¹ Adam ni nobrajikh Evi sao khongin jakha thihi Adam mithikha ode boni ha Kain hajaikha. Evi thiba, "Madai ni juruma jang ang miyah hajairikha. ² Ode boni yahon ha boni buphlung Abel khe hajairikha. Abel jakha dao mih naisoba tikhabo Kainla hahdam dangba. ³ Bo bubli buthu haniing Kain hahdam dangyaba niprang Madai ne bthai yaosandi labuhi phaiba. ⁴ Abelbo mih khrangyaba niprang hajaijenyaba ode bublam gnang khe labuba. Abel ni yaosandi khe Madai ajaoba, ⁵ tikhabo Kain ni yaosandi khela Madai ajaoya. Odebani darajang, Kain thampsi baigoba, thampsi mukhangkhang jaba. ⁶ Madai Kain khe thiba, "Sumu jabani ning thampsi baigoba, thampsi mukhangkhang jaba? ⁷ Ning gibi gibi khusi dangkha tikhala nini khe ajaonang niya? Tikhabo ning gibi gibi khusi dangya tikhala, gjaide nini derga kholai haniing dong ode ning khe yawaima nangjaoma tikhabo ning thampsi khe dephlaipuma nangma." ⁸ Kain, boni buphlung Abel jang sainlaiba. Bonsi hahdam ha dongba bubli ha, Abel ni baslai ha Kain songkhuba ode Abel khe sthaiba. ⁹ Madai, Kain khe thiba, "Nini buphlung Abel la baraha dong?" Kain thiba, "Ang mithiya. Ang ani buphlung ni rakhiyah?" ¹⁰ Madai thiba, "Ning snadi dangba? Hahkhor niprang nini buphlung ni bithi ni khurang, ang khe jirikhjkhaodu. ¹¹ Phirthima niprang ang ning khe sahrithai ridu, nini buphlung ni bithi khe ajaomane phirthima bukhu sasidu. ¹² Dini niprang, ning hahdam dangkhabo musi yaoblai mainang niya. Habsao ha, ning daoglang baiyaya saosi jama. ¹³ Kain, Madai khe thiba, "Ang bakhuphubathanebo ani dang gjai ni dukhu de dedaokha. ¹⁴ Ningla ang khe ebo hahyam niprang rihonkhlakha ode ang, ning khe thimhi dongma. Habsao ha angde daoglang baiyaba jama ode sere ang khe nudu, bo subung ang khe dothaima. ¹⁵ Madai, bo khe thiba, "Sere Kain khe dothaidu, phanthasni bangdaohi bo dukhu rijaoma." Odejang, sere bo khe nudu, bo khe dothaiyamane, boni basao ha Madai daogari dengba. ¹⁶ Odejang, Kain, Madai niprang degaolanghi, Eden ni sainja gede Nod ni haphai ha donghiba. ¹⁷ Kain ni nobrajikh sao khongin jaba thihi Kain tharmaiba. Bo Enoch khe hajairiba. Bo thol masi dangba ode basa Enoch ni bumu jang thol ni bumu khe dengba. ¹⁸ Enoch niha Irad hajaiba. Irad, Mehujael ni bupha jahiba. Mehujael, Methushael ni bupha. Methushael, Lamech ni bupha. ¹⁹ Lamech nobrajikh gini khrangba. Saosiba nobrajikh ni bumu jakha Adah, gibin nobrajikh ni bumu jakha Zillah. ²⁰ Adah niha Jabal hajaiba. Bo jakha nohsa danghi dongyarao ode dao mih khrangyarao ni bupha. ²¹ Boni buphlung ni bumu jakha Jubal. Bo jakha harp jang supen damyarao ni bupha. ²² Zillah ni khlaihi boni ha tubal-Kain, ser ni yaodi salambaiyaba hajaiba. Tubal-Kain ni bahandao ni bumu jakha Naamah. ²³ Lamech, boni nobrajikhthu khe thiba, "Adah jang Zillah, ani grao khe khna; Lamech ni nobrajikhthu, ani grao khe khna. Ang khe bumain phnangbani khlaihi ang subung saosi khe sthaikha, ang khe jabraosibani khlaihi naga subung khe ang sthaikha. ²⁴ Kain ni khlaihi phanthasni bangdaohi dukhu rijaoma tikhade Lamech ni khlaihi bisatham phanthasni dukhu rijaoma." ²⁵ Adam ni nobrajikh sao khongin japhinba thihi bo tharmaikha ode boni basa gibin hajaibakho. Basa ni bumu khe, bo Seth dengba ode thiba, "Abel khe Kain sthaiba, Abel ni basalai ha Madai anthane basa gibin rislaikha." ²⁶ Seth niha basa hajaiba ode basa ni bumu Enosh dengba. Bo bubli niprang subung buthu Madai khe jirikhba jenba.