¹ Joseph, noh naisoyah khe thiba, "Bo subung buthu ni bakho ha, bonsi balangpubalailai jimu gainmu philingri ode bonsi ni rang khe bakho ha dangsingpin. ² Buphlung gididaothaoyaba ni bakho ha ani bela, guphu ni bela khe seng odehe boni rang khebo sengpin." Joseph sanibalainiing naisoyah dangba. ³ Phorong jaba jangniing, bonsi ode mihleng buthu khe langhi thangpinlaba. ⁴ Thol baji ha bonsi laiba jangniing, gjain soihiya saniha, Joseph, boni noh naisoyah khe thiba, "Baija, bo subung buthu niha khaiphalang, ode ning, bonsi khe mairikhdu tikhade bonsi khe thi, 'Hmaba ni khlaihi nisi sumu jabani hamya khe galangba? ⁵ Ebo bela hala ani gedema lingyaba niya ode ebo khela bo, Madai haithi ha yawaiyaba niya? Niside gjai dangkha, ebode gjai jakha." ⁶ Noh naisoyah, bonsi khe mairikhba ode bonsi jang sainlaiba. ⁷ Bonsi, bo khe thiba, "Sumu jabani ani gedemala elaiba grao khe thiba? Elai khusi dangmade nini dangyahsarao jainbi. ⁸ Nai, jini bakho khuruba ha rang maiyaba khe Canaan raji niprang jing ninthane labupinba. Jing bedehe jini gedemani noh niprang gjao guphu khaopure? ⁹ Nini dangyahsarao ni bising ha serebnalaiyaba olai maidu tikhade, bo khe sthaikhla odehe jingbo gedema ni leng jahi donglanang." ¹⁰ Noh naisoyah thiba, "Dei niyade, nisi thibalainiing jathing. Sereni bakho ha bela maidu, bo ani leng jama nangma, odehe gijisi khede haigerkhlama." ¹¹ Bonsi khripbo gebrelaihi jar jarni bakho labuhi hah ha dengba ode khripbo bakho khuruba. ¹² Noh naisoyah, bakho ruduba. Bo, bada radaothaoyaba ni bakho khe rudujenhi gididaothaoyaba niha rudukhlaibuba ode Benjamin ni bakho ha bela maiba. ¹³ Odehe bonsi jarni ri khe jikhaoba. Khripbo mihleng ha bakho sugupinba ode thol ha phaipinba. ¹⁴ Judah jang boni khaphlungthu, Joseph ni noh ha phaiba. Bo, orahaniing dongba odehe bonsi, boniha gonglaiphaiba. ¹⁵ Joseph, bonsi khe thiba, "Nisi sumu jabani elai khusi dangba? Anglaiyaba subung khe madai haithi ni khusi dangdu thihi nisi mithiya?" ¹⁶ Judah thiba, "Ani gedema ni sgang ha jing snadi grao khe thipumakho? Jing snadi grao khe thima? Ode jing jar khe bedehe saikhulapuma? Madaining nini dangyahsarao ni basao ha gjai mailakha. Nai, jing khripbo ode sere niha bela maiba jing khripbo gedema ni leng jakha." ¹⁷ Joseph thipinba., "Olaisosi khlainangde ang khe baoma nangya. Sere ni yaoha bela maiba, bo subung ani leng jama tikhabo nisi gijiside santhi jang, bupha niha thangpinla." ¹⁸ Odehe Judah, boni rogong ha phaihi, bo khe thiba, "Ani gedema, khasaohi, nini dangyahsa ne ning jang grao sainlaimane hajora ri ode nini thampsi khe nini dangyahsa ni basao ha dahokhlai, bede tikhade ningde Pharaohlaise. ¹⁹ Ani gedema boni dangyahsa khe singba, "Nini ha bupha ba buphlung dong?" ²⁰ Jing jini gedema khe thiba, "Jini ha bupha dong ode ralambai ha hajaiyaba ansa saosi dong. Tikhabo boni buphlungde habsao ha girikha ode buma jang, boseniing dongsiba ode bupha, bo khe hamseniing khasaodu.' ²¹ Odehe ning nini dangyahsa khe thipinba, "Bo khe ani ha labu, ang bo khe naima.' ²² Boni yahon ha, jini gedema khe jing thiba, "Ansade bupha jang degaoba jaya. Bo se bupha khe garhi phaidu tikhade boni bupha thiimase.' ²³ Odehe, ning nini dangyahsarao khe thiba, "Nisi jang baosi nisi ni buphlung gididaothaoyaba khe labuphaya tikhade, nisi ang jang muhkhang daphunusi." ²⁴ Ode jing jini bupha ni ha thangba, jini gedema ni grao khe nini dangyahsa ani bupha ne sainthiba. ²⁵ Jini abai thiba, "Thangpin, jimu gainmu braipintha.' ²⁶ Odehe jing thiba, "Jingde thangpinpuyakha. Jing jang baosi buphlung gididaothaoyaba thangphadu tikhade jing thangnang, bede tikhade jini buphlung gididaothaoyaba khe langphaya tikhade bo jang jing muhkhang nujaoba jayakha. ²⁷ Nini dangyahsa, jini abai jing khe thiba, 'Ani nobrajikh anthane basathu gini sening hajairiba thih nisi mithidu. ²⁸ Saosila, ang khe galanghi thanglakha ode ang thiba, "bo khede waikhlitharnaikha ode bo basain niprang ang, bo khe nuyakho." ²⁹ Ebo saosi khebo nisi langladu ode boni basao ha asaba jadu tikhade angde dukhu waimu jang khnai phuhi thiimase.' ³⁰ Odebani khlaihi, nini dangyahasa abai niha ang thangpinba ha, jing jang baosi ansa thangphaya, bo hayude bo ansa ni basaose, ³¹ jing jang baosi ansa khe nuphaya tikhade bo thiima. Grasa subung khnai guphu khe ang, mahngkhlung ha langbalaise jama. ³² Bede tikhade nini dangyahsa, ansa ni khlaihi abai jang grao smai danghise labuba, ang thiba, "bo ansa khe ang nini ha labupinya tikhade boni gjai khe ang thaoglao ni khlaihi bainjaolanang.' ³³ Odebani khlaihi, khasaohi ansa ni baslai ha nini dangyahsa khe nini leng ni esaph jang dengla ani gedema odehe bo ansa khe, boni badathu jang haiphaha. ³⁴ Ansa, ang jang baosi thangphaya tikhala ang bedehe abai niha thangphuma? Abai ni sao ha asaba jaginyaba jathgai baohi ang khindu."