¹ Sainsibakhali, subung saosi Joseph khe thiba, "Nini buphade sao hamyahi dong." Odejang bo, boni basathu gini Manaseh jang Ephraim khe langhi thangba. ² "Naiha, nini basa Joseph, ning khe naimane phaidu,' thihi Jacob ne sainthiba ha, Israel bol haikhohi thuthan niprang baijaba. ³ Jacob, Joseph khe thiba, "Canaan raji ha dong ba Luz ha ang jang Gabara Madai nujaoba. Bo anthane hamthai riba ⁴ ode bo, ang khe thiba, "Ang ning khe yerrima, bangdao bangdao khlaima. Ang nini gede jahi raji salamma. Thaoglao ni khlaihi nini sarikh surikhrao ne ang ebo hahthan khe rima.' ⁵ Ang Egypt ha phaiyasani, nini ha basathu gini hajaiyaba, bonsi anise. Reuben jang Simeo ani jabalai Ephraim jang Manasehbo anise. ⁶ Bonsi niha sah sikh hajaiyaraode nini jama; Bonsi khe, bonsi dongyaba khaphlungthu ni bumu ha bonsi khe sainrikh laphama. ⁷ Tikhabo, ani khlaihide, ang Paddan niprang phaipinba saikhali Ephrate ha soihiyasani haniing Canaan rajiha, lamayung ha Rachel thiiyaba ni khlaihi ang dukhu thaokha. Ang bo khe Ephrate lama ha mahng sadamba (Bo jakha Bethlehem0. ⁸ Joseph ni basathu khe nuhi Israel thiba, "Ebonsila serekho?" ⁹ Joseph, boni bupha khe thiba, "Bonside ani basathuse, Madai anthane ebo hathan ha riyaba." Israel thiba, "Bonsi khe aniha labu, ode ang hamthai rinang." ¹⁰ Israel maithai raba ni darajang, muh naiba sringyakha, bo nuphuyakha Odejang, bonsi khe, Joseph boni rogoing ha labuba, ode bo bonsi khe khudimba ode gbaokhripba. ¹¹ Israel, Joseph khe thiba, "Angla nini muhkhang kheniing nunang niyakhase baoba tikhabo Madaila nini ansarao khebo naimane hajora rikha." ¹² Joseph, bonsi khe Israel ni yasugu jang yasugu gejer ha labuhi songriba ode bo gonglaiba. ¹³ Joseph, gini khebo labuhi, Ephraim khe boni yaoda gede ode Israel ni yaosi gede ode Manaseh khe boni yaosi gede ode Israel ni yaoda gede gbasi songphariba. ¹⁴ Israel yaoda yao jang phlaohi gididaoyaba Ephraim ni khro ha yao baoba ode yaosi yao jang radaoyaba Manaseh ni khro ha yao baoba. Bo, boni yao khe Manasseh ni khro khe remjephba bede tikhade bo hajaijenba. ¹⁵ Israel, Joseph ne hamthai rihi thiba, "Ani abaithu jang dongphayaba Madai, Abraham Isaac jang dongphayaba Madai, ang khe dini sosi khasaoyaba Madai, ¹⁶ deglarao ang khe khrip hamya jathai niprang dimkhaoyaba, bo Madai ebo ansarao ni basao ha hamathai ri. Ani bumu, ode ani abai Abraham ode Isaac ni bumu, bonsi ni bumu ha thaothing. Phirthima ha bonsi yerthing phaithing." ¹⁷ Ephraim ni khro basao ha Joseph ni bupha yaoda yao jang hamthai riba khe nuhi Jopseph dukhu nangba. Bo, bupha ni yao khe remhi Ephraim ni khro niprang Manaseh ni khro ha disaiba. ¹⁸ Joseph, boni bupha khe thiba, "Niya olai niya Abai, ebose hajaijenyaba. Nini yao khe eboni khroha bao." ¹⁹ Boni bupha jajaoyahi thiba, "Ang mithidu ani basa, ang mithidu. Boni habo subung yermase, ode bobo gedeba subung jamase. Tikhabo buphlung gididaoyabade badathane dedaoma ode boni sarikh surikhraode hamseniing bangma." ²⁰ Israel okhali ni basain ha bonsine elai grao jang hamthai riba, "Israel ni subungrao, nini bumu jang hamthai sainma, 'Madai ning khe Ephraimlai ode Manasehlai salamthing." Odehe, Israel, Manaseh ni sgang ha Ephraim khe dengba. ²¹ Israel, Joseph khe thiba, "Naila, angde thiima jakha, tikhabo Madai ning jang baosi dongphanang, odehe ning khe nini buphani rajiha labuphinnang. ²² Odehe ang nini khlaihi, nini badathuthane hahyam bangdaohi phatha rinang, Amorisarao niprang ang seng jang bla jang hahyam seyaba harangslai khe ang ninthane ridu. "