¹ Madai sangsaiyaba mih buthu ni bising ha jubu khripthane grikhdaothao. Jubu Masainjikh khe thiba, "Madai gibi jangniing thiba, 'Barising ni asaba buphang ni bthai khe dakhaoji'? ² Masainjikh jubu khe thipinba, "Barising ha buphang dongyaba ni bthai khe jing khaojilaphudu, ³ tikhabo barising gejer ha buphang dongyaba ni bthai khe, Madai thiba, 'Bo khe nisi dakhaoji, nisi dophabo dadopha, jire tikhade nisi thiima." ⁴ Jubu masainjikh khe thiba, "Nisi thiiya. ⁵ Nisi jire tikhade nisi ni muthai khurulangma ode nisi Madailai jama, hamba hamya khe mithiphuma thihi Madai mithidu. ⁶ Buphang ni bthai khe masainjikh khaojithaosi nukha, ode muhthai jangbo naithaosisi nukha ode buphang niprang grikhthai maima nangjaokha ode bo buphang ni bthai khe khaojikha. ⁷ Bonsi gini ni muhthaibo khurulangkha odehe bonsi langtha langthise thihi jar khe tharmailakha. Odejang bonsi blai guwarba khe suphahi ri gainba. ⁸ Sain magaindikhba bubli ha, barising ha Madai hemkhlaibuba khe bonsi khnaba, odejang Adam jang boni nobrajikh Madai jang nujaoraoyahi barising ni bophang ha thimba. ⁹ Madai, Adam khe longhi thiba, "Ning baraha dong? ¹⁰ Adam thiba, "Ning barising ha habphaiba khe ang khnaba ode ang ning khe khinba bede tikhade ang langthase." ¹¹ Madai thiba, "Ningde langthase thihi ning khe sere thiba? Ang dakhaoji thihi magnayaba buphang ni bthai khe ning khaojiba?" ¹² Adam thiba, "Ning anthane sao lugu riyaba masainjikh buphang ni bthai khe ane jasiba ode angbo jihaba." ¹³ Madai masainjikh khe thiba, "Ning sumu jabani elai khusi dangba?" Masainjikh thipinba, "Jubu phaihi ang khe thokhiphaiba ode ang khaojiba." ¹⁴ Madai jubu khe thiba, "Ning elai khusi dangba ni khlaihi, phirthima ha bislai hang gnang ode mih buthu ni bising ha ning khe ang sahrithai ridu. Ning jarni boho jang sorbaima nangma odehe ning thiiyadusi hahduri khe jima nangma. ¹⁵ Ang nisi gini ni bising ha ode nini niprang yeryarao jang boni gede yeryarao khe saosi jang saosi khe dusmon khlairima. Bo ning khe bokhro ha dokhlima ode ning boni yasugu ha waima. ¹⁶ Masainjikh khe Madai thiba, "Nana hajaiba bubli ha ang khe hamseniing dukhu mairima; sajaohi ning nana hajairima. Nini basao ha nini nohbra ni nangjaoma jama ode ning khe, bo yawaima." ¹⁷ Adam khe Madai thiba, "Ning nini nobrajikh ni grao khe gainsonghi, ang daji thiyaba buphang ni bthai khe ning jiba ni khlaihi, nini khlaihi ang ebo phirthima khe sahrithai ridu; ning thiiyadusi dukhu khlaima nangma. ¹⁸ Ang nini khlaihi busuling samgariling baigorima ode ning samphanglai bongphanglai buthu khe jima nangma. ¹⁹ Ning hahma japhinyadusi jimu gainmu ni khlaihi ning glimdi hokhlaimja nangma bede tikhade ning khe hahma jang jangse daoba. Ning khe hahma jang daoba ode ning hahma japhinma nangma." ²⁰ Adam, jarni nobrajikh ni bumu khe Evi dengba bede tikhade bo khrip hang gnangrao ni buma jaba. ²¹ Madai, Adam jang Evi ni khlaihi mihgur ni ri salamriba ode gainriba. ²² Madai thiba, "Duhade Adambo jinglainiing jasosi jakha, hamba hamya mithikha. Odebani khlaihi duha niprangde, bo yao phlaohi hayu ni buphang ni bthai khe khaojiriba jayakha niyade boni hayu thaoglao jang jamase." ²³ Odebani darajang, bo miyahsa khe Eden barising niprang haikhlahi, hahdam danghi jimane haikhlaba. ²⁴ Odebani khlaihi, Madai, miyahsa khe, bo Eden barising niprang rihonkhlaba ode Eden barising ni sainja gede cherubim dengba ode bo hayu ni buphang khe raokhimane khlaihi seng buyaba masi khrip gede baidingya khe dengba.