¹ Olaiba bubli ha Joseph jar khe, dangyahsarao ni sgang ha mthaopuya jaba. Bo, jirikhkhaohi thgiba, "Khripbo era niprang thangthar." Odejang, Joseph jarni khaphlungthu jang basao mithijaoba ha dangyahsarao saosibo girikha. ² Bo khabaihi graba, Egyptsaraobo khnaba ode Pharaoh ni nohkhorbo khnaba. ³ Joseph, boni badathu khe thiba, "Angde Josephse."Ani abai thahnghi dongkho?" Boni badathu thaisi biringpuyakha, Bede tikhade boni sgang ha bonsi gmanghi thaoba. ⁴ Odehe Joseph, Boni badathu khe thiba, "Ani rogong ha khasao hi phai." Bonsi rogong ha phaiba. bo thiba, "Ang nisi ni buphlung Josephse, nisi Egypt ha phainjiyaba. ⁵ Ang khe nisi phainjibani nisi dukhu nangma nangya bede tikhade thiiyahi gomanese Madai ang khe haidahaba. ⁶ Ebo maithaigin raohi asari glaiba ode ar phaiginyaba maithaibowa ni bising ha gaibabo jaya rajibabo mainang niya. ⁷ Nisi ni hainjom khe ebo habsao ha mthanghi dengmani khlahise ang khe nisi ni sgang ha Madai haidahaba. ⁸ Nisi ang khe eraha haihaba niya, Madaise haihaba ode Madai ang khe Pharaoh ni bupha salamba, khrip noh ni gedeba salamba ode Egypt ni yawaiyah salamba. ⁹ Thang ode ani abai khe thitha, "Nini basa Josephde elai thidu, "Egypt ni khrip haphai ha Madai ang khe gedeba slamkha. Ani ha phai, gebrehi phai. ¹⁰ Ani rogong gbasi Goshen haphai ha, ning ode nini ansarao, ansarao ni ansarao ode nini dao mih ode niniha dongbasi labuhi eraha dongphai. ¹¹ Ang, nisine khrip jadi ritharnang bede tikhade oraha ar maithai bowa asari glaimakho. Nisi eraha phaiya tikhade nini nohkhor ni subung buthu maijiya mailingya jamase." ¹² Nai, nisini muhthai jangniing nuladu ode ani buphlung Benjamin ni muhthai jang nulakha, ang jarni khu jangniing nisi jang saimlaibase. ¹³ Ang Egypt ha bislai mahn maidu ode ani basao ha nisi snadi nukha, nisi thanghi abai niha sainthitha. Nisi gebrehi thang ode abai khe eraha labu." ¹⁴ Bo, boni buphlung Benjamin khe gbaophahi graba ode Benjaminbo gbaophahi graba. ¹⁵ Bo, boni khrip badathu khe khudimtharba ode bonsi ni basao ha graba. boni yahon ha boni badathu, bo jang sainlaiba. ¹⁶ Bo olai jathai jayabani graojma buthu khe Pharaoh ni noh ha sainthiba: "Joseph ni khaphlunthu phaiba." Pharaoh khnahi khajaba ode dangyahsarao bo khajaba. ¹⁷ Pharaoh, Joseph khe thiba, "Nini khaphlungthu khe thi, 'Mihleng ha gablaisi sikh ode Canaan rajiha thang. ¹⁸ Nini bupha ode nohkhor ha dongyaraosi khe aniha labuthar. Egypt ha hamdaothaoyaba hahthan khe ang rinang ode eraha dangla jila.' ¹⁹ Ang ning khe thiladu, 'Ang thibalai khlai, Nisini ansarao ode nobrajikhthune Egypt niprang gariha langhi thang. Nini bupha khe labuhi phai. ²⁰ Ning baraha dongma jima bo khe ning baoma nangya, bede tikhade Egypt ha hamdaothaoyaba hahthan nini gajase." ²¹ Israel ni basathu olainiing dangba. Pharaoh sanibalai, Joseph, bonsine gari riba odehe lamaha jima lingmanebo riphahaba. ²² Rijem gainslaimanebo, bo khrip ne rijem riphahaba tikhabo Benjamin ne, bo rjatham guphu ni rangtho jang rijem grangbowa gainslaimane rihaba. ²³ Boni buphane, bo elai rihaba: Egypt ha hamdaothaoyaba khe Mihleng maji ha gablaisi jimu gainmu ode bupha lamaha jimanebo haiphahaba. ²⁴ Odejang, bo, boni khaphlungthu khe haihaba ode bonsi thanglaba. Bo, bonsi khe thiba, "Nai, nisi lamaha saosi jang saosi danamjalai." ²⁵ Bonsi Egypt niprang baigolangba ode bupha dongyaba Canaan rajiha phaiba. ²⁶ Bonsi, bupha niha phaihi thiba, "Josephde thahnghi dongkho odehe Egypt ha gedeba jahi dong." Khnahi bupha gmangkha, Bonsi snadi grao khe thiba lonphuya jaba. ²⁷ Joseph thiyaba khrip grao buthu khe, bonsi buphane sainthitharba. Jacob khe langmane, Joseph gari haihayaba khe nuhi Jacob khadema maiphinba. ²⁸ Israel thiba, "Ai jakha. Ani basa Joseph thahnghi dongkho. Ang thiiyasani ha, ang thanghi bo khe naihima."