¹ Maithai jang maithaigin khrai khrai jamba ni yahon ha Pharaoh, saomin masi nuba. Bo Nile dibu dergong ha songhi dongba. ² Nile dibu niprang musu masni phongslo slo khlaihi baigophaiba ode sam jiba. ³ Boni yahon ha Nile dibu niprang ar musu masni ramjengjeng khlaihi baigopinbakho. Bo musu buthu Nile dibu dergong ha songphaiba. ⁴ Odehe bo ramjengjengyaba musu buthu phongsloslo musu masni khe jitharba. Pharaoh, smaopinba. ⁵ Ode bo thupinba ode saomin nupinba. Blai laisi ha majangsisi khlaihi maiding dingsni baigoba. ⁶ Boni yahon ha jodingding khlaihi busu gnang, sainja ni barbai gede maiding dingsni baigoba. ⁷ Jidingdingyaba maiding, maiding dingsni hamyaba khe molotharba. Pharaoh baijapinkha, naibade saominse. ⁸ Phorong bubli gede niprang boni kha dongprang jiprang jaya jaba. Bo, Egypt ni khrip phatri gayarao sma naiyarao khe longthimtharba. Pharaoh, boni saomin khe sainthiba, tikhabo boni saomin khe saosibo sainthiphlaripuya. ⁹ Boni yahon ha bela diyah ni hoja, Pharaoh khe thiba, "Ang dini jarni gjai khe wainsopinlakha. ¹⁰ Pharaoh, boni dangyahsarao ni basao ha thampsi baigoba odehe khalai baoyah ni hoja jang ang khe alongkho ha jephba. ¹¹ Ang jang bo jang, jing gini okhali ni sahri ha saomin nuba ode jing gini ni saomin ni jathai gibin gibin jathai jaba. ¹² Jing jang baosi Hebrewsa saosi, sonthuri ni dangyahsa dongba. Jing jini saomin khe bone sainthiba ode bo saomin khe thiphlariba. Bo jini saomin khe, jing saomin nuba mothapi sainthgiphlariba. ¹³ Jing khe, bo saomin sainthiphlaribalai niing gibi jaba. Pharaoh, ani bubain khe ane yaophapinba, tikhabo gibin saosi khela bo khasiba. ¹⁴ Odehe, Pharaoh, Joseph ne graojma haihahi longhaba. Bo khe lamai laminiing alongkho niprang baigoriba. Bo jar khnai singlaba, gainsari pinsari gainslaiba, ode Pharaoh niha phaiba. ¹⁵ Pharaoh, Joseph khe thiba, "Ang saomin masi nuba, tikhabo ani saomin khe thiphlagin saosibo giri. Tikhabo ang nini grao khe khnaba, ning saomin nuyarao ni khe sainthiphlaridu thihi." ¹⁶ Joseph, Pharaoh khe thipinba, 'Ang elai thiphlayabade ang niya. Madaise Pharaoh khe khasaoma." ¹⁷ Pharaoh, Joseph khe thiba, "Saomin ha ang, Nile dibu dergong ha ang songhi dongba. ¹⁸ Nile dibu niprang phongsloslo khlaihi musu masni baigophaiba ode sam jiba. ¹⁹ Boni yahon ha ar musu masni ramjengjen khlaihi baigopinbakho. Olai ramjengjengyaba musu khe ang Egypt ha nuba giri. ²⁰ Phongslosloyaba musu baigojenyaba khe ramjengjenmgyaba jitharba. ²¹ Bonsi, bo khe jitharba ni yahon habo, bonsi khe jitharbalai nuya bede tikhade jitharba ni yahon habo ramjengjeng dongladukho. Odehe ang smaokha. ²² Ang saomin ha, blai laisi ha maiding dingsni grikhyaba nuba. ²³ Olainiing maiding judingdingyaba busu gnang sainja ni barbai gede baigoba nuba. ²⁴ Judingdingyaba maiding hamyaba maiding dingsni khe molotharba. Ebo saomin khe ang phatri gayarao, sma naiyarao ne sainthitharkha tikhabo saosibo ane sainthiphlapuya ²⁵ Joseph, Pharaoh khe thiba, "Pharaoh ni saominbo baosise. Madai snadi khusi dangma nangjaoba, Joseph, Pharaoh ne sainthiba. ²⁶ Phongyaba musu masnide maithaisni ode hamyaba maiding dingsnide maithaisni. Saominde baosiniing. ²⁷ Ramjengjengyaba musu masni yahon ha baigoyaba jakha maithaisni ode maiding dingsni judingding sainja ni barbai gede baigoyaba jakha maithaisni asari glaiginyaba. ²⁸ Bo grao buthu khe ang Pharaoh ne sainthiba. Madai, Pharaohne snadi grao sainthima nangjaoba, bo mithirikha. ²⁹ Egypt haphai ha maithaisni hamseniing hadam hamma. ³⁰ Boni yahon ha maithaisni ni khlaihi asari glaima ode Egypt haphai ha mai badam badam maiyaba khe subungrao blaotharma, ode haphai ha asari glaiba hamseniing raoma. ³¹ Asari glaiba sainkhali ha, hahdam danghi mai badam badam maiyaba khe blaotharma bede tikhade asari glaiba hamseniing raoma. ³² Saomin jang Pharaoh ne alang alang sainthiba bede tikhade ebo jathai Madai niprangse phaiba ode ebo jathai gebrehi jama. ³³ Odebani duha, thiphlapuyaba ode grikhyaba subung saosi khe, Pharaoh smailathing ode bo khe Egypt haiphai ha denglathing. ³⁴ Haphai ha gedebarao khe Pharaoh songlathing ode bonsi jimu gainmu niprang rjasi ha phantha bowa dengkhaolathing. ³⁵ Thol buthu ha jimu gainmu thikhrimane khlaihi bonsi, Pharaoh niha jimu gainmu bojom khlailathing. Bonsi hamsisi dengma jimu gainmu nangma. ³⁶ Egypt haphai ha asari glaiba ha, haphai ha maithaisni jimu gainmu sorimane khlaihi jama. Olai khlaidu tikhade haphai ha dongyarao, asari glaiba ha dukhu maiyahi gonang." ³⁷ Pharaoh ni muh nojor ha ode boni dangyahsarao ni sgang ha ebo budi halai hambi. ³⁸ Pharaoh, boni dangyahsarao khe thiba, "Madai ni bese gthar jang dongyaba, elaiyaba subung khe jing maipunang?" ³⁹ Odejang Pharaoh, Joseph khe thiba, "Madai ninthane ebo buthu khe phunuba, ninglai thiphlapuyaba ode grikhyaba saosibo giri. ⁴⁰ Ning ani noh khe naisoma ode ning thibalaise ani subungrao khusi dangma. Singason ha sening, ningthane ang dedaohi dongma." ⁴¹ Pharaoh, Joseph khe thiba, "Nai, Egypt haphai ni basao ha ang, ning khe songkha." ⁴² Pharaoh, jarni gjao ni yaosidam khe khohi Joseph ne gainriba. Hamyaba ri ni gainsari khe, bone gainriba, ode guphu ni likh gainriba. ⁴³ Boni ha dongyaba maginba gorai gari ha bo khe gariba. Subung buthu boni sgang ha jirikhkhaoba, "Yasugu thu." Pharaoh, Joseph ni yaoha Egypt haphai khe hodaitharba. ⁴⁴ Pharaoh, Joseph khe thiba, "Angde Pharaohse, ning khe garhi, Egypt haphai ha saosibo yao yega sugu maiya." ⁴⁵ Pharaoh, Joseph ni bumu khe "Zaphenath-Paneah" dengba. On ni jonthaima Potiphera ni bisikh Asenath khe Joseph ne, bo nobrajikh riba. Egypt haphai ni hahdam buthu ha Joseph baigolangba. ⁴⁶ Egypt ni raja Pharaoh ni sgang ha, Joseph songba bubli ha boni maithai maithaithimji maithai jahi dongba. Pharaoh ni sgang niprang Joseph baigolangba ode khrip Egypt haphai ha thangba. ⁴⁷ Maithaisni maithai majang maithai ha hahdam hamseniing hamba. ⁴⁸ Egypt haphai ni hahdam buthu khe bo, maithaisni maithai bojom khlaiba ode thol buthu ha dengba. Thol buthu ni sersing giding hahdam dangyaba khe thol ha bojom khlaitharba. ⁴⁹ Dimlang ha hajeng bangbalai, sainsopuyasi, susopuyasi, Joseph jimu gainmu bojom khlaiba. ⁵⁰ Asari glaiya saniha Joseph niha basathu gini dongba, on ni jonthaima Potiphera ni bisikh Asenath jang hajaiyaba. ⁵¹ Hajaijenyaba basa ni bumu khe Joseph, Manaseh dengba, bede tikhade bo thiba, "Ani dukhu hadi jang ode ani abai ni nohkhor buthu khe Madai blaoriba." ⁵² Basa gididsaoyaba ni bumu khe bo Ephraim dengba bede tikhade bo thiba, "Dukhu hadi ha glaiba ha Madai ane hamthai jang gablairiba." ⁵³ Egypt haphai ha hahdam hamyaba maithaisni maithai jamphaiba. ⁵⁴ Joseph thilangbalainiing, maithaisni asari glaiginyaba jenphaiba. Khrip haphai habo asari raoyaba glaiba tikhabo Egyp ha jimu gainmu dongba. ⁵⁵ Khrip haphai ha asari glaiba ni yahon ha, subung buthu Pharaoh niha grasingphaiba. Pharaoh, Egyptsarao dongbasi khe thiba, "Joseph niha thangla ode bo thibalai khnala." ⁵⁶ Khrip haphai habo asari glaiba. Jimu gainmu bojom khlaihi dengyaba khe Joseph khurutharba ode Egyptsaraone phainba. ⁵⁷ Mulug gorongbri ni subungrao, Joseph niha phaihi jimu gainmu braiphaiba bede tikhade haphai ha asari raohi glaiba.