¹ Hahthan ha hamseniing asari glaiba raoba. ² Egypt niprang jimu gainmu labuyaba khe jitharba ni yahon ha, bonsi ni bupha bonsi khe thiba, "Ar thangpinkho, jimu gainmu braitha." ³ Judah, bo khe thiba, "Bo subung jing jang grao raohi thiba, 'Nisi ni buphlung khe labuphayasi ang jang danujaophai.' ⁴ Ning, jini buphlung khe jing jang haiphadu tikhade jing thanghi jimu gainmu braihinang. ⁵ Tikhabo, bo khe, ning jing jang haiphaya tikhade jing oraha thangya. Bede tikhade bo subung jing khe thiba, "Nisi ni buphlung khe labuphayasi ang jang danujao." ⁶ Israel thiba, "Nisi ni buphlung ar saosi dongkho thihi sumu jabani bo subungne nisi sainthiba, ang khe sumu jabani dukhu riba?" ⁷ Bonsi thipinba, "Bo subung jini basao ha jini nohkhor ni basao ha jamsi singsotharba, Bo singba, "Nisi ni buphgala dongkho? Nisi niha ar buphlung dongkho?' Bo singbalailai jingbo sainthilaba. "Nisini buphlung khe labuhi phai" thinangla jingbo bedeniing baoba mainang?" ⁸ Judah, boni bupha Israel khe thiba, "Ansa khe ang jang baosi haiphaha. Jing khripbo, ningbo ode jini ansaraobo thanghi dongmane, thiiyahi gtomane, jing baijahi thangma. ⁹ Ang boni khlaihi bainjaoladu. Ning ani basao ha nephathar. Ang, bo khe nini ha labupinya tikhade thaoglao jang ning ani basaoha gjai remla. ¹⁰ Jing sgang haniing gebrehi thangkhade duhade alangiba ni khlaihi thanghi phaipinkhamu. ¹¹ Bonsi ni bupha Israel, bonsi khe thiba, "Olaise tikhade, duhaniing thang. Jini hahthan hamdaothaoyaba khe juli ha senghi langpha. Bo subung ni khlaihi yaosandi langpha- balm jang beredi, mosla, pistachio gowai ode badam buthu khe langphari. ¹² Rang phanthagin bangdaohi langpha. Nisi ni bakho ha rang rihayaba khe ripintha bede tikhade bode gjai jakha. ¹³ Nini buphlung khebo langpha. Baija ode bo subung niha thang. ¹⁴ Bo subung ni rogong ha thangba ha, Madai nisi jang baosi dongphathing odehe bo, nisi khe ode Benjamin khe haigerhathing. Ani ansarao gmakhade gmalathing." ¹⁵ Bonsi yaoha yaosandi dihi, rang phanthagin bangdaohi langhi ode Benjamin khe langphahi bonsi thangba. Bonsi baijahi Egypt ha thangba ode Joseph ni rogong ha songphahiba. ¹⁶ Bonsi jang baosi Benjamin khe Joseph nuba, bo, noh naisoyah khe thiba, "Bonsi khe noh bising ha labu, mih dain ode song, bede tikhade sainjer ha bonsi, ang jang baosi makham jismailaima." ¹⁷ Joseph sanibalainiing noh naisoyah khusi dangba. Bo, bonsi khe Joseph ni noh ha labuba. ¹⁸ Bo subung buthu khinlaiba bede btikhade bonsi khe Joseph ni noh ha labuba. Bonsi thiba, " Jing thangpinba ha, jini bakho ha jinthane rang ripinhayaba ni khlaihise jini basao ha gjai remma baonaidu. Bo jing khe remrilaphure ode jing khe leng salamlaphure, jini mihleng buthu khe latharlaphure." ¹⁹ Bonsi, Joseph ni noh naisoyah niha khainsuba odehe noh ni derga kholai ha, bo jang sainlaiba, ²⁰ thiba, "Ani gedema, jimu gainmu braimane jing eraha phaijenba. ²¹ Jing lengothani ha soihiba ha, jing bakho khuruba ode khrip ni bakho habo rang maiba, jini rang khe jing maipintharba. Bo rang khe jing labupinba. ²² Bo rang khe garhibo, jimu gainmu braimanebo jing rang labudukho. Jini bakho ha sere rang dengpinlababo jing mithiya." ²³ Noh naisoyah thiba, "Nisi jang santhi dongthing, nisi dakhin. Nisi ni Madai ode nisi ni buphathu ni madaise nisi ni bakho ha rang dengnaiba. Ang nisi ni rang khe maikha." Odehe noh naisoyah Simeon khe, bonsi ni sgang ha labukha. ²⁴ Noh naisoyah, bonsi khe Joseph niha labuba. Bo, bonsi ne di riba ode bonsi yao suba. Bonsi ni mihleng nebo jimu riba. ²⁵ Joseph sainjer ha phaiba ha, yaosandi yaophamane bonsi yaosandi khe salaiba, bede tikhade bonsi oraha makham jima thihi khnaba. ²⁶ Joseph, noh ha phaiba ha bonsi labuyaba yaosandi khe bonsi labuba ode Joseph ni sgang ha gonglaiba. ²⁷ Bonsi bede jadu jaya thi bo, bonsi khe singba, "Nisi ni buphala hamhiniing dong, nisi grasa dong thiyaba? Bola thahnghi niing dongnaidukhoda?" ²⁸ Bonsi thiba, 'Nini dangyahsa, jini bupha hamhiniing dong. Bo thiiyakho." Odehe bonsi gonglaiba ode bonthane mahn riba. ²⁹ Bo naikhuhabade, bo, boni buphlung, boni buma ni basa Benjamin khe nuhakha ode bo thiba, 'Nisi sainthiyaba buphlung gididaothaoyaba eboniing?" odehe bo thiba, "Madai ninthane hamthai rithing, ani basa." ³⁰ Joseph, nohkho niprang gebre gebre baigolangba, bede tikhade bo, buphlung ni khlaihi khabaima phaiba. Bo grathan smaiba. Bo, jarni nohkho ha thangba ode oraha graba. ³¹ Bo, muhkhang suhi phaipinba. Bo jar khe khaderilaba, thiba, "Dei makham khu." ³² Dangyahsa, Joseph ne makham khuriba ode boni khaphlungthu jar jar khujilailaba bede tikhade Egyptsarao Hebrewsarao jang makham jismailaithaoya, jismailaidu tiukhade Egyptsarao ni khlahi gususe. ³³ Khaphlungthu, boni sgang ha khamba, hajaijenyarao ni esaph jang khamba ode gididaothaoyaba jalai ni esaph jang. Bonsi khripbo gmanglaiba. ³⁴ Joseph, bonsi ne baosi makham samlai khuriba. Tikhabo, khaphlungthu ni bising ha, Benjamin ne phantha bowa bangdaohi makham samlai khuriba. Bonsi khaja mini bo jang makham jismailaiba.