¹ Egypt ha jimu gainmu dong thihi Jacob tharmaikha. Bo, boni basathu khe thiba, "Nisila sumu jabani saosi jang saosi nailaihi dongba?" ² Bo thiba, "Khna, Egypt ha jimu gainmu dong thihi ang graojma maiba. Oraha thang, thahnghi dongmane ode thiyahi thaomane oraha thanghi jimu gainmu braitha." ³ Egypt niprang jimu gainmu braihi labumane Joseph ni badathu ji baigolangba. ⁴ Tikhabo, Jocob, Benjamin khe badathu jang baosi haiphaya, ode bo thiba, "Bo khe asaba hamya jajaone ang khindu." ⁵ Canaan rajiha asari glaibani darajang, Israel ni basathu jimu gainmu braimane phaiba. ⁶ Joseph, haphai ni Governor jahi dongba. Boniing khrip rajiraone jimu gainmu phainba. Joseph ni badathu phaihi boni ha gonglaiphaiba ode khainsuba. ⁷ Joseph, boni badathu khe nuba ode bonsi khe basao mithiba tikhabo bo, badathu ni sgang ha mithiyasimaiba ode hophra sophra jang, bonsi jang sainlaiba. Bo, bonsi khe thiba, "Nisila baraha niprang phaiba? Bonsi thipinba, "Jimu gainmu braimane jing Canaan raji niprang phaiba. ⁸ Joseph, boni badathu khe basao tharmaikha tikhabo badathu, bo khe basao mithiya. ⁹ Joseph, bonsi ni basao ha saomin nuyaba khe bo wainsopinba ode bo, bonsi khe thiba, "Niside jini raji khe hamya khlaimane naidaophabase! Niside haphai lamphong naiphaibase." ¹⁰ Bonsi, bo khe thpinba, "Niya ani gedema, nini dangyahsaraode jimu gainmu braimanese phaiba. ¹¹ Jing khripbo bupha masi ni basathu gajase. Jingde subung hambi. Nini dangyahsaraode naidaobaiyarao niya." ¹² Bo, bonsi khe thiba, "Niya, nisi haphaini lamphong naimanese nisi phaiba.' ¹³ Bonsi thiba, "Jing nini dangyahrsarao khrip jang khaphlung jigin jadu, Canaan raji ni, bupha masi ni basathu. Buphlung gididaothaoyabade noh ha abai jang dong tikhabo saoside habsao ha girikha." ¹⁴ Joseph, bonsi khe thiba, "Odebani khlaihise angla nisi khe naidaophaiyarao thibathi. ¹⁵ Nisi grao gibi thiba na thiya nisi khe nainaima. Pharaoh dongdusi, nisini buphlung khe labuyasi, nisi ebo raji niprang thangpinlaba jaya. ¹⁶ Nisi ni bising niprang saosi khe haiha ode nisi ni buphlung saosi khe labu. Nisi grao gibiu joba na joya naima, nisi alongkho ha dongma. Niya tikhade, nisi Pharaoh khe hamya khlaimane naidaophaibase." ¹⁷ Bonsi khe, bo saintham ni khlaihi alongkho ha jephba. ¹⁸ Joseph, bonsi khe sainthamba basain ha thiba, "Ebo khusi khe dang ode thahnghi dong, bede tikhade ang Madai khe khindu. ¹⁹ Nisi gibi jangniing hamba subungraose tikhade saosi alongkho jephjaohi dongthing ode nisi ni nohkhorne jimu gainmu langhi nisi thang. ²⁰ Nisi ni buphlung khasedaothaoyaba khe labuhi phai ode nisi hamba subungraose thihi mithijaonang, nisi thiiyahi gonang." Bonsi olainiing khusi dangba. ²¹ Bonsi saosi jang saosi sainlailaiba, "Jing gibi jangniing gjai khusi dangkha, jini buphlung ni besai dukhu jang khainsuba ode jing boni grao khe khnaya. Bo dukhu khese jing dini goronma nangba. ²² Reuben, bonsi khe thiba, "Ang nisi khe thiya, 'Ansa ni basao ha phap khusi dadang,' tikhabo nisila ani grao khe khnaya? Naila, duha boni bithi ni basalai ha jing rima glaikha." ²³ Joseph khe, bonsi ni grao khe khmao haphya thihi bonsi baolaba bede tikhade bonsi jang boni gejer ha grao thaislaiyah dongba. Bo, bonsi niprang degaolanghi graba. ²⁴ Bo, bonsi niha phaipinba ode bonsi jang sainlaipinba. Bo, Simeon khe bonsi niprang langlaba ode bonsi ni sgang ha, bo khe khahi dengba. ²⁵ Boni yahon ha bo, bonsi ni bakho ha jimu gainmu philingmane boni dangyahsarao khe saniba ode khrip ni rang khe, bakho ha philingphamane saniba odehe lamaha jimanebo philingphama saniba. Bonsine elai khlairiba. ²⁶ Dangyahsarao, bonsini mihleng buthu ha jimu gainmu bariba ode bonsi ora niprang maolangba. ²⁷ Bonsi ni bising ha saosi lamaha lengoba ha mihleng ne di khainmane bakho khuruba, boni rang khe nuba. Bo jarni rang khe maipinlaba. ²⁸ Bo, boni khaphlungthu khe thiba, "Ani rang khede ripinhakha. Naisang era, ebode ani khlaihise." Bonsi ni kha maokha ode bonsi saosi jang saosi khinsinglaihi thiba, "Jini basao ha Madaila snadi khlaikha?" ²⁹ Bonsi, Canaan rajiha, bupha Jacob niha thangpinba ode bede bede jahi phaiba khrip grao khe, bupha ne sainthitharba. Bonsi thiba, ³⁰ "Bo subung, haphai ni Gabara, jing jang hophra hophra sainlaiba ode jing khe haphai naidaomanese thangba baoba. ³¹ Jing, bo khe thiba, "Jingde subung hambaraose. Jingde naidaobaiyarao niya. ³² Jingde khaphlung jigin jadu, bupha masi ni basathu. Saoside habsao ha giriklha ode gididaothaoyabade Canaan rajiha jini abai jang dongphadu.' ³³ Bo subung, haphai ni gedeba, jing khe thiba, "Nisi elai khlaidu tikhade ang nisi khe hamba subungrao baonang. Ang jang baosi nisini bising niprang saosi khe galang, nisi ni nohkhor ni khlaihi jimu gainmu langhi nisi thangla. ³⁴ Nisi ni buphlung khasedaothaoyaba khe ane labu. Nisi olai khlaipudu tikhade ang nisi khe hamba subungrao thihi lonnang, labuya tikhade ang lonya. Odehe nisi ni buphlung khe ang haiger hanang ode nisi jimu gainmu brailapunang. ³⁵ Bonsi khripbo jar jarni bakho khurubade khrip ni bakho habo guphu ni rangtho maiba. Bonsi ode bonsi ni bupha guphu ni rangtho nuhi khinsinglaiba. ³⁶ Jacob, bonsi ni bupha, bonsi khe thiba, "Niside ani basathu khe sthaitharma jakha. Joseph niing habsao ha girikhakho, Simeonbo thanglakha ode ar Benjamin khebo nisi langlama thidukho. Ebo buthu khrip jadi ani baslai hase jaba." ³⁷ Reuben, boni bupha khe thiba, "Ang Benjamin khe labupinya tikhade ani basathu gini khe ning sthailapunang. Bo khe ani basao ha hodaiha, ode ang, bo khe nini ha labupinnang." ³⁸ Jacob thiba, "Ani basa, nisi jang baosi thangphaya. Boni bada niing thiikhabo boseniing thaosiba. Nisi jang baosi thangphaba ha lamaha asaba jakhade ang dukhu jang ani bkhnai guphu jatharhi thiimase"