¹ Odehe nokhasao jang phirthima khe sangsaitharba, ode khrip hang gnang buthu oraha gablaitharba. ² Sainsniba ha Madai jarni khusi khe dangblaitharba, odejang sainsniba ha Madai lengoba. ³ Madai, sainsniba khe hamthai riba ode gthar basain khlaiba bede tikhade Madai khusi dangblaitharhi bo basain ha lengoba. ⁴ Madai sangsaibani sainkhali ha, Nokhasao ode phirthima khe elainiing sangsaiba, ⁵ phirthima jang nokhasao khe Madai sangsaiba ha, phirthima ha samphang bongphang baigoyakho bede tikhade phirthima ha Madai hadi hariyakho, ode phirthima ha dangma jimane subung girikho. ⁶ Tikhabo dikhongsa baigohi haphlaiha di gablaiphaiba. ⁷ Madai, subung khe hahma jang daoba odehe subung ni bugung ha hayuh ni hang susengba, odehe subung gthang jaba. ⁸ Eden ni sainja gede Madai barising masi salamba ode Madai sangsaiyaba subung khe bo barising ha dengba. ⁹ Phirthima ha Madai, naithaosisi ode jimu ni khlaihi gibin gibin buphang baigoriba. Bo buphang buthu ni bising ha hayu ni buphang bo dongba, hamba hamya mithiriyaba buphang dongba. ¹⁰ Eden niprang dikhongsa masi barising gede thangdu. Ora niprang bo dikhong dibra bri dikhong jalangdu. ¹¹ Masiba dikhong ni bumu jakha Pishon. Ebo dikhong, guphu jang gablaiyaba Havillah haphai jahi daokhlailangdu. ¹² Bo haphai ni guphu hamsiniing hambi. Oraha bdellium jang onyx longthaibo maidu. ¹³ Maginba dikhong ni bumu jakha Gihon. Ebo dikhong Kush haphai jahi daokhlailangdu. ¹⁴ Magthamba dikhong jakha Tigris, ebo dikhong Ashur ni sainja jahi daokhlailangdu. Mabriba dikhong jakha Euphrates. ¹⁵ Madai, subung khe langhi, barising khe naisoma raokhimane Eden barising ha dengba. ¹⁶ Madai, subung khe thiba, "Barising ha buphang dongyabasi ni bthai khe ning jilaphudu. ¹⁷ Tikhabo hamba hamya mithiriyaba buphang ni bthai khe ning jima nangya, ning jidu tikhade ning asalai tikhabo thiima." ¹⁸ Odehe Madai thiba, "Miyahsa saojang dongba miyahsa ni khlaihi hamya. Miyahsa ne hamgothai ang bonthane sao lugu salamrima." ¹⁹ Hahma jang, Madai khrip dao mih buthu khe sangsaiba. Dao mih buthu khe Madai, miyah ni rogong ha bumu jang jirikhmane labuba. Hang gnang dongyabasi khe bo snadi bumu jang jirikhkha, bo buthu ni bumu olai thaokha. ²⁰ Adam, mih buthu ni bumu dengkha, nokhasao ni dao buthu ni, miyung mihsi buthu ni. Tikhabo Adam ni khlaihila sao lugu hamba maiya. ²¹ Madai, Adam khe thusengriba. Madai, Adam ni sangkhreng grengsi khoba ode bahain jang phongpinba. ²² Adam niprang sangkhreng grengsi khoyaba niprang, Madai masainjikh khe sangsaiba ode masainjikh khe Adam ne yaophaba. ²³ Adam thiba, "Eboniing ani greng ni greng ode ani bahain ni bahain; bo khe masainjikh thima, bede tikhade bo khe miyahsa niprang sangsaiba." ²⁴ Odebani darajang, miyahsa jarni buma bupha khe garhi, jarni nohbrajikh jang gathaisi jama ode bonsi saomang masi jama. ²⁵ Bonsi ginibo langtha langthi dongba, miyahsabo nobrajikhbo lajiya.