tikhabo phainang, ebo raji niprang nisi khe baigorihi, Abraham Issac ode Jacob jang smai danghi hahthan rima thiyaba ha nisi khe, bo langnang." ²⁵ Boni yahon ha Israel nibasathu khe Joseph smai dangriba. Bo thiba, "Madai asalai tikhabo nisi niha phainang. Olaiba sainkhali ha nisi ani greng khe era niprang langphama nangma." ²⁶ Odehe rjasi maithiji ha Joseph ni hayu jamba. Bonsi boni mahngathi khe thathiba ode Egypt ha, bakhso ha jephhi dengba.