¹ Odehe Joseph, bising ha thangba ode Pharaoh ne sainthiba, "Ani abai ode ani khaphlungthu, bonsi ni dao mih ode bonsi niha dongyabasi khe Cannan raji niprang labutharhi eraha sophaihi dong. Bonsi duha Goshen haphai ha dong." ² Bo, boni khaphlungthu bowa khe langphaba ode Pharaoh jang basao mithilairiba. ³ Pharaoh, boni khaphlungthu khe thiba, "Nisila snadi khlaidu?" ⁴ Bonsi Pharaoh khe thipinba, "Nini dangyahsaraode jini phagararao dangbalai mih khrangyaraose. Bonsi Pharaoh khe thibakho, "Jing eraha phongsi dongdamane sening phaiba. Nini dangyuahsa ni mih buthu jimane oraha sam girikha bede tikhade Canaan rajiha asari glaiba hamseniing raokha. Odebani darajang, nini dangyahsarao khe khasaohi Goshen haphaiha dongmane ri." ⁵ Odehe, Pharaoh, Joseph khe thiba, "Nini bupha jang nini khaphlungthu niniha phaiba. ⁶ Egypt haphai nini sgang haniing dong. Nini bupha ode nini badathu khe, Goshen haphai ni hamdaothaoyaba hahthan ha deng. Nini khaphlungthu ni bising ha blaiyaba dongkhade ani mih buthu naoisomane bubain yaopha." ⁷ Boni yahon ha Joseph, bupha Jacob khe Pharaoh ni sgang ha labuba. ⁸ Pharaoh, Jacob khe thiba, "Ningla maithaibisi jakha?" ⁹ Jacob, Pharaoh khe thiba, "Angde maithai jang rjasi maithaithimji jakha, Ani hayude laoyakha ode dukhu jangse dongba. Ani phagararao hayu laohi dongbalai angde dongnang niya." ¹⁰ Boni yahon ha, Jacob, Pharaoh ne hamthai riba ode boni rogong niprang thanglaba. ¹¹ Boni yahon ha Joseph, boni bupha jang badathu khe dongthan jithan thikh khlairiba. Pharaoh sanibalai, Joseph, bonsine, Rameses haphai ha, Egypt ni hamdaothaoyaba hahthan ha dongma jimane hahthan riba. ¹² Joseph, boni bupha, boni khaphlungthu, ode bupha ni nokhor dongbasi ode bislai ansarao dongba khrip ne jimu gainmu riba. ¹³ Musi rajihabo jimu gainmu girikha; bede tikhade asari glaiba raoba. asari glaibani darajang, Egypt haphai ha Canaan rajiha gaikhabo gai haglai jaba. ¹⁴ Jimu gainmu phainhi Egypt jang Canaan haphai ha rang dongyabasi khe, Joseph bojom khlaitharba. Odehe bo rang khe Joseph, Pharaoh niha labuba. ¹⁵ Egypt jang Canaan rajiha rang jamtharba ni yahon ha, khrip Egyptsarao Joseph niha phaihi thiba, "Jinthane jimu gainmu ri! Jini ha rang girikha, sumu jabani jing nini sgang ha thiima?" ¹⁶ Joseph thiba, "Nisi niha rang girikhade, nisi ni dao mih buthu khe labu ode dao mih ni baslaiha ang nisine jimu gainmu rinang.' ¹⁷ Odejang, bonsi, bonsi ni dao mih khe Joseph niha labuba. Gorai, dao mih, ode mihleng buthu ni baslaiha Joseph, bonsine jimu gainmu riba. Maithai glao jang, bo, bonsine, mih buthu ni khlaihi hon jiriba ¹⁸ Bo maithai jambani yahon ha ode gibin maithai ha bonsi phaihi, bo khe thiba, "Jini ha rang ri musibo girikha, jing jini gedema khe khaopuyakha, jini ha dao mihbo girikha. Gedema ni nojor ha jini ha jar ni saomahng jang hahyam khe garhi musibo girikha. ¹⁹ Jing ode jini hahthan sumu jabani nini muh nojor ha thiima? Jimu gainmu ni khlaihi jing ode jini hahthan khe braila ode jing ode jini hahthan Pharaoh ni leng jahi donglanang. Jing thiiyahi thahnghi dongmane, jinthane maimu ri ode jini hahthan hah githi janang niya." ²⁰ Odejang, Joseph, Egypt ni khrip hahthan khe pharaoh ne braitharriba. Bede tikhade asari raobani khlaihi khripbo jarni hadi phadain buthu khe Pharaoh ne phainjitharba. odejang, khrip hahthan buthu Pharaoh ni jatharba. ²¹ Egypt ni sainjroba niprang sain baigoba sosi subung buthu khrip khe, Pharaoh leng salamba. ²² Tikhabo jonthaimarao ni hahyam khe seniing Joseph, braiyaba bede tikhade jonthaimaraone, Pharaoh, jimu gainmu rire. Odebani khlaihi bonsi hah phainya. ²³ Odehe Joseph, subung buthu khe thiba, "Nai, Pharaoh ni khlaihi ang nisi khe braikha. Go naila, eraha bumu bugung dong, ebo buthu khe gai. ²⁴ Mai bojom khlaIbili ha nisi phantha bowa Pharaoh ne rima nangma ode phanthabri nisi ni jama, bumu bugung ni ode nisini nokhor ni subungrao jimane jama." ²⁵ Bonsi thiba, "Ningde jing khe sgokha. Jing, nini muh nojor ha khasaoma mainang. Jing, Pharaoh ni leng jahi dongma." ²⁶ Egypt haphai ha Pharaoh ne phanthabowa rima nangma thihi Joseph, grao mthaoyaba dini dongkho. Jonthaimarao ni hahyam seniing Pharaoh ni jayaba. ²⁷ Odejang Israel, Egypt raji ni Goshen haphai ha dongba. Boni sbung buthu oraha hahyam nohyam bubra jaba. Bonsi oraha hamsengniing yerkha phaikha. ²⁸ Egypt ha Jacob maithai jang maithaijisni maithai dongba, odejang, Jacob ni maithai khrip jang rjasi bisagin maithai jaba. ²⁹ Jacob ni hayu jamma bubli sophaiba ha, bo boni basa Joseph khe longhi thiba, "Ning ang khe khasaodu tikhade nini yao khe ani yathong ha deng ode ning ang khe khasaodu, khadedu thihi ang khe thi. Ani mahng khe Egypt ha dasadam. ³⁰ Ang, ani abai jang thuphalaihiba sainkhali, ang khe ebo Egypt niprang lang ode ani abai ni mahngkhlung ha langhi ani mahng khe sadam.' Joseph thiba, "Ning thibalainiing ang khlaihnang." ³¹ Israel thiba, "Ang jang smai dang," odehe Josephg smai dangba. Odehe Israel, jarni thuthan ha bliphpahi Madai khe bkhan khlaiba.